ПСВ клуби Голландия чемпионлигини расмийлаштирди. Soccer.ru блогери шу муносабат билан мухлисларни Эредивизиядаги иқтидорли футболчилар билан таништиришга қарор қилди.

Сўнгги пайтларда Голландия чемпионатига бўлган қизиқиш сезиларли равишда пасайди. Бунинг ўзига хос сабаблари бор ва ушбу мавзуда кўп гапирилган. Мазкур турнир авваллари янги юлдузлар, ажойиб иқтидорга эга ёшларни кашф этиб, уларни топ-клубларга кузатиб қўярди.

Аммо бу сиёсат ўз сўзини айтди. Голландияда қолган футболчиларнинг савияси аввалгиларидан паст эканлиги ойдинлашди. Авваллари Англиянинг кучли клублари лолалар юртидаги иқтидорларга харидор бўлишарди, ҳозир эса ўртамиёна ёки аутсайдер жамоаларда ҳам ушбу мамлакатдаги юлдузларни сотиб олиш учун маблағ етади.

Шунингдек, айрим анъаналар ўзгармоқда. Масалан, эндиликда Голландияга фаолиятини якунлаш арафасидаги тажрибали футболчилар келишмоқда, авваллари бунақаси учрамасди. Қисқаси, бутсасини михга илишга шайланаётганларга ҳам жой топилмоқда.

Қайсидир маънода, бу яхши ҳол, зеро Хунтелар яна «Аякс» сафида голлар урмоқда. Аммо вазиятнинг бундай тус олиши Голландияда ушбу «қариялар»нинг ўрнини эгаллашга қодир ёшларнинг етарли эмаслигини билдиради. Тўпурарлар пойгасидаги кўрсаткичлар эса ҳужумчилар борасида ҳам танқислик борлигини исботлайди.

Бир-икки йил аввал энг яхши мерган ўттизталаб тўп киритган бўлса, ҳозир «Виллем II» футболчиси 16та гол билан пешқадам бўлиб турибди. Яна кўплаб форвардларда 14-15тадан гол бор.

Бу эса мақтовга лойиқ натижа эмас. Шунга қарамай, топ-клубларда салоҳиятини намоён эта оладиган, тез орада харидорлари кўпайиши кутилаётган футболчилар ҳам йўқ эмас. Қуйидаги рўйхатда ўша иқтидорли ёшлар билан таништирамиз.

Матийс де Лигт («Аякс»)

Шартномаси: 2021 йилгача

Нархи: 25 млн. евро (нархлар Transfermarkt маълумотлари асосида кўрсатилган)

Нуфузли портал кутилмаганда Голландия чемпионатидаги энг қиммат ўйинчи сифатида марказий ҳимоячини қайд этди. Аммо бунга ҳайрон бўлиш шартмас.

Де Лигт эндигина 18 ёшни қаршилаганига қарамай, юқори савияли ўйин кўрсатмоқда. Умуман, голландлар орасида бундай бақувват, чапдаст, ақлли ва универсал ҳимоячилар тобора кўпаймоқда. Матийс бу борада ван Дейк ҳамда де Врейнинг ортидан борди.

Мазкур ҳолатда муайян потенциал ҳақида гап бормоқда. Бошқа томондан, «Манчестер Сити» шарофати билан ҳимоячиларнинг нархи кескин ортди, чунки улар ҳозир танқис. Демак, де Лигт ҳамда мудофаа чизиғининг бошқа вакиллари ўзларининг нималарга қодирликларини исботлашларига тўғри келади.

Ирвинг Лосано (ПСВ)

Шартномаси: 2023 йилгача

Нархи: 22 млн. евро

Голландия чемпионлигини нишонлаган ПСВ вингерининг кучли клубга ўтиш имконияти юқори. Эйндховен жамоаси Лосанони сотиш орқали катта даромад олиши мумкин: ўтган йили мексикалик футболчини «Пачука»дан 8 миллион еврога харид қилганди.

Айни пайт ПСВнинг энг яхши тўпурари (чемпионатда 15та гол, 12та ассист расмийлаштирган) кўплаб топ-клублар кузатувида. Улар орасида Лондоннинг «Арсенал», Дортмунднинг «Боруссия»сидан тортиб, «Манчестер Сити»гача бор.

Музокаралар давомида ушбу футболчининг нархи 60-70 миллион еврогача ошиши кутилмоқда. Бу табиий ҳол, зеро Лосанонинг ёши 22да, эйндховенликлар билан 2023 йилгача шартнома имзолаган. Ирвингдаги универсаллик ҳар қандай жамоанинг кучайишига замин яратади.

