Бугун Германиянинг Гамбург шаҳрида давом этётган бокс бўйича жаҳон чемпионатининг финал жанглари бўлиб ўтмоқда.

49 кг вазн тоифасида юртимиз шарафини ҳимоя қилаётган Ҳасанбой Дўсматов олтин медал учун кечган баҳсда кубалик Йоханис Аргелагосга қарши рингга кўтарилди.

Кескин ва муросасиз тарзда кечган баҳсда Рио олимпиадаси ва Тошкентда ўтган Осиё чемпионати ғолиби бўлган Ҳасанбой рақибига имконият қолдирмади. Аммо ҳакамларнинг фикри бошқачароқ бўлди. Жанг  давомида ўз устунлигини намойиш этган Ҳасанбой улар қарорига кўра 2:3 ҳисобида мағлуб бўлди ва ўз фаолиятида илк бор жаҳон чемпионатининг кумуш медалини қўлга киритди.

Шунингдек, 52 кг вазн тоифасида ўз жангларини ўтказаётган ҳамюртимиз Жасурбек Латипов финалда яна бир кубалик боксчи Ёсбани Веитиага қарши жанг ўтказди.

Ушбу баҳсда ҳакамлар бир овоздан кубалик боксчисининг ғалабасини қайд этишди.

Шу тариқа 25 ёшли боксчи фаолиятида иккинчи бор жаҳон чемпионатининг кумуш медалларига эга чиқди. 2013 йил Олматада ўтган ЖЧда ҳам Латипов хал қилувчи баҳсда мағлуб бўлган эди.

Эслатиб ўтамиз, бундан бироз олдин 49 кг вазн тоифасида юртимиз шарафини  ҳимоя қилаётган Ҳасанбой Дўсматов кубалик Ёханис Аргелагосга ҳакамлар хулосасига кўра 2:3 ҳисобида мағлуб  бўлган эди.

Биздан узоқлашманг, боксчиларимиздан Иқболжон Холдоров ва Шаҳрам Ғиёсовлар ҳам бироздан сўнг финал баҳсида рингга чиқишади.