Қайднома

Қидирув

Янги мураббий, антиқа дебют ёхуд «Реал Мадрид» тарихидаги энг муҳим учрашув ҳақида

Янги мураббий, антиқа дебют ёхуд «Реал Мадрид» тарихидаги энг муҳим учрашув ҳақида

  17.04.2018 00:27
  0
  4246
Янги мураббий, антиқа дебют ёхуд «Реал Мадрид» тарихидаги энг муҳим учрашув ҳақида

Бундан 13 йил аввал Мад­риднинг «Реал» жамоаси худди ҳозиргидек мураккаб вазиятга тушиб қолган, оқибатда мутасаддилар бош мураббийни алмаштиришга мажбур бўлишганди.

Шу тариқа мураббийлик соҳасида камдан-кам учрайдиган (балки шу пайтгача кузатилмаган) антиқа дебют юз берди.

2005 йил 5 январь куни «Қироллик клуби»ни бразилиялик Вандерлей Лушембурго майдонга олиб тушди. Эътиборлиси, мадридликларнинг «Реал Сосьедад» устидан ғалаба қозонишлари учун янги бош мураббий ихтиёрида атиги олти дақиқа вақт бор эди.

Гап шундаки, Лушембурго Мадридга келишидан уч ҳафта аввал «Реал» ўз майдонида сосьедадлик номдошини қабул қилган, аммо 1:1 ҳисоби қайд этилаётган баҳс 88-дақиқада тўхтаб қолганди. Боиси кутилмаганда террорчилар томонидан стадионга бомба қўйилгани ҳақида хабар тарқаганди.

Шу сабабли «Сантьяго Бернабеу»дагиларни шошилинч равишда эвакуация қилишга тўғри келди. 10 дақиқа ичида 70000 кишилик стадион бўм-бўш бўлиб қолди, футболчилар эса стадион ташқарисида қолишди.

Ўша хавотирли оқшомда учрашувни бош­қарган Лисандро Лопес онгли равишда эвакуация сабабини футболчиларга айтмади. Ўйинчилар ўша заҳоти трибуналардаги ўз яқинлари томон ошиқишлари, оқибатида тартибсизликлар юзага келиши аниқ эди.

Мамлакат пойтахти, шунингдек, унга номдош бўлган «Қироллик клуби» ҳам террорчи ғаламислардан ҳадиксираб қолишганди. 2002 йили юз берган фитна ҳали уларнинг хотираларидан кўтарилиб улгурмаганди.

Полиция бир неча соат давомида стадионнинг ҳар бир қарич ерини синчковлик билан текшириб чиқди. Лекин бомба асоратларини топа олишмади. Хуллас, «Сантьяго Бернабеу»ни портлатиш хусусидаги хабар ёлғон бўлиб чиқди.

Учрашув асосий вақтининг тугашига атиги 2 дақиқа қолган, ҳакам тўрт дақиқа қўшиб беришни режалаштирганди. Мутасаддилар 1:1 ҳисобидаги дурангни қайд этишлари ҳам мумкин эди. Бироқ улар ўйинни ниҳоя­сига етказиб қўйишни лозим топишди.

Шу тариқа олти дақиқалик қарама-қаршилик юзага келди. Якунда тарихий дебютга сабабчи бўлган ўша микробеллашувга қадар ишлари умуман юришмай қолган, Хосе Антонио Камачо ўрнига келган янги бош мураббий Мариано Гарсия Ремон қимматбаҳо юлдузлардан аҳил жамоани шакллантира олмаганди.

Оқибатда «Қироллик клуби» ички мусобақада нуфузига мос келмайдиган бешинчи поғонани банд этишга мажбур бўлаётган, етакчи - «Барселона»дан 13 очкога ортда бораётганди. ЕЧЛнинг гуруҳ босқичидан ҳам жамоа катта қийинчилик билан ўтганди.

Бундай натижалар «Сантьяго Бернабеу»нинг талабчан мухлисларини ҳам, қаттиққўл Флорентино Пересни ҳам қониқтирмасди. Жамоа нафақат ғалабалар, балки сермазмун ўйинни ҳам батамом унутганди. 22 декабрь куни «Севилья»га имконият бой берилгач, Ремоннинг «Қироллик клуби»даги кунлари саноқли эканлиги ойдинлашиб қолди.

Айтишларича, «Реал»нинг бразилиялик ўйинчилари, айниқса, Рождество таътили кунларида ўз норозиликларини очиқ-ойдин намойиш этишганди. Улар омадсиз мураббийдан халос бўлиш билан чекланиб қолмасдан, унинг ўрнини эгаллайдиган ворисни ҳам ўзлари белгилашларига изн сўрашди.

Президент уларнинг талабларини инобатга олиб, устозлик тизгинини Ремондан Бразилиянинг собиқ мураббийи Вандерлей Лушембургога топширди. Янги бош мураббийнинг олдига жамоанинг ички муҳитини соғломлаштириш, самарали ва сермазмун ўйинни йўлга қўйиш вазифаси қўйилди.

Ўшанда Роберто Карлос ўз ватандошининг Мадридга чинакам футболни қайтаришини қувонч билан эълон қилди. Ўзининг Мадриддаги фаолиятини Лушембурго «Сосьедад»га қарши 6 дақиқалик «дуэль» билан бошлади. Ана шу қисқа вақт ичида дебютант мутахассис «Реал» ғалабасини таъминлаши талаб этиларди.

