Тўртинчи олтин бутса – ёхуд Лионель Мессига аталган оқшом ҳақида

28.11.2017 00:14

1724

Тўртинчи олтин бутса – ёхуд Лионель Мессига аталган оқшом ҳақида

Лионель Месси фаолияти давомида 4-марта «Олтин бутса»ни қабул қилиб олди.

Маълумот учун айтиш керак, AIPS (Европа спорт нашрлари ассосиацияси) томонидан таъсис этилган ушбу соврин «кўҳна қитъа»даги миллий чемпионатларнинг бош тўпурарига топширилади.

Хуллас, Барселонада ташкиллаштирилган навбатдаги тантанали маросимда евромавсум-2016|2017нинг энг яхши голеадори тақдирланди.

Маросим жойи

Биласиз, Месси етакчилигидаги «Барселона» ўтган мавсум асосий совринлардан қуруқ қолди. Яъни Испания чемпионати ва ЧЛда мақсадга эришолмай, мамлакат кубоги билан кифояланди.

Шунга қарамай, аргентиналик юлдуз индивидуал мукофотга яраша иш бажарди - примерода 37та гол уриб, Европа миллий чемпионатлари бош тўпурари бўлди («Олтин бутса»-2016 Католония клубининг яна бир голеадори Луис Суарес мулкига айланганди).

Аслида «ПСЖ» вакили Эдинсон Кавани ҳам мавсум давомида рақиблар дарвозасини 37 марта ишғол қилди, бироқ Ла-лига ва Лига 1да урилган голлар турлича коэффициентга эгалиги сабаб, уругвайлик ҳужумчи совринсиз қолди.

Оддий айтганда, Мессининг битта голига 2 очко берилди, Каваникига эса 1,5 очко. Тантанавор тақдирлаш маросими 24 ноябрь куни эски пиво заводи биносида ташкиллаштирилди.

Бу ер бутун ХХ аср мобайнида Испаниянинг машҳур лагерига хизмат қилган. 1992 йили эса бино қайта таъмирланган ва эндиликда унинг таркибида музей, шунингдек, оммавий ва маданий тадбирлар учун мўлжалланган катта зал бор.

«Унинг бутсалари - голлар туғилиши»

Тақдирлаш маросимида журналистлардан ташқари, Мессининг клубдошлари - Луис Суарес, Андрес Иньеста ва Серхио Бускетс ҳам ҳозир бўлишди.

Биринчи қатордан эса «Барселона» президенти Хосеп Бартомеу, Marca нашри директори Хуан Игнасио Гальярдо, футболчининг умр йўлдоши Антонелла Рокуццо ҳамда тўнғич ўғли - Тьяго жой олишди.

Маросимни Гальярдо очиб берди: «Месси ҳақида янги гап айтиш қийин - барчаси айтилган, ёзилган, ҳаммага маълум. Кимдир ўзгача бир таъриф ўйлаб топгунича Лео жамоадошини самарали узатма билан таъминлайди.

Бошқа биров энди навбатдаги мақтовни йўллашга киришганида, у уч нафар рақибини алдаб ўтади. Бу нутқ матбуотга чиқишига қадар эса Месси ўзи учун одатий шедевр гол уришга улгуради.

Хуллас, унинг бутсалари - футболнинг асл моҳияти, унинг табиати ва илк асоси. Оддий айтсак, голлар ва яна голлар».

Лео мукофотни ўтган йилги лауреат ва яқин дўсти Луис Суарес қўлидан қабул қилиб олди. «Месси ҳар бир ўйинда ақлга сиғмас ишларни уддалайди», - дея мақтади уругвайлик ҳужумчи клубдошини.

Аргентиналик даҳоча эса бунга оддий ва камтарона жавоб қайтарди: «Индивидуал соврин - бу жамоавий ишлар самараси. Агар жамоадошларим яхши ишламаганларида, шунча гол уролмасдим».

«Олтин юрак»

Аслида Месси учун «Олтин бутса» навбатдаги соврин эмас. Чунки бу мукофот топширилишидан олдин Леога «Олтин юрак» (болалардаги онкологик хасталикларга қарши кураш тимсоли) тақдим этилди.

