Халқаро футбол уюшмаси ғоясига кўра, Клублар ўртасидаги жаҳон чемпионати турнири мутлақо бошқа савияга олиб чиқилади.

Хабарингиз бордир, охирги вақтларда терма жамоалар иштирокидаги Конфедерациялар кубоги мусобақаси ўрнини клублар миқёсидаги янги турнир эгаллаши бот-бот айтилмоқда.

Норасмий равишда Super Club World Cup сифатида таърифланаётган мусобақа лойиҳаси қандай? Испаниянинг Marca нашри эҳтимолий вариантлардан бири ҳақида маълумот берди.

Формат. Лойиҳага мувофиқ, янги турнирда 5та конфедерациянинг 24та жамоаси иштирок этади. Улардан 8та гуруҳ шакллантирилади.

Хуллас, илк раунд 3тадан жамоани ўз ичига олган 8та гуруҳда олиб борилади. Якунда трио ғолиблари чорак финалга йўл олади. Демак, чемпион 3та «плей-офф» босқичи орқали аниқланади.

Муддат. Тахмин қилинишича, биринчи жаҳон Чемпионлар Лигаси 2021 йилнинг ёзида ташкиллаштирилади. Асосийси, янги турнир худди Конфедерациялар кубоги каби ҳар 4 йилда бир марта ўтказилади.

Иштирокчилар кўпи билан 5 марта майдонга тушишади (тўғрироғи, финал йўли 5та ўйинни ўз ичига олади). Шундай экан, мусобақа 20 кунга чўзилади.

Жой. Янги турнир ҳар сафар миллий жамоалар ўртасидаги кейинги жаҳон чемпионатига мезбонлик қилувчи мамлакат ҳудудида ўтказилади. Биргина истисто бор - дебют турнир.

Зеро, ЖЧ-2022 ўйинлари Қатарда ташкиллаштирилади, бироқ бу мамлакатда ёз фаслида ўйнаш имконсиз - ҳаво жуда иссиқ бўлади. Қисқаси, биринчи турнирни Хитойга топшириш эҳтимоли йўқ эмас.

Иштирокчилар. Лойиҳага кўра, илк турнирга Европадан 12та клуб таклиф этилади: ЧЛнинг охирги 4та ғолиби ва финалчиси, шунингдек, УЕФА клублар коэффициенти бўйича энг яхши кўрсаткичга эга яна 4та жамоа.

Ҳозирги ҳолат асосида айтсак, янги турнир йўлланмалари қуйидаги клубларга насиб этарди: «Реал», «Барселона», «Атлетико», «Ювентус», «Бавария», «ПСЖ», «Севилья», «Манчестер Сити», «Боруссия» Д., «Бенфика», «Арсенал» ва «Порту».

Жанубий Америкадан эса Либертадорес кубоги соҳиби ҳамда рейтингга кўра, энг яхши клублар иштирок этарди: «Атлетико Насьональ», «Ривер Плейт», «Сан-Лоренсо», «Атлетику Минейру» ва «Бока Хуниорс».

Шунингдек, турнирга Африкадан «Видад Касабланка» ва «Мамелоди Сандаунс», Осиёдан «Урава Редс Даймондс» ва «Чонбук Моторс», Шимолий Америкадан «Пачука» ва «Америка», Океаниядан эса «Окленд Сити» жамоалари йўл оларди.

Ҳ.АТАВУЛЛАЕВ тайёрлади