Ўша оқшом «Сантьяго Бернабеу» дарвозалари очиб қўйилди - стадионга кириш бепул бўлди. Хўш, жамоалар таркиби билан танишиб чиқишга етиб-етмайдиган вақт ичида поёнига етадиган баҳсга қандай тайёргарлик кўриш мумкин?

Табиийки, «Реал»дек номдор жамоа нуфузига яраша ҳаракат қилмоғи, дастлабки сониялардан бошлаб арс­лондек олдинга ташланмоғи шарт! Боз устига, унга ғалаба сув ва ҳаводек зарур бўлган вазиятда.

Тан олиш керак, жамоадаги ўзгаришлар яққол кўзга ташланди. Бразилиялик мутахассис Майкл Оуэнни захирада қолдириб, ўрнига баланд бўйли Фернандо Морьентесни жанг­га ташлади. «Қироллик клуби» шиддат билан олға интилиб, 20 сония ичида дастлабки хавфли вазиятни вужудга келтирди.

Дарвозабон қайтарган тўпни Рауль эгаллаб, Морьентесга оширди. У эса, ўз навбатида, Бекхэмни ҳужумга тортди. Дэвид тўпни тўхтатмасдан Роналдога йўллади. Бироқ рақиб дарвозабони Асьер Риесго ҳушёр тургани боис жамоани муқаррар голдан сақлаб қолди.

Ўйин шиддати финал ҳуштаги янграгунча пасаймади. Ана шу паллада мухлислар футбол беллашувини эмас, теннис томоша қилишди, гўё - «Сосьедад» футболчилари тўпни қайтаришдан бўшамадилар, мадридликлар эса ўша заҳоти нав­батдаги ҳужумни уюуштирардилар.

Ниҳоят ўйиннинг ярми, яъни 3 дақиқаси ортда қолганида майдон эгаларининг тиришқоқликлари ўз самарасини берди: Гутининг олис масофадан йўллаган узатмаси ҳужумчини дарвозабон билан яккама-якка вазиятга олиб чиқди. Уни тўхтатиб қолишга улгурмаган Микель Лабака эса қўполлик ишлатишдан ўзга чора тополмади.

Пенальтини амалга ошириш Зайниддин Зидан зиммасига тушди. «Нуқта»дан зарба йўллашда футбол афсонаси хатога йўл қўймади - 1:0. Шундан кейин Лушембурго ҳимоя чизиғини мустаҳкамлашга қарор қилди ва Роналдо ўрнига Франческо Павонни майдонга туширди.

Мазкур ўзгаришдан кейин меҳмонлар олдинга ташланишди. Лекин уларнинг ҳаракатлари беҳуда кетди. «Реал» қимматли 3 очкога эга бўлди. Беллашув ўта қисқа бўлсада, мухлислар соғиниб қолган жиҳатлар - ғалабага бўлган кучли иштиёқ, ирода ва ёрқин ўйинни намойиш этишга улгурди.

Ажо­йиб «спек­такл»­дан таъсирланган маҳаллий матбуот янги «Реал»ни ғайритабиий - «Ла-Кофрадия дель Клаво Ардьендо», яъни «Бўйсунмас руҳиятлар қардошлиги» атамаси билан шарафлади.

Дарҳақиқат, Лушембурго «Қироллик клуби»га ғолиблик руҳиятини қайтара олди. Мадридликлар тўрт кундан кейин «Атлетико»ни 3:0 ҳисобида тор-мор этишди. Кейин қаторасига 5та учрашувда 100 фоизли натижага эришдилар.

Шу аснода юқорилашни давом эттирган «Реал» «Барселона»нинг гегемонлигига чек қўядигандек эди. Лекин сўнгги тур натижасига кўра чемпиондан 4 очкога ортда қолди.

Орадан 13 йил ўтгач, «Қироллик клуби»да ўхшаш манзара кузатилмоқда. Кришгтиану Роналду, Гарет Бэйл ва Карим Бензема каби юлдузларнинг ҳозирги савиялари аввалгидек эмас.

Гарчи охирги ўйинларда жамоа ижобий натижаларга эришаётган бўлсада, етакчи анча олислаб кетган. Уни қувиб етиш учун мавсумнинг қолган қисми озлик қилиши тушунарли ҳол.

Тарихий пенальти муаллифи - Зидан ўз шогирдларига ўша бўйсунмас руҳиятни қайтаришга уринмоқда. Буни қай даражада уддалай олишини фақат вақт кўрсатади.

МУҲАММАДСОДИҚ тайёрлади


Манба: www.interfutbol.uz


InterFutbol.uz нинг Telegram даги саҳифасига уланинг – энг сўнгги янгиликлар, қизиқарли блоглар ва таҳлилий материаллар энди бир тўпламда.

Оммабоп мақолалар

Хабарингиз борми

Чемпионатлар

тўлиқ жадвал »
  • ЎФФ ва ПФЛнинг янги раҳбарияти олиб бораётган ислоҳотларга қандай баҳо берасиз?


© "Interfutbol.UZ". © 2006-2018. Мобил версия
Сайт материалларидан тўлиқ ёки қисман фойдаланилганда веб-сайт манзили кўрсатилиши шарт!
Барча ҳуқуқлар амалдаги қонунчиликка биноан ҳимояланган.