Килиан Мбаппе Париж атрофидаги номаълум академия тарбияланувчиси ва чинакам юлдуз мақоми ўртасидаги масофани ўта қисқа вақтда босиб ўтди.

Мана, ҳозир ҳамманинг эътибори шу 18 ёшли йигитчада, у барча-барчанинг тилида. Бонди Франция пойтахтига туташ бошқа шаҳарчалардан айтарли фарқ қилмайди.

Бутун тарихда у ердан атиги икки машҳур шахс чиққан. Биринчиси - ҳукуматни Шарль де Голль бошқарган даврда Франция Маданият вазири лавозимида ишлаган Андре Мальро. Иккинчиси - айнан Килиан Мбаппе.

**************

Хуллас, Бондининг ҳозирги ғурури - футбол вакили. Аслида Килиан ажиб юришини Париж билан чегарадош шаҳарчада сокингина бошлаган.

Расмий жиҳатдан олсак, Килиан оиланинг ягона фарзанди бўлган, аммо ўгай акаси Жирес Кембо-Экоко билан бирга улғайган. Ўша вақт Конгода фуқаролар уруши борарди, хунрезликлар оқибатида Жирес етим қолади ва қаровсиз йигитчани Францияга юборишади. Хуллас, кейинчалик конголик бўлажак футболчини Мбаппелар оиласи ўз қарамоғига олади

. «Жирес билан бошиданоқ муаммосиз дўстлашганмиз. Ўртамизда ҳақиқий ака-укаларча муносабат шакл-ланган ва ҳозиргача бир-биримизни қўллаб-қувватлаб келяпмиз», - дейди Килиан тутинган акаси ҳақида. Оддий айтганда, у ота-онасига ўгай акаси устидан бирор марта шикоят қилмаган.

Аксинча, Жирес бегона эканлигини ҳис этмаслиги учун уни доимо ўзига яқин олишга уринган. Табиийки, Кембо-Экоконинг профессионал футболчи сифатида ном қозонганида оилавий муҳитнинг таъсири ҳам бор, албатта.

Маълумот учун айтиш керак, асли конголик йигит кейинчалик «Ренн» билан шартнома тузиб, клубда 7 йил давомида ҳужумкор ярим ҳимоячи вазифасини муносиб бажарди.

**************

Килианнинг акаси ортидан бориб, футболчи бўлиши эрта кундаёқ ойдинлашганди. «Кўп йиллардан буён «Бонди»да болалар мураббийи сифатида ишлайман, аммо гоҳида Килиан билан гаплашишда қийналаман.

Ахир унга қўйиб берсангиз, ҳафтасига 7 кун 24 соат давомида тинмай футбол ҳақида гапиради, ўйлайди. Дейлик, машғулотлар тугагани ҳамоно ҳаммадан олдин кийинарди ва имкон борича кўпроқ ўйин томоша қилиш учун уйга шошарди», - дея эслайди Килианнинг отаси Вильфрид. Тушунарлики, кичик Мбаппе мактабда жисмоний тарбия дарсига алоҳида меҳр берган.

Бошқа фанларга эса юзаки қараб, бутун дарс давомида дафтарига клуб рамзлари, машҳур футболчилар суратини чизиб ўтирган ёки дераза ойнасига термулганча буюк ўйинчи бўлиш ҳақида хаёл суришдан чарчамаган.

Ҳар ҳолда, дарсга эътиборсизлиги туфайли ўқитувчилардан ҳар доим дакки эшитарди. Муҳими, ота-онаси унинг футболга муносабатини тўлиқ қўллаб-қувватлашади. 2011 йилга келиб, кичик Мбаппени «Клерфонтен» академиясига чорлашади.

Бу маскан футбол оламига Вильям Галлас, Хатем Бен Арфа, Блез Матюиди, Николя Анелька ва Тьерри Анри каби ижрочиларни тортиқ этгани билан машҳур. Килиан буни биларди, зеро, франциялик таниқли футболчиларга асло бефарқ қарамасди. Қисқаси, янги жойда унинг қизиқишию, иштиёқи янада кучаяди.

«Айниқса, Роналдунинг «Ре-ал»даги ўйинларидан ўзгача ҳайратланардим. Унинг сурати босилган журнални кўрсам, дарҳол сотиб олардим ва уйга қайтиб, хонам деворидаги кўргазмани бойитардим. Яширмайман, девор Криштиану постерлари билан баланд», - дея хотирлаганди Килиан бир сафар кулимсираб.

**************

Ёш йигитнинг ўйини гўёки, чақмоқ тезлигида ривожланди. Килиан айрим ўйинларда дриблинг салоҳиятини тўлиқ ишга солиб, рақибнинг деярли барча аъзоларини ёлғиз ўзи четга суриб қўярди. Ёз кунларидан бирида болакай ўз олдига кимсан Зайниддин Зидан келаётгани ҳақидаги ақлга сиғмас хабарни эшитади. Килиан ўша кунни шундай эслайди:

«Ўзаро учрашувимизни ҳеч қачон эсдан чиқармайман! Югуриб борсам, Зайниддин уйимиз остонасида турибди, кейин менга яқинлашиб, самимий чеҳра билан қўлини узатди.

Тасаввур қилинг, бош кумирим рўпарамда туриб, мени «Реал»га чорласа-я... Тўғриси, бир оғиз ҳам гапиролмагандим, ўрнимга отам - Вильфрид ва онам - Файза музокара олиб боришган».

