Бугунги куннинг энг муҳим хабарларидан бири Вадим Абрамовнинг “Нефтчи” бош мураббийи этиб тайинлангани бўлди. Очиғи, сўнгги пайтларда ўйини унчалик ўхшамаётган водий клуби учун бу яхши янгилик. Ҳар ҳолда Вадим Абрамов шунчаки курсисини иситиб ўтирадиган мураббийлар сирасига кирмайди. Ахир унинг бошқарувида Ўзбекистон миллий терма жамоаси қандай ўйин кўрсатганини эсланг. Эҳтимол, ўша пайтда Абрамовнинг тактикаси натижа келтирмагани учун бизга маъқул келмагандир, аммо ҳозир Абрамов бошқарувидаги терма жамоамизни одам соғиниб қолди. Ҳа, Вадим Абрамов ўз имзосига эга бўлган мураббий эканлигини исботлаганди ўшанда.

МАСЪУЛИЯТИ ОҒИР

“Нефтчи” шунчаки Олий лигада вақт ўтказиш учун ўйнаб кетадиган жамоа эмас. Фарғона клуби ўзининг шонли тарихига эга, бир пайтлар “Нефтчи” исталган жамоани зир титратарди. Бугун эса ўртамиёна жамоага айланиб қолди. Хўш, Вадим Карлеоневич жамоани олдинги даражага қайтара оладими? Бу жуда қийин. Бироқ, бизнинг фикримизча, агар ҳамма нарса Абрамовнинг ихтиёрига қўйиб берилса ва у чин дилдан ишласа, “Нефтчи”ни юқори ўринларга олиб чиқа олади. Бунинг учун унда тажриба етарли. Вадим Абрамов ҳужумкорликни хуш кўради, қолаверса, кучли жамоаларга қарши қандай ўйнашни ҳам билади. Агар адашмасам, Япония терма жамоасини айнан Абрамов бош мураббийлиги даврида кичик ҳисобда мағлуб этгандик. Эрону Кореяларни олиб бориб, олиб келардик. Терма жамоамизнинг ўйинида шиддат, шижоат, ақлли тактика бор эди. Агар Абрамов худди шу тажрибасини “Нефтчи”да ҳам қўллай олса, албатта, мақсадига эришади.

ТАЖРИБАЛИ МУРАББИЙ КЎПАЯДИ

Олий лигада, бундоқ эътибор қаратсак, тажрибали мураббийлар кам экан. Ҳатто баъзи мураббийларнинг қандай қилиб жамоа бошқариб юрганига ҳайрон қоласан. Ана шундай вазиятда ўзбек футболига Абрамовга ўхшаган мураббийни қайтаришимиз керак. Биз Абрамовдан даҳо ясаш фикридан йироқмиз, шунчаки унинг салоҳияти, тажрибаси Олий лигамиздаги мураббийларникига қараганда яхшироқ. Англия чемпионати нима учун кескин? Чунки унда бир-биридан қолишмайдиган мураббийлар ўзаро кураш олиб боради. Масалан, бу йили Конте, Почеттино, Клопп, Венгер ва Муоринью. Яна бир қанча тажрибали мураббийларни санаш мумкин. Бизда эса бундай деб бўлмайди. Айтмоқчи бўлганимиз, Абрамовнинг яна футболга қайтиши ўзбек футболи учун фойдадан холи бўлмаса керак.