Мамлакатимизда барча соҳалар, шу жумладан, миллионлар ўйини ҳисобланмиш футболда ҳам кенг ислоҳотлар  амалга оширилмоқда. Шундай ўзгаришлар мисолида  мухлисларни стадионларга кўпроқ жалб этиш, уларнинг севимли жамоалари иштирокидаги учрашувларини худди байрамдек ўтказишлари учун мухлисларга ўйингоҳларда қулай шарт-шароитлар яратиб берилаётганлигини келтириш жоиз. Жумладан, “Навбаҳор” жамоаси уй учрашувларини ўтказадиган Наманган шаҳридаги “Марказий” ўйингоҳда ҳам мухлислар учун барча шарт-шароитлар муҳайё қилинган. Мухлислар учун мазкур стадиондаги ҳар бир ўйин олдидан вилоятимизнинг таниқли санъаткорлари иштирокида концертлар уюштирилиб, “Навбаҳор” клуби логотипи туширилган кепка, футболка, шарф, кўйлак, соябон, турли хил клуб атрибутикалари, шунингдек, ўйингоҳ ичкарисида музқаймоқ, салқин ичимликлар, бутерброд, фаст-фуд маҳсулотлари сотилмоқда.

Ушбу маҳсулотларни сотишда “Мехмаш” МЧЖ ходимлари жамоатчилик асосида, кўнгилли равишда “Навбаҳор” ПФКга ёрдам беришмоқда, яъни улар хизматлари учун ҳеч қандай ҳақ олишмайди. Кепка, футболка, шарф, кўйлак, соябон, турли хил клуб атрибутикалари,  музқаймоқ, салқин ичимликлар, бутерброд, фаст-фуд маҳсулотлари сотувидан тушган фойда маблағи "Навбаҳор” жамоасини қўллаб-қувватлаш, клубни янада ривожлантириш  мақсадида клуб ихтиёрида қолади. Севимли жамоамиз “Навбаҳор”ни ҳамиша қўллаб-қувватлаб, унга мададкор бўлайлик!