Каспер Долберг («Аякс»)

Шартномаси: 2021 йилгача

Нархи: 14 млн. евро

«Аякс» менежменти Долберг билан келишув чоғида узоқни кўзламаганди. Даниялик футболчи ўтган мавсум барчани лол қолдирди, ажойиб сермаҳсуллик кўрсатди, амстердамликларнинг Европа Лигасидаги иштироки унинг учун ўзига хос реклама вазифасини бажарди.

Каспер қисқа муддатда Европанинг етакчи клублари диққатини ўзига қаратди, аммо «Аякс» раҳбарияти ёш иқтидор соҳибини қўйиб юборишни исташмади. Долбергни яна бир-икки мавсум Голландияда тўп суриб, тажрибаси ошгач, кейин жамоасини алмаштиришга кўндиришди.

Ҳозирга келиб мазкур режа иш бермаяпти. Ўтган мавсум бу футболчи Эредивизиянинг 29та ўйинида 16та гол уриб, 6 марта шерикларига ассистентлик қилди, Европа Лигасида 6та тўп киритди. Жорий мавсумда эса у жароҳатлар туфайли оптимал формага киришда қийналди - 20та учрашувда атиги 5та гол.

Аммо даниялик футболчини кузатаётганлар бисёр, чунки Каспер эндигина 20 ёшда, потенциали юқори. Жароҳатлардан қутулса, аввалги сермаҳсулликни такрорлашига ишонса бўлади. Скаутлар катта эҳтимол билан Долбергни ўз рўйхатларидан ўчиришга шошилишмайди.

Жастин Клюйверт («Аякс»)

Шартномаси: 2019 йилгача

Нархи: 7,5 млн. евро

Клюйвертнинг «Аякс» асосий таркибига ўрнашиб олганига унча кўп бўлгани йўқ, аммо клубнинг ундан умиди катта. Икки йил аввал амстердамликларнинг ўсмирлар жамоасида Жастин кўрсатган ўйин юқори баҳога лойиқ кўрилганди.

Ҳозир афсонавий Патрик Клюйвертнинг ўғли катталар даражасига чиқиб, 18 ёшида «қариялар» орасида йўқолиб қолмаяпти. Унинг машҳур фамилияга эга эканлиги, албатта, топ-клублар меҳрини қозонишда алоҳида аҳамият касб этмоқда.

Уни харид қилган жамоаларнинг ҳужум чизиғи кучайиши шубҳасиз. Жорий мавсум Голландияда Клюйверт 27та ўйин ўтказиб, 8та гол урди ва беш марта шерикларига ассистентлик қилди. У юксак иқтидорга эга, аммо ҳозирча Амстердамда қолса керак.

Давид Нерес («Аякс»)

Шартномаси: 2021 йилгача

Нархи: 15 млн. евро

«Аякс» ва Голландия футболида кам учрайдиган ҳолат. Нерес ўтган йили қиммат нархда «Сан-Паулу»дан сотиб олинганди. Маблағни тежашга кўниккан амстердамликлар бразилиялик футболчи учун 12 миллион евро тўлашди - бу клуб тарихидаги трансферлар ичида иккинчи энг яхши кўрсаткич.

«Аякс»дагиларнинг ушбу харидга қандай умид боғлашганини англаш қийин эмас. Ҳозирча ёмон эмас, Нерес нархига яраша ўйин кўрсатмоқда, уни топ-клублар кузатишмоқда: «Тоттенхэм»дан тортиб, «Ювентус»гача.

Давид Голландиядаги жорий мавсумида 29та ўйин ўтказиб, 11та гол урди, унинг ҳисобида 12та самарали узатма мавжуд. Шу тариқа жамоа етакчиларидан бирига айланди. Қисқа муддатда уни нисбатан кучлироқ чемпионатда кўрсак, асло ажабланмаймиз.

Хуллас, иқтидорлар борасида Голландия замини қашшоқлашганича йўқ. Тўғри, ҳозир уларни имкон қадар ҳимоялашга интилишмоқда. Замон ўзгарди.

Агар юқорида номи келтирилган футболчилар ва ушбу рўйхатга киритилмаган бошқа кўплаб ўйинчиларнинг кўрсаткичларидан тўғри фойдаланилса, янги юлдузлар кашф этилиши турган гап. Шу тариқа, Голландия чемпионатига бўлган қизиқиш яна «тирилиши» тайин.

Абдуллохон ИСРОИЛХОНОВ тайёрлади