Хабарингиз бор, Суперлига баҳсларини омадсиз ўтказаётган «Нефтчи» Ўзбекистон кубоги нимчорак финал босқичига чиқди. Фарғоналик футболчилар 1|16 финал босқичини Ғузорда Про-лига вакили ҳисобланган «Шўртан» жамоасига қарши ўтказиб, 2:0 ҳисобида зафар қучишди.

Ўйиннинг иккинчи бўлимида Авазбек Ўлмасалиев ва Мурод Бобожонов томонидан урилган икки гол «Нефтчи»нинг кейинги раундга чиқишини таъминлади. Лекин водийликларнинг чемпионатдаги ишлари юришмаяпти.

«Нефтчи» ортда қолган ўйинларда икки очко жамғариб, турнир жадвалининг сўнгги поғонасида бормоқда. Биз «Нефтчи» сардори Шукурали Пўлатовдан интервью олдик.

- Шукурали, «Нефтчи» мамлакат кубогининг навбатдаги босқичига йўл олди. Ғузордаги ўйинда икки тўп фарқи билан ғалаба қозондинг­лар. «Шўртан» сизларга муносиб қаршилик кўрсата олмадими ёки «Нефтчи» ўша куни рақибига нисбатан кучлироқ эдими?

- «Шўртан»га қарши ўйин биз учун анча қийин ва мураккаб кечди. Мезбонлар қарши ҳужум тактикаси асосида ҳаракат қилишди ва бу ҳолат бизга етарлича ташвиш туғдирди. Мураббийларимиз биздан талаб қилган ўйинни кўрсата олганимиз учун ҳам ғалабага эришдик, деб ўйлайман. Шу куни жамоамизнинг барча чизиғи яхши ўйнади.

- Клуб раҳбарияти «Нефтчи» олдига кубок баҳсларида ҳам аниқ мақсад қўйганми?

- Ўзбекистон кубогида ҳам имкон қадар узоқроққа етиб боришимиз керак. Умуман олганда, биз ҳар бир учрашувда майдонга ғалаба илинжида тушамиз.

Мухлисларимизни хушнуд этишга астойдил интиляпмиз. Лекин қаердадир омад келмаяпти, баъзи ўйинларда рақиб кучлилик қилмоқда. Ўйлайманки, жамоамиз турдан-турга шаклланиб боряпти.

- Жамоа Суперлигада омадсиз иштирок этяпти. Бунинг сабаблари нимада? «Нефтчи» мухлислари буни вақтинчалик ҳолат сифатида қабул қилсалар бўладими?

- Албатта, вақтинчалик ҳолат. Жамоамиз омадсизликдан чиқиб кетиш учун ҳаракат қиляпти. Футболчилар машғулотларда катта иштиёқ билан ишлашмоқда. Ишонаманки, «Нефтчи»нинг ижобий натижа билан якунланадиган ўйинлари ҳали олдинда.

- Менимча, таркиб ёмон эмас. Нима етишмаяпти, деб ўйлайсиз?

- Жамоа мавсум бошланишига жуда оз вақт қолганда тўпланди. Фикримча, омадсиз иштирокка асосий сабаб шу ҳолат бўлса керак. Чунки мураббийлар ўқув-машғулот йиғинини ўзлари хоҳлагандек ўтказа олишмади, селекция ишларини амалга оширишолмади.

- Жамоангиз чемпионат доирасидаги ҳозирча сўнггиси бўлиб турган ўз майдонидаги учрашувда «Бухоро»га имкониятни бой берди. «Нефтчи» ўша ўйинда мағлубиятга лойиқмиди?

- Бу учрашувни бевосита стадиондан ва телевизордан томоша қилганлар шунга гувоҳ бўлишдики, «Нефтчи» шу куни мағлубиятга лойиқ эмасди. Биз ҳужумкор ва мазмунли футбол намойиш этгандик.

Лекин якуний зарбаларни беришда хатоликларга йўл қўйдик. Бу - футбол, унда кимдир ютади, кимдир ютқазади.

- Ўтган мавсум «Қизилқум» жамоасида тўп сурдингиз. Бу йил эса «Нефтчи» шарафини ҳимоя қиляпсиз. Навоийдан кетишингизга етарлича сабаблар бормиди?

- Ҳа, бунинг ўзига яраша сабаблари бор эди. Лекин буни ҳозир ошкор қилмоқчи эмасман. Шуни аниқ биламанки, «Қизилқум» яхши жамоа. Ўша пайт клубдан кетишим керак эди ва ўйлашимча, тўғри қарорга келдим.

- «Қизилқум»даги маошларингизнинг ҳаммасини олдингизми? Клуб сиздан қарз бўлиб қолмадими?

- Бу борада ҳеч қандай муаммо йўқ. Маош ва мукофот пулларини тўлиқ беришди.

- «Нефтчи» билан мавсум сўнггигача шартнома имзолаганмисиз?

- Худди шундай.

- «Локомотив» «Зоб-Оҳан» билан ўйинда 1:1 ҳисобида дурангқайд этиб,ОЧЛнинг гуруҳ бос­қичида қолиб кетишди. Баҳсни томоша қилган бўлсангиз, қандай фикр билдирасиз?

- Барчамиз «Локомотив»га мухлислик қилгандик. Юртимиз жамоаси ғалаба қозонишига ишонгандик, умид қилгандик. Агар жамоа ғалаба қозонганида, нафақат «плей-офф» босқичига чиқарди, балки келаси мавсум учун жамоаларимизнинг ОЧЛдаги ўринлар тақсимотига ҳам ижобий таъсир қиларди.

Афсуски, учрашув «Локомотив» фойдасига хизмат қилмайдиган дуранг натижа билан якунланди. Менимча, об-ҳаво шароити сабаб футболчиларимиз кутилган ўйинни намойиш қила олишмади.

- Балки «Локомотив»нинг Суперлигадаги омадсиз иштироки ҳам бунга таъсир қилгандир?

- Тўғри, сиз айтган омил ҳам сабаб бўлиши мумкин. Лекин «Локомотив» таркибида кучли футболчилар жамланишган. Уларнинг ҳар бири исталган пайтда жамоа ўйинини кучайтира олиши мумкин. Футболда омад деган тушунча ҳам бор.

Шу нарса сўнгги йилларда нафақат клубларимиз, балки терма жамоаларимизга ҳам етишмаяпти. «Локо» гуруҳдан чиқишга ҳар томонлама ҳақли эди. Менимча, «темирйўлчилар» ҳали бу вазиятдан чиқиб кетишади. Омадсизликлар вақтинчалик деб ўйлайман.

- «Насаф»нинг ОЧЛдаги иштироки ҳақида қандай фикрдасиз?

- Қаршилик футболчилар кучли гуруҳга тушиб қолишганди. Шунга қарамай, ёмон таассурот қолдиришмади. «Насаф»нинг «плей-офф» бос­қичига чиқиши учун битта ғалаба етмай қолди.

Камолиддин АЛИМОВ суҳбатлашди