«Ювентус» клуби ҳужумчиси Гонсало Игуаин «Тоттенхэм»га қарши ўйиндан сўнг ўз фикрлари билан ўртоқлашар экан, танқидларга эътибор қаратмаслигини айтиб ўтди.

«Анча йиллардан бери мен ҳақимда билдирилаётган фикрларга эътибор қаратмай қўйганман. Нохолис танқид бу қулоғимдан кириб, унисидан чиқиб кетади. Шу билан бир қаторда кимдир чин дилдан маслаҳат берса, унинг гапларига қулоқ соламан, бироқ мақтовларга учмайман. Менинг қоидам – сокинликда ишлаш. Мен шунчаки бораман ва жамоа билан бирга шуғулланаман.

Менга бу гап-сўзларнинг қизиғи йўқ. Мен 12 йилдан буён Европадаман ва бу мен учун қизиқ. Мен «Уэмбли»даги голимни ўзим истагандек нишонладим. Бу билан кимгадир бирор нимани исботламоқчи эмасман.

«Ювентус» «Тоттенхэм»га қарши ўйинда ўз қалби ва характерини кўрсатди. Биз жамоага ишонгандик. Ҳар бир ўйинчи муҳимлигини билардик. Озгина йўлдан чиққандек бўлдик, аммо «Юве» ҳеч қачон таслим бўлмайди. Биз ҳали-хануз учта турнирда кураш олиб боряпмиз ва уларда ғалаба қозонишни истаймиз», — дейди Игуаин.