Лондоннинг «Челси» клуби бош мураббийи Антонио Конте «Арсенал»га қарши Англия кубоги финал баҳсидан олдин ўз фикрларини билдириб ўтди.

Мураббийнинг сўзларига кўра, шогирдларининг тайёргарлик жараёнидан кўнгли тўқ. Шунингдек италиялик мутахассис Манчестер шаҳрида юз берган кўнгилсиз воқеа ҳақида ҳам тўхталиб ўтди.

«Бизни катта ўйин кутиб турибди. Бу кубок биз учун жуда муҳим. Аммо Манчестерда юз берган воқеани унута олмаяпман. У ерда бир-қанча оилалар катта йўқотишларга дуч келишди.

Биз жамоавий тарзда ҳафта давомида яхши тайёргарлик кўрдик. Ростини айтсам, шогирдларимнинг кўзида ўт чақнаб турганини кўриш мумкин ва уларнинг ҳеч бири хотиржамликка берилмаган.

Бу мавсумдан сўнг менда ҳеч бир футболчимга нисбатан ишончсизлик ҳисси йўқ. Финалдаги 90 дақиқа давомида АПЛдаги ғалабамизни эсдан чиқариб, бор эътиборимизни мана шу учрашувга қаратишим керак. Яқин келажакда бу турнирни яна ютишга имконият бўладими йўқми билмаймиз. Шунинг учун бор имкониятимизни ишга солиб ғалаба учун ҳаракат қиламиз.

Жуда ҳушёр ўйнашимиз керак, шогиртларимга ишончим юқори. Ўйин икки жамоа учун ҳам жуда оғир ўтади. Лекин биз жангга тайёрмиз» - дейди Конте лондонликлар расмий сайтига.