Малайзия премьер-лигасининг жорий мавсум қизғин паллага кириб боряпти. Айни пайт чемпионатда танаффус юзага келган. Жамоалар таътилга чиқишган бўлсада, тайёргарлик тўхтаб қолгани йўқ.

Шу кунгача ҳисоб бўйича Малайзиянинг иккинчи чемпионатида 12та тур ўйинлари ортда қолди. Хабарингиз бор, бугунги кунда премьер-лигада бир йўла беш нафар ҳамюртимиз ўйнаяпти. ATM клубида Сирожиддин Раҳматуллаев, Сирожиддин Аллаев ва Иқбол Бобохонов тўп суришяпти. Лутфулла Тўраев «Теренггану», Бобуржон Акбаров эса «Куала-Лумпур» шарафини ҳимоя қилмоқда.

Ортда қолган 12та турдан сўнг «Куала-Лумпур» 23 очко билан 4-ўринни эгаллаб турибди. Лекин жамоада чемпионатнинг кичик олтин медалларини қўлга киритиб, суперлигага йўл олиш имконияти юқори.

Сабаби, пешқадам билан ўртадаги тафовут унчалик катта эмас. Биз айнан шу клубда ўйнаётган тажрибали ҳимоячи Бобур Акбаров билан боғланиб, ундан интервью олдик.

- Бобур, сиз билан Малайзия чемпионати бошланиши олдидан суҳбатлашгандик. Мана, ҳозир чемпионат айни қизиган пайти. Ўтган ўйинларни таҳлил қилган ҳолда умумий таассуротларингиз қандай бўлди?

- «Куала-Лумпур» билан чемпионатни жуда яхши бошлагандик. Лекин 5-турга келиб ўйинимизда пасайиш юзага келди. Шу билан бир қаторда жамоамизда бош мураббий ўзгарди. Унинг қўл остида натижамизни анча яхшилаб олишга эришдик. Ҳозирда ўйин услубимиз анчагина ижобий томонга ўзгарган. Ўзимга келсак, мунтазам равишда майдонга тушяпман. Ўз ўйиним билан жамоам ғалабаларига ҳиссамни қўшиб келяпман. Албатта, бундан хурсандман. Шу ўринда Малайзия чемпионатини кўпчилик ўйлагандек кучсиз, деб айтмаган бўлардим. Сабаби ҳар бир ўйин кескин курашларга бой тарзда ўтмоқда. Футболчилар ўзларини ҳам, рақиб ўйинчиларини ҳам аяб ўтиришмайди. Шахсан мен шундай футболни яхши кўраман. Бир сўз билан айтганда, ҳаммаси жуда ажойиб.

- Демак, Малайзия клубига ўтганингиздан ҳечам афсусланмайсиз, шу клубни танлаб, тўғри қарорга келгансиз, шундайми?

- Шундай деса ҳам бўлади. Бу ерда ўз ўйиним билан жамоам ва мухлисларни хушнуд этиш учун бор куч-ғайратимни ишга солишга интиляпман. Легионер номини оқлашга уриняпман. Малайзияликлар ўзбекистонлик футболчиларнинг нималарга қодир эканлигини кўриб қўйишсин.

- Легионерларга муносабат қандай экан?

- Талаб жуда юқори. Ўз ўрнида, биз ҳам ҳар дақиқада масъулиятни ҳис қилиб турамиз.

- Жамоаларнинг савияси қандай экан? Ўткинчи ўйинлар кўп эмасми?

- Савия деярли бир хил. Битта жамоани кучли ёки аксинча, кучсиз деб бўлмайди. Сабаби айнан кучли деб қаралган жамоа турнир жадвалининг энг қуйидаги клубига ютқазиб қўйиши ҳеч гап эмас.

- Жамоа олдига суперлигага чиқиш вазифаси қўйилганми?

- Шубҳасиз. Буни уддалашимиз учун ҳали имкониятимиз етарли. Ҳозирда иккинчи ўриндаги жамоадан 2 очкога ортда қоляпмиз. Бу фарқни битта ўйиндаёқ йўққа чиқариш мумкин. Ўйлайманки, мавсум якунида биз суперлига йўлланмасини қўлга киритамиз.

- Янги бош мураббий малайзияликми? У легионерларга қандай муносабат билдирар экан?

- Аввалги мураббийимиз ҳам, янгиси ҳам бразилиялик. Ушбу мутахассис билан муносабатимиз жуда аъло даражада. Бу мен учун жуда муҳим. Мураббийнинг ишончи бўлмаса, футбол ўйнаш қийин.

- Сиздан ташқари яна 4 нафар футболчимиз премьер-лигада ўйнаш-япти. Улар билан ҳам кўришиб турибсизми?

- Лутфулла Тўраев, Фарҳод Тожиев ва Дилшод Шарофутдинов биздан анча узоқда жойлашгани учун улар билан кўриша олмаяпмиз. Смоляченко, Бобохонов ва Раҳматуллаев билан уйимизнинг оралиғи 6-7 километрни ташкил этади, шу боис тез-тез кўришиб турамиз.

- Айни пайт ўқув-машғулот йиғини қаерда ўтказиляпти? Чемпионат қачон давом эттирилади?

- «Куала-Лумпур» стадионида таъмирлаш ишлари олиб бориляпти. Шу сабабли ҳозир машғулот учун муқим майдонимиз йўқ. Йиғинлар турли ҳудудларда ташкил этиляпти. 24 май куни навбатдаги тур учрашувлари бўлиб ўтади. Ўз майдонимизда АТМ жамоасини қабул қиламиз. Бу клуб таркибида ўзбекистонлик уч футболчи тўп суряпти.

- Маош ва мукофот пулларини вақтида оляпсизларми?

- Бу борада ҳеч қандай муаммо йўқ. Маошимиз ҳар ойнинг 28-29-кунлари чиқади.

- Харажатларга етяптими?

- Нолимайман.

- Ўзбекистон чемпионатини кузатиб боряпсизми? Фикрингиз қандай?

- Албатта, кузатяпман. Эътиборга лойиқ жиҳати шундаки, водий футболи ўз ўрнини топиб боряпти. Келаси йили бу жамоалар сафида собиқ клубим «Андижон»ни ҳам кўришни хоҳлардим. Миржалол Қосимовнинг «Бунёдкор»га қайтганидан хурсандман. «Пахтакор»да ҳам катта ўзгаришлар бўляпти. Бу эса ўзбек футболининг ўсишига ёрдам беради.

Камолиддин АЛИМОВ суҳбатлашди