Чунончи, Месси бошқараётган хайрия жамғармаси бу борада кўплаб лойиҳаларни амалга татбиқ қиляпти. Хусусан, Барселонада жойлашган болалар онкомаркази - San Joan de Deu билан яқин ҳамкорлик ўрнатилган.

«Муҳтожларга ёрдам қўлини чўзиш ғоят муҳим, - деди футболчи рамзий совринни кичик болакай қўлидан қабул қилиб. - Қодир эканман, ёрдам беришда давом этаман ва бундан қалбим таскин топади».

Болалар ҳам буни билишади, ҳис қилишади, Лео. Майдонда ҳам, унинг ташқарисида ҳам шундай ёрқин шахс бўлиб юравер...

Европа миллий чемпионатлари (мавсум-2016|2017)нинг энг яшхи тўпурарлари

Т\|р.	Футболчи (клуби)	Чемпионат	Гол	Очко (коэф.)
1	Лионель Месси («Барселона»)	Испания	37та	74 балл (2,0)
2	Бас Дост («Спортинг»)	Португалия	34та	68 балл (2,0)
3	Пьер-Эмерик Обамеянг («Боруссия Д.»)	Германия	31та	62 балл (2,0)
4	Роберт Левандовски («Бавария»)	Германия	30та	60 балл (2,0)
5	Луис Суарес («Барселона»)	Испания	29та	58 балл (2,0)
5-7	Харри Кейн («Тоттенхэм»)	Англия	29та	58 балл (2,0)
5-7	Эдин Жеко («Рома»)	Италия	29та	58 балл (2,0)
8	Дрис Мертенс («Наполи»)	Италия	28та	56 балл (2,0)
9	Эдинсон Кавани («ПСЖ»)	Франция	35та	52,5 балл (1,5)
10-13	Криштиану Роналду («Реал»)	Испания	25та	50 балл (2,0)
10-13	Антони Модест («Кёльн»)	Германия	25та	50 балл (2,0)
11-13	Андреа Белотти («Торино»)	Италия	25та	50 балл (2,0)
11-13	Ромелу Лукаку («Эвертон»)	Англия	25та	50 балл (2,0)

«Олтин бутса»нинг барча соҳиблари

Мавсум	Футболчи (клуби)	Чемпионат	Гол (балл)
1996\|1997	Роналдо («Барселона»)	Испания	34та (68)
1997\|1998	Никос Махлас («Витесс»)	Голландия	34та (68)
1998\|1999	Марио Жардел («Порту»)	Португалия	36та (72)
1999\|2000	Кевин Филлипс («Сандерленд»)	Англия	30та (60)
2000\|2001	Хенрик Ларссон («Селтик»)	Шотландия	35та (52,5)
2001\|2002	Марио Жардел («Спортинг»)	Португалия	42та (84)
2002\|2003	Рой Макаай («Депортиво»)	Испания	29та (58)
2003\|2004	Тьерри Анри («Арсенал»)	Англия	30та (60)
2004\|2005	Тьерри Анри («Арсенал»), Диего Форлан («Вильярреал»)	Англия Испания	25та (50)
2005\|2006	Лука Тони («Фиорентина»)	Италия	31та (62)
2006\|2007	Франческо Тотти («Рома»)	Италия	26та (52)
2007\|2008	Криштиану Роналду («МЮ»)	Англия	31та (62)
2008\|2009	Диего Форлан («Атлетико»)	Испания	32та (64)
2009\|2010	Лионель Месси («Барселона»)	Испания	34та (68)
2010\|2011	Криштиану Роналду («Реал»)	Испания	40та (80)
2011\|2012	Лионель Месси («Барселона»)	Испания	50та (100)
2012\|2013	Лионель Месси («Барселона»)	Испания	46та (92)
2013\|2014	Луис Суарес («Ливерпуль»), Криштиану Роналду («Реал»)	Англия Испания	31та (62)
2014\|2015	Криштиану Роналду («Реал»)	Испания	48та (96)
2015\|2016	Луис Суарес («Барселона»)	Испания	40та (80)
2016\|2017	Лионель Месси («Барселона»)	Испания	37та (74)