Ўзбекистон Суперлигаси турдан-турга қизиб бормоқда. Чемпионат ўйинларида кузатилаётган кутилмаган натижалар мухлислар қизиқишини янада орттиряпти.
Ҳар бир турда камида битта ёки иккита кутилмаган натижа қайд этиляпти. Амалдаги мамлакат чемпиони «Локомотив»нинг 6-турдан сўнг турнир жадвалида 5 очко билан 9-ўринни эгаллаб турганининг ўзиёқ Суперлига баҳслари қанчалик қизиқарли, муросасиз кечаётганини кўрсатиб турибди.
Бу ҳали бошланиши, олдинда бундан-да шиддатли кечиши кутилаётган иккинчи босқич учрашувлари бор. Унда биринчи босқич якунларига кўра, кучли олтиликдан жой олган жамоалар ўзаро учрашувларда чемпионлик ва совринли ўринлар учун курашни давом эттиришади.
Ҳозирча Тошкентнинг «Бунёдкор» жамоаси турнир жадвалида якка пешқадамлик қиляпти. Биз «қалдирғочлар»нинг қанот ҳимоячиси Акром Комиловдан интервью олдик.
- Акром, «Бунёдкор» турнир жадвалида пешқадам бўлиб турибди. Очиғи, биринчи ёки иккинчи турдан кейин вазият бундай тус олишини ҳеч ким кутмаганди. Бу борада фикрингиз қандай?
- Албатта, турнир жадвалида карвонбошилик қилиш ёқимли ҳолат. Бундан биз футболчилар жуда ҳам хурсандмиз. Ҳа, сиз айтгандек, чемпионатимиз бундай тус олишини ҳеч ким кутмаган эди.
Очиғи, биз ҳам. Лекин ўзимиз томондан ҳар бир учрашувга катта тайёргарлик билан тушяпмиз. Мухлислар ва мураббийларимизни уялтириб қўймаслик учун астойдил ҳаракат қиляпмиз.
Ўйиндан-ўйинга ўзимизга бўлган ишонч ортиб бормоқда. Буни ўзимиз ҳам хис қилиб турибмиз. Кўз тегмасин дейман, ана шу ишонч натижаларда акс эта бошлади.
- Муваффақиятли иштирокнинг асосий омили нимада бўляпти?
- Биринчи галда жамоамиз жуда ҳам аҳил эканлигини айтган бўлардим. Ички муҳит аъло даражада. Ҳамма ягона мақсад йўлида ҳаракат қиляпти. Мураббийларимиз бизга фақат ғалаба ҳақида ўйлашимиз кераклигини уқтиришяпти.
Ўтган мавсум бизга озгина омад етишмаганди. Насиб қилса, бу йил чемпионлик учун курашамиз. Тўғри, ҳозирги ҳолатдан хулоса қилиб, бу ҳақда фикр билдириши ҳали вақтидир. Лекин ҳаракат қилсак, олдимизга қўйилган ҳар қандай мақсадни амалга ошириш мумкин.
- Амалдаги чемпион «Локомотив»нинг омадсиз иштироки сиз учун ҳам кутилмаган ҳолат бўляптими?
- Ҳа, албатта. Бундай бўлишини ҳеч ким, хатто «Локомотив»дагилар ҳам кутишмаганди. «Темирйўлчилар»нинг омадсизликлардан ўзларига кела олишмаётгани қандайдир тушунарсиз ҳолат бўлмоқда.
Шахсий фикрим, ҳозирча уларга омад етишмаяпти. Ҳали аввалги ўйинларини топиб олишади. Чемпионат узоқ давом этади. Асосий кураш иккинчи босқич учрашувларида бўлади.
Суперлига қоидаларига кўра кучли олтиталикдан жой олган жамоаларнинг қолган клублар билан ўйинлардаги очколари нол ҳолатига туширилар экан. Шу боис, турнир жадвалидаги ҳозирги ҳолатдан келиб чиқиб хулоса чиқариш тўғри бўлмаса керак.
Юқори поғоналарда бораётган жамоалар учун энг муҳими, ўзаро ўйинларда очко йўқотмаслик ва имкон қадар кўпроқ очко тўплаб олиш.
- Демак, бу кутилмаган ҳолат бўлиши мумкин?
- Худди шундай. Битта турдан сўнг турнир жадвалидаги ҳолат ўзгариб кетиши ҳеч гап эмас. Ҳақиқий кураш иккинчи босқичда бўлади. Лекин бу билан биринчи босқич учрашувларида очко йўқотиш мумкин экан, деган фикр келмаслиги керак.
Балки, «Локомотив» асосий эътиборини ОЧЛга қаратгандир. Уларга омад тилаб қоламан.
Камолиддин АЛИМОВ суҳбатлашди
Манба: www.interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20