ЎФА биринчи вице-президенти Умид Аҳмаджонов 6 февраль куни хорижлик мураббий билан музокара ўтказиш учун Дубайга учиб кетиши ҳақида ўз интервьюсида маълум қилганди. Режага кўра, Умид Аҳмаджонов бугун музокара ўтказиш учун учиб кетиши кўзда тутилганди. Бироқ орада МОҚ президенти этиб тайинланган Умид Аҳмаджонов хорижлик мураббий билан учрашувни бироз кечиктиришига тўғри келди.

Хабарингиз бор, 9-25 февраль кунлари Жанубий Кореянинг Пхенчхан шаҳрида XXIII қишки Олимпия ўйинлари ўтказилади. Шу муносабат билан Умид Аҳмаджонов бошчилигидаги Олимпиадада иштирок этадиган спортчи, мураббий ва расмий шахслардан иборат Ўзбекистон спорт делегацияси Жанубий Кореяга жўнаб кетади.

ЎФА биринчи вице президенти Умид Аҳмаджоновнинг сайтимиз ходими Шаҳбоз Беғамовга маълум қилишича, хорижлик мураббий билан оғзаки келишув амалга ошган. Барча масалалар бўйича келишиб олинган. Яқин орада терма жамоамизнинг бўлажак мураббийи билан учрашиш учун Аҳмаджонов хорижга йўл олади.
Умид Аҳмаджонов бу борада мухлислар ортиқча ҳавотир олмасликаларини сўради ва музокаранинг якуний босқичи нима учун чўзилиб кетганини айтиб ўтди.

Championat.asia сайтининг ишончли манбаасига кўра, Ўзбекистон терма жамоасини португалиялик тажрибали мутахассис Карлос Кейруш бошқаради. Бу ҳақда сайтимиз орқали сал аввал ҳам эълон қилинганди. Айни пайтда Эрон  бош мураббийи бўлиб турган Кейруш жамоасини Жаҳон чемпионатига тайёрлаётгани боис бу ҳақда расман эълон қилинмаяпти. 
Демак, Ўзбекистон терма жамоасининг бўлажак мураббийи португалиялик мутахассис Карлос Кейруш бўлади.