Португалиялик мутахассис Жозе Моуриньо яқинда GQ нашрига интервью бериб, мундиал пайтида қайси юлдузларни кузатиш кераклиги ва Португалия термасининг ҳар қандай рақибни мағлуб эта олишини айтиб ўтди.

- Жаҳон чемпионати сиз учун ҳамон қизиқарли турнирми?

- Албатта. Кимки футболни яхши кўрса, мундиалдан роҳатланади. Олдинлари жаҳон чемпионати футболдан ҳам юқори туради, деб ўйлардим. Мен учун бу турнир ва Олимпия ўйинлари жаҳондаги энг ҳайратланарли воқеликдир.

Гарчи ушбу мусобақада жамоалар яхши футбол намойиш қилишмасада, фикрим ўзгармайди. Нима учун шундай ўйлайман? Клуб футболида ўйинчилар билан ишлаш учун вақтимиз етарли бўлади.

- Сизнингча, қайси термалар мундиал фаворитлари?

- Месси ва Роналду каби футболчилар бор экан, Аргентина ва Португалияни фаворитлар қаторига қўшиш мумкин. Бразилия жамоаси Тите туфайли тактик жиҳатдан яхши ўйнайди. Бундан ташқари, терма таркибида бир қатор иқтидорли футболчилар бор.

Европаликлар орасида Испания саралаш баҳсларида анча кучли кўринди. Лекин сир эмаски, жаҳон чемпионатларида сюрпризлар тез-тез учраб туради.

- Жаҳон чемпионатларининг энг буюк футболчиси ким?

- Ушбу саволга жавоб бера олмайман, чунки бу жуда қийин. Мен 1963 йилда туғилганман. Шу боис ҳам 1966 йилги мундиални унчалик эслай олмайман. Бироқ футбол тарихини ўқиганим учун яхши биламан.

ша чемпионатда сэр Бобби Чарльтон ва Эйсебио­лар ажойиб ўйинлари билан ёдда қолишган. 1970 йилдан кейин фаолият юритган барча жамоалар ва футболчиларни биламан. Шундай экан, сиз сўраган буюклар кўпчиликни ташкил қилади.

Франц Беккенбауэр, Пеле, Диего Марадона, Роналдолар шулар жумласидан. Улар шунчалик кўпки, ҳар тўрт йилда бу рўйхатга ҳеч бўлмаса яна бир юлдуз қўшилади. Шунингдек, турли даврларнинг футболчиларини таққослаб бўлмайди.

- Ота-онангиз 1966 йилги жаҳон чемпионатини томоша қилганингизни айтишар экан. Ўшанда Португалия Англияга имкониятни бой берган. Нима деб ўйлайсиз, португаллар қачон бу босқичдан ўтишади?

- Португалия 2006 йилги мундиалда ҳам ярим финалга қадар етиб борди. 2016 йили Европа чемпионлигини қўлга киритди. Шундай экан, жаҳоннинг энг кучли жамоаларидан биримиз.

Португалия - иқтидорлар мамлакати. Менимча, ҳозирги футболчилар икки йил олдингиларидан кучлироқ. Кўриниб турибдики, Португалия кўп нарсага қодир.

Жаҳон чемпиони бўлишимиз мумкинми? Бунга аниқ жавоб беролмайман. Лекин жамоанинг ўйини чиқиб қолса, ҳар қандай рақибни мағлуб эта олади.

- Жаҳон чемпионатларида сизни футболга чорлаган лаҳзалар бўлганми?

- Жамоа сардори жаҳон кубогини кўтарган пайтини айтишим мумкин. Иккита мусобақа жуда муҳим - Чемпионлар Лигаси ва жаҳон чемпионати.

Сиз ёш бола, ёш футболчи ёки ёш мураббий бўлсангиз, футболчининг жаҳон кубогини боши узра кўтарган пайтда ўша ерда бўлиб қолишни орзу қиласиз. Чемпионлар Лигаси бош совринини кўтарганимда, бу ҳақда кўп ўйлаганман.

- Телевидение ва матбуотда клуб футболи жуда кўп ёритилади. Шу қаторда жаҳон чемпионати «ўзгача турнир» бўла оладими?

- Ҳа, у ҳамон ўзгача, айниқса, фанатлар, мамлакатлар учун. Мусобақа ёзда ўтказилади. Агар миллий жамоа жаҳон чемпионатида ўйнаса, бутун мамлакат тўхтаб қолади.

Термаси мундиалда қатнашаётган ҳар қандай давлатнинг ҳар қандай кўчасидан унинг шарафини ҳимоя қилаётган жамоа ўйнаётган пайтда ўтиб кета туриб, битта дўконни ўмарсангиз ҳам ҳеч ким билмайди.

Бу шунчалик ажо­йиб турнирки, ҳаттоки, футболга қизиқмайдиганлар ҳам ўз термалари фанатига айланишади.

- Бир неча йил олдин қачонки, футболдан чарчасангиз, Португалия термасини бошқаришингизни айтгандингиз. Бунга яқинлашиб қолдингизми?

- Йўқ. Ҳали чарчамадим. Мен учун ҳар ҳафта ўйинлар ва кунлик машғулотлар керак. Айни пайт олдингидан кўра ҳам иштиёқим баланд.

А.Аҳмедов тайёрлади