Бернли шаҳрида жойлашган қаҳвахона соҳибаси 51 йиллик танаффусдан сўнг еврокубок йўлланмасини қўлга киритган маҳаллий жамоани алоҳида шарафлашни лозим топишди.
Аниқроғи, бу натижада клуб бош мураббийи Шон Дайчнинг хизмати катта эканлигини таъкидлаб, ўз муассасаларига унинг номини беришди.
Эндиликда шаҳарда ўз мижозларига эга қаҳвахонанинг деворида Princess Royal эмас, The Royal Dyche ёзуви порлаб туради.
Англия футболининг ашаддий мухлислари яхши эслашса керак, «Бернли» жорий мавсум жуда яхши старт олиб, бошиданоқ турнир жадвалининг ўрта қисмига мустаҳкам ўрнашганди.
Ўша вақтдаёқ клуб раҳбарияти кутилмаган ваъда билан чиқди: «Агар бош мураббий жамоани жорий мавсум якунида Европа Лигасига олиб чиқса, шаҳар қаҳвахоналаридан бири унинг номи билан аталишини таъминлаймиз».
Аниқроқ айтсак, «Бернли» ноябрь ойи охирида «Борнмут»ни 2:1 ҳисобида енгиб, АПЛ турнир жадвалида 6-ўринга кўтарилганидан кейин шундай баёнот берилганди.
Эҳтимолки, камтарин жамоа футболчиларига айни шу ғоя ҳам қўшимча мотивация бағишлагандир. Ҳар ҳолда, улар бу ваъдани чексиз ҳайрат ва хурсандчилик билан қарши олишганди.
Лекин кейинчалик «Бернли»нинг ишлари бироз орқага кетди. Дейлик, иштиёқи баланд клуб декабрда анча узун ғалабасиз серияга юз тутди. Бернлиликлар қаторасига нақ 11та ўйинда ғалаба нималигини билишмади ва табиийки, мухлисларнинг еврокубоклар ҳақидаги орзулари ўз-ўзидан «чилпарчин» бўлишга яқин келди.
Муҳими, Шон Дайч шогирдлари қиш чиқиши билан ёқимсиз серияга барҳам беришди - 3 март куни «Эвертон» доғда қолдирилди. Шу тариқа «Бернли» чемпионатда ёқимли серияни ҳам бошлади. Яъни кетма-кет яна 4та учрашувни ўз фойдасига ҳал қилди.
Мана, Шон Дайч жамоаси финиш маррасига 2та тур қолганида 7-ўринни ўз номига расмийлаштирди. Бу эса «Бернли» кейинги мавсум Европа Лигасида ўйнашини англатади.
Хуллас, чемпионат ярмида берилган ваъдани бажариш вақти келганди. Муҳими, клуб раҳбарияти ўз сўзини ерда қолдирмади. «Мени қаҳвахона номини ўзгартириш кўпроқ ҳаяжонга солдими ёки жамоанинг ниҳоят, яна еврокубокларга йўл олгани? Очиғи, ҳозир буни билолмаяпман...», - дея хурсандчилигини яширмади муассаса соҳибаси Жастин Лорримэн.
Бу аёл «Бернли»нинг ашаддий мухлисаси эканлигига шубҳа йўқ - унда барча ўйинлар учун йиллик абонемент бор. Клуб вакилларининг ошкора тан олишларича, кузги ваъда аввалида жиддий эмасди - раҳбарлар шунчаки, ҳазиллашиш асносида футболчилар кайфиятини кўтаришни ўйлашган.
Мисол учун, Жастин ҳам «Бернли» олдига еврокубокларга чиқиш вазифаси қўйилганини жиддий қабул қилмаган. Умуман, шаҳарда Шон Дайч бундай натижани таъминлай олишига ҳеч ким унча ишонмаганди.
Қизиқ, Дайч бу илтифотга қандай муносабат билдирди? Оддий. У ҳаттоки, матбуот анжуманида озгина ҳазиллашишни ҳам жоиз билди: «Албатта, бу таъсирли воқеа. Бироқ қаҳвахонани «Малласоч ёқимтой», деб аташса яхшироқ бўларди - албатта, менинг шарафимга!».
Умуман, бундан роппа-роса 2 йил муқаддам АПЛда шунга ўхшаш ажиб тарих кузатилганди. Яъни камтарин «Лестер» чемпионат ғолибига айлангач, олдиндан берилган турли-туман ваъдалар амалда ўз исботини топди.
Тўғри, натижалар кўламини ўзаро солиштирсак, «Бернли» парвози «тулкилар» қайд этган юксалиш билан тенглашолмайди. Лекин камтарин жамоанинг евроаренага чиққани алоҳида эътиборга лойиқ, албатта.
МУҲАММАДСОДИҚ тайёрлади
Манба: www.interfutbol.uz
Киритилган сана: 17.12.2017 17:00
Киритилган сана: 23.11.2017 06:27
Киритилган сана: 29.10.2017 17:51
Киритилган сана: 20.12.2017 09:09
Киритилган сана: 26.11.2017 06:28
Киритилган сана: 29.12.2017 00:29
Киритилган сана: 16.05.2017 14:23
Киритилган сана: 23.07.2017 22:07
Киритилган сана: 24.11.2017 00:17
Киритилган сана: 21.09.2017 12:35
Киритилган сана: 16.01.2018 04:31
Киритилган сана: 07.01.2017 14:02
Киритилган сана: 05.11.2017 13:21
Киритилган сана: 09.10.2017 00:15
Киритилган сана: 08.05.2017 04:20