Pepsi Суперлига 17-тури доирасидаги «Навбаҳор» — «Сўғдиёна» жамоалари ўртасидаги учрашувдан кейинги матбуот анжуманининг биринчи қисмида жиззахликлар устози Сергей Лушан ва жамоа сардори Санжар Рашидов иштирок этиб, ўйин ҳақида ўз фикрларини билдиришди.

Сергей Лушан («Сўғдиёна» жамоаси бош мураббийи): -  «Навбаҳор» юзага келган қулай вазиятлардан фойдалана олди. Шогирдларим эса гол ура олишмади. Мен секин-аста янги жамоа шакллантиряпман.

Шу боисдан баъзан йигитлар яхши ўйин намойиш этишмоқда, айрим баҳсларда эса ўйинимиз унчалик қовушмаяпти. Лекин бугунги учрашув учун футболчиларга ҳеч қандай эътирозим йўқ.

Бугун ҳам умуман олганда йигитлар ёмон ҳаракат қилишмади. Фақат дарвозага тўп кирита олишмади, холос.

Санжар Рашидов  («Сўғдиёна» жамоаси сардори): - Учрашув қийин кечди. Жамоамизда ҳам гол уриш учун кўплаб вазиятлар юзага келди, аммо улардан фойдалана олмадик.

Вазиятлардан самарали тарзда фойдаланганимизда, таблодаги ўйин ҳисоби бошқача кўриниш олган бўларди. Мезбонлар вазиятлардан унумли фойдаланишди ва ғалаба қозонишга муваффақ бўлишди.

Бугун  стадионда «Навбаҳор» мухлислари ажойиб муҳит яратишди. Бунинг учун уларга алоҳида миннатдорчилик билдираман.

«Навбаҳор» ПФК матбуот хизмати