Мана, 2017 йил билан ҳам хайрлашдик. Охирги 12 ой давомида футбол оламида ҳам бир қатор ёрқин воқеалар кузатилди.

Бутун жаҳондаги мухлислар гоҳ катта ғалабалардан сармаст бўлишди, баъзида оғриқли мағлубиятлар аламига дуч келишди.

Шунингдек, айрим фанатларнинг йил давомида севимли футболчилари билан маъюс ҳолда хайрлашишларига тўғри келди. Буниси энди ҳаёт қонуни, табиий жараён.

Хуллас, қуйидаги фотожамланма 2017 йили катта футболдан четга чиққан сара юлдузларнинг ашаддий мухлисларига бағишланади.

КАКА (Бразилия) - 35 ёш. Охирги клуби - «Орландо Сити».

Қисқача таъриф - «Ўзга сайёралик»лар (Лионель Месси ва Криштиану Роналду) даври бошланишидан олдин «Олтин тўп» совринига эга чиққан Ернинг охирги вакили».

Андреа ПИРЛО (Италия) - 38 ёш. Охирги клуби - «Нью-Йорк Сити».

Қисқача таъриф - «Маэстро! Тўп узатишни санъат даражасига олиб чиққан маэстро!»

Скотт ПАРКЕР (Англия) - 36 ёш. Охирги клуби - «Фулхэм».

Қисқача таъриф - «АПЛда Лондоннинг 5та клуби - «Чарльтон», «Челси», «Вест Хэм», «Тоттенхэм» ва «Фулхэм»да ўйнаган ягона футболчи. 2010 йили «Вест Хэм» мавсумни охирги ўринда тугатганига қарамай, журналистлар уни АПЛнинг энг яхши футболчиси сифатида эътироф этишган».

Пол РОБИНСОН (Англия) - 37 ёш. Охирги клуби - «Бернли».

Қисқача таъриф - «Лидс» сафида ЧЛда «Барселона» ва «Реал»га қарши ўйнаган, «Тоттенхэм» учун гол урган, «Лидс» ҳамда «Блэкберн» билан АПЛдан тушиб кетган, «Бернли» сафида яна юқорига кўтарилган дарвозабон».

Альваро АРБЕЛОА (Испания) - 34 ёш. Охирги клуби - «Вест Хэм».

Қисқача таъриф - «Реал» клуби ва Испания термаси мегаюлдузлари қатори жаҳон футболида мавжуд деярли барча нуфузли совринларни ютган «нотаниш» қанот ҳимоячиси».

Алекс МАННИНГЕР (Австрия) - 40 ёш. Охирги клуби - «Ливерпуль».

Қисқача таъриф - «Фаолияти давомида нақ 15та клубда ўйнаган «сайёҳ» дарвозабон. Энг машҳур жамоалари - «Арсенал», «Ливерпуль» ва «Ювентус».

Томас СОРЕНСЕН (Дания) - 41 ёш. Охирги клуби - «Мельбурн Сити».

Қисқача таъриф - «АПЛда 400тадан («Сандерленд», «Астон Вилла» ва «Сток Сити»да) ҳамда Дания термасида 100тадан кўп ўйин ўтказган голкипер. Жумладан, жаҳон ва Европа чемпионатида 2 мартадан қатнашган».

Тьягу МЕНДЕШ (Португалия) - 36 ёш. Охирги клуби - «Атлетико».

Қисқача таъриф - «Мадрид «Атлетико»си афсонасига айлангунча «Брага», «Бенфика», «Челси», «Лион» ва «Ювентус»да ҳам муносиб тўп сурган ақлли ярим ҳимоячи».

Мартин ДЕМИКЕЛИС (Аргентина) - 36 ёш. Охирги клуби - «Малага».

Қисқача таъриф - «Бундеслиганинг 4 карра чемпиони («Бавария» билан), Англия биринчилиги ғолиби («Манчестер Сити» билан), «Малага» фахри».

МИЧУ (Испания) - 31 ёш. Охирги клуби - «Овьедо».

Қисқача таъриф - «Суонси»даги дебютида АПЛни «портланган», бироқ кейинчалик Испания тўртинчи дивизионига қадар «қулаган» ҳужумчи»

Антонио КАССАНО (Италия) - 35 ёш. Охирги клуби - «Верона».

Қисқача таъриф - «Қизиқарли, драматик, можароли, самарасиз фаолият соҳиби. Ўз иқтидорини 50 фоиз ҳам ишга сололмаган муросасиз ҳужумчи»

Франческо ТОТТИ (Италия) - 40 ёш. Охирги клуби - «Рома».

Қисқача таъриф - «Рим императори», «Рома»нинг чин маънодаги юраги. Бошқа гап-сўз ортиқча».

Анжело ПАЛОМБО (Италия) - 35 ёш. Охирги клуби - «Сампдория».

Қисқача таъриф - «Сампа»га нақ 15 мавсум давомида сидқидилдан хизмат қилган марказий ҳимоячи, Олимпиада-2004 совриндори (бронза медали), ЖЧ-2010 иштирокчиси».

Симоне ПЕПЕ (Италия) - 33 ёш. Охирги клуби - «Пескара».

Қисқача таъриф - «Ювентус» сафида асосий ролларга чиқмаган ҳолда, 4 марта скудетто ютган ҳужумкор ярим ҳимоячи».

Филипп ЛАМ (Германия) - 33 ёш. Охирги клуби - «Бавария».

Қисқача таъриф - «Хосеп Гвардиола наздида энг ақлли ўйинчи, эҳтимол, Германиянинг ХХI асрдаги энг кучли ҳимоячиси».

Хаби АЛОНСО (Испания) - 35 ёш. Охирги клуби - «Бавария».

Қисқача таъриф - «ЧЛ ғолиби («Ливерпуль» ва «Реал» билан), Бундеслига чемпиони («Бавария» билан), жаҳон ва Европа чемпиони. Совуққонлик тимсоли».

Клеменс ФРИТЦ (Германия) - 36 ёш.

Охирги клуби - «Вердер». Қисқача таъриф - «Германия чемпионати ва кубоги, УЕФА кубоги («Вердер» билан) ҳамда Евро-2008да фақат иккинчи ўрин билан чекланган ўнг қанот ҳимоячиси. Абадий иккинчи».

Шунингдек...

Виктор Вальдес (Испания) - 35  ёш. Охирги клуби - «Мидлсбро».

Дирк КУЙТ (Голландия) - 36 ёш. Охирги клуби - «Фейеноорд»

Виталий КАЛЕШИН (Россия) - 36 ёш. Охирги клуби - «Краснодар»

Александр КЕРЖАКОВ (Россия) - 34 ёш. Охирги клуби - «Зенит»

Абдуллохон ИСРОИЛХОНОВ тайёрлади