Очиғини айтсам, футболимизнинг янги раҳбарияти катта ислоҳотларга қўл ургач, бунга жиддий қарамагандим. Яъни миллий чемпионат тизимининг  ўзгартирилиши савияга катта таъсир ўтказишига ишонмагандим. Суперлиганинг илк турларидан кейиноқ бу борадаги фикрим ўзгарди. Футболимиз чиндан ҳам, ислоҳотга эҳтиёж сезаётган экан. Ҳа, ҳозирдан хулоса чиқариш ярамайди, лоақал биринчи давра охирини кутиш керак. Аммо битта жиҳатни алоҳида таъкидлаш шарт: мухлислар стадионларга қайта бошлашди ва шунинг ўзи катта ютуқ! Тошкентдаги ўйинда 20 мингдан кўп томошабин - буни ким кутганди? Ишонинг, мухлислар ташрифи қанчалик ошса, чемпионат савияси шунчалик кўтарилади. Зеро, бўм-бўш трибуналар остида ва мухлислар билан «тирик» стадионда тўп суриш ўртасида каттагина фарқ бор. Ўйлайманки, ЎФА ҳаракатларни сира сусайтирмайди ва ўзгаришлар шамоли янада кучаяди. Фақат жамоалар раҳбарлари, мураббий ва футболчилар мухлисларни талаб даражасида қадрлашса, бас. Қадрлашнинг энг маъқул йўли - бу чиройли ва ҳужумкор футбол!

Усмон ХОНАЗАРОВ, Шайхонтоҳур тумани.