Хуллас, йигитчанинг кейинги тақдири оилавий кенгашда ҳал қилинади. Умумий хулоса - «Килианнинг «Реал» либосини кийишига ҳали эрта». Бу қарор Зиданга ёқмаган бўлсада, футболчининг ўзи уни жимгина қабул қилади.

**************

Орадан ҳеч қанча вақт ўтмай, болакайнинг ота-онасини «Монако» вакиллари безовта қила бошлайдилар. Ўша вақт «монегасклар» эндигина Лига 1га қайтишган ва барча йўналишларда, хусусан, ёшлар билан ишлаш тизими бўйича ҳам кенг кўламли ислоҳотларга қўл уришганди.

«Монако»га ўтиш менга қўшимча иштиёқ бағишлайди. Қолаверса, бу трансфер таҳсил олиш бобида ҳам қўл келади» - бироз улғайган Мбаппе футболдаги илк жиддий қадамини шундай изоҳлаганди. Ушбу трансфер аввалига ҳеч кимнинг эътиборига тушмайди ҳам.

Зеро, йигитча янги клубда ўзини анча камтарин тутиб, маълум вақт «Монако-2»да ўйнаш асносида катта футболга ўтиш тадоригини кўради.

Килианнинг чақнаши эса мутлақо кутилмаган ҳолатда рўй берди. Шу йилнинг январида ҳам кенг жамоатчилик учун нотаниш саналган йигитча «Мец» билан учрашувда бирданига «хет-трик» қайд этди. Унинг вазиятлардан совуққонлик билан фойдаланишию, қанот бўйлаб чақмоқдек учиши барчани ҳайрат кўчасига етаклади.

Аслида Леонарду Жардим ёш футболчига шунчаки, ўринбосар сифатида қараган бўлса, ажабмас. Аммо Килиан яна 2та шунга ўхшаш ўйини билан мураббий режасини буткул ўзгартирди. ЧЛда «Манчестер Сити»га қарши кечган ўйинлар эса бутун Европада Мбаппе эффекти ҳақида гапирилишини тақозо этди.

Ахир асосан шу нотаниш болакай ижросидаги  сеҳрли ҳаракатлар ва голлар натижасида жаҳоннинг энг бой клуби шунчаки, курашдан четга чиқди. «Килиан ўйинига қараганим заҳоти хаёлимга Тьерри Анри келяпти» - йигитчани мақташдан тийилмаган Арсен Венгер «Монако»га ҳужумчи учун бирданига 100 млн. евро таклиф этди.

Бироқ Мбаппенинг ўзи бошқача вариант ҳақида ўйларди: «Олдимда икки йўл бор - «Реал»га кетиш ёки «Монако»да қолиш». Бу гапи 7 июнь куни янграганди, аммо орадан 2,5 ой ўтсада, «Мадрид» трансфер масаласини ҳал қилолмади.

**************

Килиан бу оралиқда «Роллан Гаррос» турнирига борди - ҳақиқий юлдуздек:

«Ўйлашимча, Надаль ғалаба қозонади, бироқ шахсан мен Жо-Вильфрид Цонг ютиши тарафдориман ва унга мухлислик қиламан. Биринчидан, у отамнинг адаши, иккинчидан, тенниснинг тажовузкор услубини ёқтираман. Қолаверса, Цонг билан ватандошмиз. Умидворманки, якунда ундан дастхат оламан».

Килианнинг бу гапларини эшитган франциялик теннисчи футболчи билан учрашиб, ўзаро дастхат ҳамда эсдалик совғалари алмашди.

«Ҳа, менда ҳали ҳайдовчилик гувоҳномаси йўқ. Шунинг учун машғулотларга онам ёки клуб томонидан ажратилган ҳайдовчи элтиб қўяди. Кимдир ўсиш бобида ёшимдан ўзим кетганимни айтиши мумкин. Аслида эса ҳали 18 ёшли оддий болакайман», - деганди Мбаппе май ойида.

Яна бир неча ойдан кейин янги мавсум бошланди, аммо Леонарду Жардим ёш иқтидорни ҳаттоки, захирага ҳам қўшишни истамади. Айтишларича, мураббийга футболчи атрофидаги воқеалар, унинг молиявий талаблари сира ёқмаган экан.

Зеро, улар «Монако» учун оғирлик қиларди. Якунда «Арсенал»нинг Килиан билан келишишга яна бир уриниши самара бермади, «ПСЖ» раҳбарлари эса уни ўз томонларига оғдириш йўлини топишди.

«Монако» мухлислари энди Мбаппенинг юлдузлик касалига чалинганини таъкидлаётган бўлсалар, кеча у билан ёнма-ён туриб тўп сурган Жоао Моутиньо бундай фикрларга қарши чиқяпти:

«Ҳа, Килиан машғулотларда анча қўпол ва сурбет бўлиб қолганди. Аммо бу унинг ёшида табиий ҳолат. Муҳими, Мбаппенинг ҳам  ёшлар, ҳам фахрийларга нисбатан муносабатда чегарадан ўтиб кетганини бирор марта кўрганим йўқ».

Йигитчанинг «ПСЖ»да ҳам барчасини дадил бошлагани ҳаммага аён. Демак, ўз тарихининг навбатдаги саҳифасига ҳам ёрқин ранглар билан жило беришига ишонч катта.

А.АҲМЕДОВ тайёрлади