Абдуллоҳ Муҳаммад ал Ҳилолидан сўнг Осиё майдонида мамлакат номини танитадиган ҳакам кўринмаётган эди. 33 ёшли Аҳмад ал Кааф бу бўшлиқни тўлдириш учун жиддий ҳаракат қиляпти. Осиё ҳакамлар қўмитаси унинг «прогресси»га жиддий эътибор беряпти. Бу эътибор самараси ўлароқ, 8-турнинг энг муҳим баҳсига (Эрон - Ўзбекистон) айнан унинг тайинлангани ҳам ушбу ҳакам фаолиятида жиддий бурилиш ясаса, ажабмас.

ЖЧ-2018 турнири саралаш босқичи «А» гуруҳи 8-турида Ўзбекистон терма жамоаси сафарда Эронга қарши баҳс олиб боради. Халқаро футбол федерацияси (ФИФА) бўлажак ўйинга расмийларни тайинлади.

Уммонлик ФИФА рефериси Аҳмад Абу Бакар Саид ал Кааф мазкур ўйинда бош ҳакам вазифасини бажаради. Унга қанотларда ҳамюртлари Ҳамид Сулаймон Марҳун ал Маҳайи ҳамда Абу Бакар Салим Маҳад ал Амри ёрдам беришади. Умар Муборак Мазаруа ал Ёқубий (Уммон) захира ҳаками сифатида ишлайди.

Ҳакамлар ишига малайзиялик Муҳаммад Солиҳ Субҳиддин баҳо беради. Учрашув комиссари этиб япониялик Каисе Томохиро тайинланди. Хавфсизлик бўйича офицер - Тара Сингх (Малайзия).

Эслатиб ўтамиз, Эрон - Ўзбекистон учрашуви 12 июнь (душанба) куни Теҳрондаги «Озоди» стадионида ўтказилади. Ўйин маҳаллий вақт билан соат 21:15 (Тошкент вақти билан 21:45)да бошланиши режалаштирилган.

Қуйида ушбу ҳакамнинг умумий профилига назар ташлаймиз:

Аҳмад Абу Бакар Саид ал Кааф 1983 йилда таваллуд топган. 2010 йилдан ФИФА рўйхатига киритилган. Осиё миқёсидаги мусобақаларга илк марта 2014 йилда ОФК кубоги орқали кириб келган.

Аҳмад ал Кааф Ўзбекистон олимпия терма жамоаси иштирокидаги ўйинда ишлаган. Мазкур воқеа 2016 йил 16 январда 23 ёшгача бўлган футболчилар ўртасидаги Осиё чемпионати гуруҳ босқичидаги Ўзбекистон (U-23) - Ироқ (U-23) баҳси(2:3)га тўғри келган. Қолаверса, бу ҳакам ОЧЛда ҳам клубларимиз иштирокидаги баҳсларда ишлаган.

Worldreferee.com веб-сайтида маълумот келтирилишича, у клублар ва терма жамоалар иштирокида 41та халқаро ўйинни бошқарган. Жами 12та пенальти белгилаб, футболчиларга 6та қизил ва 128та сариқ карточка кўрсатган. Йирик миқёсдаги мусобақаларда ҳозирча ишламаган.

Ўтган йил ноябрда бўлиб ўтган Қатар - Сурия баҳси давомида ҳар икки терма жамоанинг жисмоний жиҳатдан у қадар кучли бўлмаган футболчилари ўртасидаги тўқнашувларнинг олдини олишга кўп уринди.

Ўз ўрнида, мазкур баҳснинг 37-дақиқасида белгиланган пенальти ва унинг Ҳассан ал Ҳайдос томонидан қандай ижро этилгани билан боғлиқ саволларга тўхталсак. Аслида, бу ерда саволнинг ўзи йўқ. Шунчаки, Сурия термаси мезбонларнинг кучли қаршилигига дуч келишди. Прессинг борасидаги муаммолар сурияликларга гол уриш имконини бермади.

Ўйин давомида ҳакам ҳар бир вазиятни синчковлик билан кузатишга интилди. ЖЧ-2018 саралаши доирасида 6та баҳсда ишлади. Атиги 2та пенальти белгилади ва қизил карточка кўрсатмади. Ҳар икки жамоа аъзоларининг ижодкорлигига эркинлик беради, майдоннинг яккакурашлар кечаётган қисмига у қадар интилмайди, лекин вазиятни ҳам назардан қочирмайди.

Факт ўрнида. Айни пайт Уммондан 6 нафар бош ҳакам ФИФА реес­трига киритилган. Улар қуйидагилар: Абдул Боқи Ёқуб (2010), Аҳмад ал Кааф (2012), Умар ал Ёқуби (2013), Маҳмуд Салим Саид ал Мажарафи (2014), Холид Мархун Сулаймон ал Шақси (2015), Қосим Матар Али ал Ҳатми (2016). Бундан ташқари, 8 нафар ассистент ҳам ФИФА реестрига киритилган. Футзал ва пляж футболида эса бир нафардан ФИФА рефериси ишламоқда.

УММОНЛИК ҲАКАМЛАР ВА ЎЗБЕКИСТОН термаси

Worldreferee.com сайтида келтирилишича, 1996 йил декабрдан бошлаб миллий терма жамоамиз иштирокидаги 6та ўйинда уммонлик ҳакам ишлаган (бу борада энг кўп улуш БАА вакилларига тўғри келади - 16та учрашув). Улар орасида энг машҳури, шубҳасиз, ал Ҳилоли эди. Қуйида унинг терма жамоамиз билан боғлиқ ўйинларига тўхталиб ўтамиз.