Қайднома

Қидирув

ЕЧЛ сари олға! Ёхуд АПЛда шов-шув кўтараётган клуб ҳақида

ЕЧЛ сари олға! Ёхуд АПЛда шов-шув кўтараётган клуб ҳақида

  31.12.2017 06:31
  0
  642
ЕЧЛ сари олға! Ёхуд АПЛда шов-шув кўтараётган клуб ҳақида

Бу жамоани Мадриднинг «Реал»ига ўхшатишмоқда, таркибида эса Европанинг энг яхши дарвозабонларидан бири тўп суради.

Гап Англия премьер-лигасининг жорий мавсумини кўтаринки кайфиятда ўтказаётган «Бёрнли» ҳақида боряпти.

Бу қандай клуб?

Ҳозирча «Бёрнли» ва «Реал»ни фақат очколар бўйича солиштириш мумкин. «Қироллик клуби» 31 очко билан Ла Лигада 4-ўринни эгаллаб турган бўлса, туманли ўлка жамоаси АПЛда 32 очко тўплаган ҳолда 6-ўринда бормоқда.

Демак, ҳар икки клуб келгуси мавсум Чемпионлар Лигаси йўлланмасини тақдим этадиган поғоналар учун курашиш имкониятига эгалар. Фарқи шундаки, «Реал»­нинг эгаллаб турган ўрни ўзи учун омадсиз саналса, «Бёрнли» ўз иштироки билан премьер-лигани лол қолдирмоқда.

Ҳар ҳолда номи чиққан етакчиларни ортда қолдириш осонмас. Айни пайт бу жамоани эртакнамо ғалабаларга эришган «Лестер»га қиёслашмоқда. Тўғри, «тулкилар»нинг муваффақиятини такрорлашга «Манчестер Сити» йўл қўймайди, аммо барибир, «Бёрнли»нинг ўйини одатий тенденциялардан чалғишга ундамоқда.

Таркибда юлдуз борми?

Ник Поп - WhoScored портали тал­қинига кўра, Европанинг энг яхши дарвозабони. Статистиклар унга 7,2 балл беришди. Ваҳоланки, сиз ушбу кипер ҳақида эшитмаган бўлишингиз мумкин.

Поп «Бёрнли»га 2016 йили «Чарльтон»дан ўтган. У авалги мавсум Ибрагимовичнинг кучли зарбаларини қайтарган Том Хитоннинг соясида қолиб кетаётганди. Чемпионат бошида Хитон жароҳат олгач, Попда ўзини кўрсатиш учун ажойиб имконият туғилди.

Дастлабки 14та баҳсда дарвозасидан атиги 8та тўп олиб чиқди. Еттита ўйинни «қуруқ» ўтказди. Айни пайт унинг трансфер баҳоси 1 миллион еврога баҳоланмоқда.

Қайси мураббий шуғуллантиради?

Шон Дайч 2012 йилдан буён «Бёрн­ли»ни бошқариб келмоқда. У 45 минг фунтлик соат тақиши билан АПЛ мураббийлари орасида ажралиб туради, ушбу мутахассис «Бёрнли» билан кўплаб қизиқ даврларни бошдан кечирди.

Мисол учун, аввалги сафар жамоа премьер-лигани тарк этганида, Дайчни ишдан бўшатишмади. У клубни элитага қайтариб, кейинчалик «Эвертон»дан тушган таклифга рад жавобини берди.

Айни пайт эса «Бёрнли»ни ЕЧЛ сари етакламоқда. Иан Райт бу мураббийни Арсен Венгернинг «Арсенал»даги вориси деб атади. Дарҳақиқат, Шоннинг «канонирлар»ни севимли тўртинчи ўринга олиб чиқиши, шубҳасиз.

Асосий ўйин

Янги мавсум стартида «Бёрнли» кутилмаганда «Челси»ни мағлубиятга учратди. Қизиғи, бу ишни жуда чиройли тарзда амалга оширди. 43-дақиқага келиб, Дайч жамоаси рақиб майдонида 3:0 ҳисобида олдинда бораётганди.

Лондонликлар жавоб тариқасида иккита тўп киритишди, холос ва учрашувни 9 киши бўлиб тугатишди: ҳакам «Челси»нинг икки футболчисини четлатди. Ўшанда «Бёрнли»нинг ўйинини шов-шувга йўйишганди, аммо кўп ўтмай ҳаммаси одатий ҳолга айланди.

«Мен Гордограддаги энг такаббур одамман! Биз жамоамиз мавсумни муносиб ўтказиши учун кўп ишладик. Энди эса тер тўкишда давом этиш керак. Ишончим комилки, ўсишдан тўхтамаймиз», - деди Дайч ҳозирги жараёнга изоҳ бераркан.

Қандай даромад орттиришади?

«Бёрнли» бундан ҳам кучлироқ бўлиши мумкин эди. Ўтган мавсум ҳимоя чизиғида Майкл Кин тўп сурганди. Уни «Манчестер Юнайтед» ортга қайтаришга уринди, бироқ «Бёрнли» Кинни «Эвертон»га сотди. Трансфер суммаси барча бонусларни қўшиб ҳисоблаганда 30 миллион фунтга етди.

Ҳозир унинг ўрнида Жеймс Тарковски ўйнаяпти. WhoScored портали ушбу ҳимоячига 7,5 рейтинг балли қўйиб, уни Европанинг энг яхши мудофаа чизиғи вакиллари рўйхатида қайд этди. Ўтган мавсум Жеймс деярли барча учрашувларни захира ўриндиғида ўтказганди.

Бу ҳолат қанча давом этади?

«Бёрнли»ни олдинда даҳшатли тақвим кутиб турибди. «Брайтон» билан ўйинда ҳисоб очилмади, «Хаддерсфилд»га қарши баҳсда уч очкога умид боғласа бўлади.

Аммо «Манчестер Юнайтед», «Тоттенхэм» ва «Ливерпуль» билан ўйинларда Дайч шогирдларини ҳақиқий синовлар кутиб тургани аниқ. Айнан шу учрашувлардан сўнг «Бёрнли»нинг келажаги ҳақида тайинли фикр билдириш мумкин. Тўртинчи ўрин учун курашда топ-клублар уларга етарлича қаршилик кўрсатиши турган гап.

Мабодо, жамоа январда 7-поғонага тушиб кетса ҳам мавсумнинг ярмини муваффақиятли ўтди, деб ҳисобласа бўлаверади.


Манба: www.interfutbol.uz


InterFutbol.uz нинг Telegram даги саҳифасига уланинг – энг сўнгги янгиликлар, қизиқарли блоглар ва таҳлилий материаллар энди бир тўпламда.

Оммабоп мақолалар

Хабарингиз борми

Чемпионатлар

тўлиқ жадвал »

Кун фотоси

«ИНТЕРФУТБОЛ» газетасининг 25-сентябрдаги сешанба сони

  • ЎФФ ва ПФЛнинг янги раҳбарияти олиб бораётган ислоҳотларга қандай баҳо берасиз?


«ИнтерФУТБОЛ» газетасининг расмий сайти.
Гувоҳнома № 0149. Берилган санаси: 25.06.2008 Муассис: «ИНТЕРФУТБОЛМЕДИА» МЧЖ.
Бош муҳаррир: Аҳадхон АБДУҲАМИТОВ.
Таҳририят манзили: 160400, Косонсой шаҳри,Чорбоғ кўчаси, 17-уй.
Электрон манзил: info@interfutbol.uz