Бельгия термаси Италия «А» сериясидаги энг яхши хавбеклардан бирини четга сурган бўлсада, ЖЧ-2018 йўлланмасини ютган Европанинг илк жамоасига айланди.

Тўғри, «қизил иблислар» устози Роберто Мартинес бу ҳолатни оддий изоҳлади: «Ража Наингголанни чақирмаганим қандайдир можарога боғлиқ эмас.

Шунчаки, бу сафар бошқа йигитларга имконият беришни лозим кўрдим».  Айтганча, аввалроқ Аксель Витцель ва Юри Тилеманс ҳам Бельгия термасида шунга ўхшаш воқеалар марказига тушишганди.

Ража Наингголан шу муносабат ўлароқ, яъни Греция ва Босния термаларига қарши ўйинларга чақирилмаганидан сўнг халқаро фаолиятини тугатиб қўя қолди. Аммо хайрлашув ҳамма кутган даражада бўлмади. Футболчи барчасига нафрати яширинган номақбул сўзларни айтиш асносида нуқта қўйди.

У журналистлар билан мулоқотда меъёрни бузганини кейинроқ тушунгандир, аммо шу орқали терма жамоадан ўз хоҳиши билан кетмаётганини билинтирди. Нима бўлганда ҳам, Ража энди Роберто Мартинес бошқарувида бош­қа ўйнамаса керак.

Бир қарашда, мураббий ҳам футболчининг бундай кескин қароридан ортиқча хавотирга тушмаётгандек. Йўқ, бунда гап Наингголан савияси ёки жамоа услубига мос келиш-келмаслигида ҳам эмас. Шунчаки, Мартинес уни унча  ёқтирмасди.

Дейлик, испан мутахассиси Бельгия термаси бошқарувини қўлга олгани ҳамоно Наингголан олдига тақиқ қўйганди. Аниқроғи, чекишни зудлик билан ташлашини талаб қилди.

Гап шундаки, Бельгия термасида биргина Ража чекарди ва буни ҳамма биларди. Футболчининг ушбу ёмон иллати етарлича муҳокама ҳам қилинган. Дейлик, аввалги бош мураббий Марк Вильмотс ҳам бундан хабардор эди, аммо бепарво қаради, шекилли. Яъни у «Наингголаннинг шахсий ҳаётига аралашиш ноўрин» қабилида иш тутди.

Наингголаннинг майдон бўйлаб қандай югуришини кўрганмисиз? Бир қарашда, у рақибга бироз имкон бериш учунгина чекадигандек. Акс ҳолда, уни тўхтатишнинг иложи топилмасми-ди?

Мана, Мартинес бу масалага бошқача ёндашди. Ҳар ҳолда, Наингголаннинг чекиши бошқаларга салбий таъсир қилиши мумкин. Бу бошланиши эди. Ҳаммаси шу даражага бордики, Мартинес охирги йиғинда Ражани четга суришдан ўзга чора тополмади. Қолаверса, бошқа жиҳатлар ҳам йўқ эмасди:

1. Бельгия термасининг июнь ойидаги учрашувларида Наингголан тўла тайёр эмасдек кўринди;

2. Ража Эстония термасига қарши ўйин олдидан ўтказилган машғулотга кечикди. У лифт кутиб, 37 сония (!) ушланиб қолганди. Умуман, ўшанда бошқа футболчилар ҳам вақтида етиб келишмаганди.

3. Жаҳл отига минган Наингголан бор заҳрини соча бошлади ва Юри Тилеманс ҳамда Аксель Витцелни мисол сифатида кўрсатди: «Қаранг, мураббий «Монако» ўриндиғини «иситаётган» Тилемансни чақиряпти. Ваҳоланки, у термага келгач, фақат топ-чемпионатларда ўйнайдиган йигитларга ишонч билдиришини айтганди. Энди эса узоқ Хитойда тўп сураётган Витцелни ҳам безовта қиляпти. Қисқаси, ўз қоидасига зид иш тутяпти».

4. Дунё қанчалар тор-а... Мартинес ва Наингголан таътил чоғи Ибицадаги ресторанда кўришиб қолишди. Бироқ испан мутахассиси Ража билан на саломлашди ва на хайрлашди.

Ошкора ёқтирмаслик, майда-чуйда хатоларга ҳам «осилавериш»... Кўринишидан, Мартинес ўзини катта обрў эгасидек ҳис қилмаяпти, чоғи. Ҳурмат даражасини эса жазо чораларини кучайтириш асносида оширмоқчидек. Наингголан тарихи, яъни мураббий қаҳрига учраш қандай оқибатларга олиб келиши мумкинлиги бошқа футболчилар учун ўзига хос дарсми?

Аслида ҳаммасига биринчи навбатда, Наингголаннинг ўзи айбдор. У шу даражада яхшики, журналистлар йиғинга чақирилмаганини дарров пайқашди. Табиийки, Ражанинг термада йўқлиги кўплаб саволларни келтириб чиқарди, Мартинес эса тўғри жавобдан қочди.

Унинг «Термага чақирилиш учун ўйинчи мени ҳайратда қолдириши керак» қабилидаги гаплари нимани англатади? Наингголан - «А» сериясидаги энг яхши икки ярим ҳимоячидан бири.

Дунёда эса энг яхшилар сафида. У гол уради, тўпни олиб қўяди, ўйинни «ёндиради». Ража ҳаттоки, оловли «Рома»да ҳам энг ёрқин олов... Эътиборсизлик ҳақидаги «қўшиқ»лар, талаблар ва бошқа баҳоналар эса тўғри жавобдан қочишдир. Қолаверса, Бельгия термаси ўрта чизиғида Наингголан даражасида тўп сурадиган яна бир футболчи бор, холос - Кевин де Брюйне. Аммо бу ҳол мураббийни хавотирга солмаяпти. Нима дердик, у Маруан Феллайни ўйинидан ҳайратланаверсин.

Хуллас, ҳаммаси жуда оддий: Мартинесга Наингголан шунчаки, ёқмаяпти. Ёқиши ҳам амри-маҳол. Мураббий Ражани кўчада учратиб қолганида, шарфига янада маҳкамроқ ўралганча саломлашмай ўтиб кетиши аниқ.

Ахир унга кунига 5 дона сигарета чекадиган, оқшом пайти  тунги клубларда кўнгилхушлик қилувчи индонезиялик йигит қанақасига ёқсин? Л

учано Спаллетти вақтида Наингголан ҳар нарсага қодирлигини айтганди. У ошириб юбормаганди, албатта. Ҳа, Ража чекади, аммо унинг тезлигига ҳаттоки, ўша Н~Голе Канте ҳам ҳавас билан боқади.

Ҳа, у тунги клубларга боради, аммо эртасига майдонга тушиб, гол уришни ҳам уддалайди. Хуллас, Наингголан чиндан ҳам, кўп нарсага қодир. Шундай йигит жаҳон чемпионатида иштирок этмаса, футболчидан кўра, Бельгия термаси кўпроқ йўқотмасмикан?

Нима дердик, Марнитеснинг муносабати бироз ўзгарса ва футболчи ҳам чекишни ташласа эди, келаси ёз мухлислар ажойиб ижрочи ҳаракатларидан ўзгача завқ олишлари мумкин.

Бундан ЖЧга йўл очишга улгурган Бельгия термаси ва Ража Наингголан бирдек манфаатдор бўлиши тайин. Муҳими, иқтидорли футболчи шу баҳона ёмон иллатдан қутуларди, Мартинес эса характери оғир йигитни тўғри йўлга солганидан ғурурланиб юрарди...