ЖЧ–2018 турнирига саралаш босқичи “А” гуруҳи 10-туридан ўрин олган Ўзбекистон – Жанубий Корея учрашуви олдидан ўтказилган матбуот анжуманида кореяликлар устози Шин Тэ Йонг ва Сон Хён Мин қатнашди.

“Даставвал Ўзбекистон Футбол Федерациясига миннатдорлик билдирмоқчиман. Уларнинг ёрдами билан яхши меҳмонхонага жойлашдик, барча шароитлар қониқарли. Кундузи бироз иссиқ, аммо кечаси салқин ва бизга барчаси маъқул.

Ўзбекистон термасининг сафарда Хитойга қарши ўйин натижасини муҳокама қила олмайман. Биз ҳозирча бўлажак ўйин ҳақида ўйлаяпмиз. Жанубий Корея терма жамоаси фақат ғалаба учун майдонга тушади. Бир плей-офф ҳақида ўйлаётганимиз йўқ. Жанубий Кореяда гуруҳдаги бошқа жамоалардан кўра ЖЧга чиқиш имконияти яхшироқ.

Самвел Бабаянни ҳурмат қилама, у билан муносатимиз яхши. Қатарда бўлиб ўтган Осиё чемпионатида олимпия терма жамоаларини бошқарганмиз. Ўшанда битта меҳмонхонада турганмиз ва бир-биримизга қарши ўйнаганмиз. Унга бўлган ҳурматим баланд”, – деди Шин Тэ Йонг.

“Ўзбекистонга қарши бир нечта ўйинда майднга тушганман. Менда тажриба етарли. Жамоада муҳит яхши, ҳамма мураббийни ҳурмат қилади ва унга қулоқ солмоқда. Эртага барча футболчилар ғалаба учун майдонга тушади. Ўзбекистонга қарши барча ўйинлар оғир кечган ва бу сафар ҳам осон бўлмайди”, – деб ўз фикрини билдирди Сон Хён Мин.

Эслатиб ўтамиз, Ўзбекистон – Жанубий Корея учрашуви эртага, 5 сентябрь куни Тошкентдаги “Бунёдкор” стадионида бўлиб ўтади. Ўйин маҳаллий вақт билан соат 20:00 да бошланади.