PEPSI Ўзбекистон Суперлигаси 11-турининг қизиқарли кечган ўйинларидан бирида “Локомотив” жамоаси ўз майдонида “Бухоро”ни қабул қилди. Голларга бой тарзда ўтган учрашувда “темирйўлчилар” 3:1 ҳисобида зафар қучишди. Ўйиндан сўнг ўтказилган матбуот анжуманида “Локомотив” жамоаси бош мураббийи вазифасини бажарувчи Андрей Фёдоров ҳамда ўйиннинг энг яхши футболчиси Икром Алибоев иштирок этишди.

– Учрашув биз учун осон ўтмади. Ўйинга киришиб кетишимиз қийин кечди. Кейин эса секин-аста ўз ўйинимизни топиб олдик ва кетма-кет 2та гол уришнинг уддасидан чиқдик. Иккинчи бўлимни ҳам ёмон ўтказмадик. Фақатгина гол ўтказиб юборган вазиятда бироз бўш ўйнадик, холос. Умуман олганда, турдан-турга ўйинимиз очилиб бораётганини айта оламан. Йигитлар майдонда имкон қадар яхши ўйин намойиш этишга уринишяпти. Ҳали олдинда бутун бошли 2-давра турибди. Биз 2-даврани аъло даражда ўтказишни истаймиз. Ҳали ёзги танаффусда жамоаларда ўзгаришлар бўлади. Умид қиламанки, жамоамиз танаффусда ўз таркибини ва ўйинини кучайтиради, – деди тажрибали мутахассис. 

– Учрашувнинг илк дақиқаларида негадир ўйинимиз ўзимиз истагандек чиқмади. Лекин 15-дақиқалардан кейин ўйинга тўлиқ киришиб кета олдик ва яхши ўйнай бошладик. Биз бугун чиройли ғалабага эришдик. Умид қиламанки, мухлисларимиз намойиш этган ўйинимиздан мамнун бўлишди, – деди Алибоев.