“Локомотив” – “Металлург” учрашувидан кейин матбуот анжумани ўтказилди. Даставвал “Металлург” жамоаси бош мураббийи Андрей Шипилов ҳамда жамоанинг энг яхши ўйинчиси Акбар Исматуллаев журналистларни қизиқтирган саволларига жавоб қайтаришди.

Андрей Шипилов: - Аввало мен “Локомотив” жамоасига ажойиб қабул ва бизга зарур бўлган барча шарт шароитларни яратиб берганлиги учун миннатдорчилик билдираман. Бевосита ўйинга тўхталадиган бўлсам, биринчи таймда футболчиларнинг ҳаракатларидан қониқиш ҳосил қилмадик. Оддий хатоларимиз эвазига гол ўтказиб юбордик. Танаффусдан кейин йигитлар барча кўрсатмаларни бекаму кўст бажаришди ва бунинг учун улардан миннатдорман. Иккинчи таймда тезкорликни оширдик, иштиёқ эвазига керакли натижага эришдик. Ўтказиб юборилган голни ҳали таҳлил этамиз. Ўйиндан тўлиқ қониқмаган бўлсамда, натижа бизни хурсанд этди. Бугун биз бир очко ишладик. Ҳали қиладиган ишларимиз кўп, йигитларни оптимал формамизга етказиш учун меҳнатдан тўхтамаслигимиз лозим.

Акбар Исматуллаев: - Ўйин қийин кечишини билардик. Бизнинг жамоамиз энди шаклланаяпти, бу иккинчи расмий ўйинимиз бўлди. Таркиб саксон-тўқсон фоизга янгиланган. Бугун қизиқарли ўйиннинг гувоҳи бўлдик. Ўйлайманки, ўйиндан ўйинга кучайиб борамиз. Бизга ишонган ва қўллаб-қувватлаган мухлисларга раҳмат.