Бугун ҳар соҳада ошкора гапириш имконияти берилмоқда. Бундан спорт матбуоти ҳам имкон доирасида фойдаланмоқда. Дейлик, журналистлар бу йил кўплаб масала ва муаммолар ҳақида очиқ-ойдин ёзишмоқда. Аммо назаримда, ЎФА ишига баҳо беришга келганда, яна ўша истиҳола ёки рўйхотирлик биринчи ўринга чиқмоқда, бунинг натижасида асосан мақтовга йўғрилган мақолаларни ўқияпмиз.

Ҳа, ЎФАнинг амалга ошираётган ишларию, футболимизни янги даражага олиб чиқиш йўлидаги ҳаракатлари таҳсинга сазовор. Аммо чуқурроқ ёндашсак, камчиликлар ҳам топилади (ўзи иш бор жойда камчилик бўлиши табиий ҳол).

Мисол учун, шахсан менга миллий жамоага муносабат унча ёқмаяпти. Менимча, бош жамоамиз ва олимпия термаси айро-айро йўлдан боргани маъқул. Чунки улар олдида алоҳида-алоҳида вазифалар бор. Ҳозир эса миллий жамоа негизида Осиё ўйинларига тайёргарлик кўрилмоқда, назаримда.

Ваҳоланки, Осиё кубоги ҳам тобора яқинлашмоқда. Аввало, битта масалани аниқлаштириб олиш керак: терма жамоа таркиби буткул ёшартириладими ёки охирги ўртоқлик ўйинларида шунчаки, эксперимент қўлланилмоқда?

Кейин халқаро обрўни ҳам ўйлаш зарур. Ахир кучли рақибларга қарши ўйнайдиган вақтларни қанча кутдик?

Энди бунинг қадрига етмасак бўлмайди. Бордию, Осиё кубоги-2019да Одил Аҳмедов етакчилигидаги эски гвардия хизматидан воз кечишга қарор қилинган бўлса, унда бошқа гап...

Даврон САЛИМЖОНОВ, Учкўприк тумани.