Қизиқ, футболчилар моделларга талпинишадими ёки аксинча, ҳурлиқолар улар билан ришта боғлашга мойиллар? Бу саволга жавоб бериш қийин, факт шуки, икки йўналиш вакилларидан таркиб топган жуфтликлар жуда кўп.

Қуйидаги фотожамланмада айнан футболчига кўнгил берган айрим гўзал моделлар ҳақида баъзи маълумотлар мужассам.

Изабель ГУЛАР (Кевин Трапп маҳбубаси)

Бразилиялик супермодель Кевиндан бойроқ ва ёши ҳам каттароқ. 33 ёшли Изабель 20 йилдан буён модель бизнеси ичида ва неча-неча миллион евро топган. Демак, Victoria~s Secret даражасидаги ҳурлиқо 2 йилча олдин «Айнтрахт»­да 2 миллион эвазига ўйнаган Траппга бойлик туфайли кўнгил қўймаган.

Анна ШАРИПОВА (Андре Шюррле маҳбубаси)

Қозоғистонда туғилган Анна айни пайт Германияда ишламоқда. Шюррле билан эса Берлиндаги мода кечасида танишган. Футболчи нозанин модель билан бирга эканлигидан бағоят хурсанд, аммо бу унинг майдондаги ўйинларида унча билинмаяпти.

Амра СИЛАЙЖИЧ (Эдин Жеконинг турмуш ўртоғи)

мра модель бизнесига жуда эрта қадам босиб, дарҳол бизнесмен билан оила қурган. Бироқ қизи София туғилганидан кейин эри билан ажрашди. Кейинчалик дугонаси тўйида Эдин Жеко билан учрашиб, яна никоҳдан ўтди.

Шанис ЖОРДИН (Серж Орье маҳбубаси)

Омади юришган қора танли моделлардан бири. Серж Орье Playboy журналининг америкалик собиқ моделини жуда қадрлайди ва унинг барча эркаликларини кўтаришга тайёр.

Микела КВАТРОЧОККЕ (Альберто Аквиланининг турмуш ўртоғи)

Бундай рўйхатни италиялик аёлсиз тузиш мумкинми? Микела - актриса ва журналлар модели. Футболда иқтидорини тўлиқ намоён қилолмаган Альберто ҳаётда муносиб умр йўлдоши топганидан мамнун.

Эбигейл КЛЭНСИ (Питер Краучнинг турмуш ўртоғи)

АПЛ фахрийси Эбби билан футбол туфайли танишган. Питер ҳурлиқо хонимни ташқи кўриниши ёки бақувват гавдаси эмас, балки «робот» рақси билан ўзига қаратган бўлса, ажабмас. Бу жуфтлик ҳозир 3 нафар фарзандни улғайтирмоқда.

Хоана САНС (Дани Алвешнинг турмуш ўртоғи)

Канар ороллари - турли миллат вакиллари йўлларини ўзаро туташтирадиган жой. Эътиборлиси, Хоана бразилиялик ҳимоячидан нақ 10 ёш кичик. Умуман, Дани Алвеш уни авайлашга мажбур ҳам. Ахир Хоанада 8 нафар ака-укаси бор.

Людивин Кадри САНЬЯ (Бакари Саньянинг турмуш ўртоғи)

Мактабда бошланган муҳаббат қиссаси. Санья ортидан Лондонга келган Людивин (отаси жазоирлик, онаси эса франциялик) ўз йўлини топиб олди. Гап 2 нафар фарзанднинг онаси, телебошловчи, актриса ва модель ҳақида кетмоқда.

Виктория ВАРГА (Грациано Пелле маҳбубаси)

Венгриялик хушқомат (бўйи - 180 сантиметр) аёл. Виктория италиялик ҳужумчи билан интернет орқали танишиб, агар учрашишни хоҳласа, тезроқ ёнига келишини сўраган.

Қарангки, Грациано дарҳол Будапештга йўл олган. Энди Пелле Хитойда нафақа йиллари учун жамғарма тўплаяпти, Варга хоним эса унинг ёнида парвона. У шунинг баробарида бой компанияларнинг реклама акциялари учун суратга тушишни ҳам унутмаяпти.

А.ИСРОИЛХОНОВ тайёрлади