Наманган шаҳридаги 35-умумтаълим мактабининг сунъий қопламали ўйингоҳида “Yoshlar - kelajagimiz” давлат дастури ижросини таъминлаш мақсадида боболар ва набиралардан ташкил топган жамоалар ўртасида Наманган шаҳар ҳокими соврини учун футбол мусобақаси ўтказилди.   Шаҳар ҳокимлиги, “Нуроний” жамғармаси шаҳар бўлими, Ўзбекистон ёшлар иттифоқи шаҳар кенгаши ҳамда шаҳар жисмоний тарбия ва спорт бўлими томонидан мустақиллигимизнинг 27 йиллиги байрамига бағишлаб илк бор ташкил этилган ушбу мусобақада 6 та жамоа ғолиблик учун майдонга тушди.   Кексалар билан ёш авлод ўртасида ўзаро  меҳр-оқибат муҳитини мустаҳкамлаш, спорт ва соғлом турмуш тарзини қарор топтиришга қаратилган беллашувларда ҳозирда умргузаронлик қилаётган нуронийларимиз ўз неваралари билан бир сафда тўп суриш имкониятига эга бўлдилар.   Қизиқарли тарзда кечган мусобақанинг ҳал қилувчи финал учрашувида Исфархон маҳалласининг “Исфархон” жамоасини 2:1 ҳисобида мағлубиятга учратган Машраб номидаги маҳалланинг “Бунёдкор” жамоаси ғолиб чиқиб, шаҳар ҳокимининг кубогини қўлга киритди.     Учинчи ўрин учун ўтказилган ўйинда Оби-ҳаёт маҳалласининг “Массагетлар” жамоасидан 4:3 ҳисобида устун келган Машад маҳалласининг “Машад” жамоаси ҳам совриндорлар сафидан жой олди. Мусобақанинг тантанали тақдирлаш маросимида Наманган шаҳар ҳокими Шавкатжон Абдураззоқов сўзга чиқиб, нуронийлар таклифи асосида асос солинган мазкур мусобақанинг аҳамияти ҳақида тўхталар экан, спорт ёш танламаслиги, жисмоний тарбия ва спортга ошно тутинган киши ўз устида ҳаракат қилса, ҳаётда асло қоқилмаслигини, қолаверса ҳамиша соғлом танда юришини таъкидлади. Мусобақанинг ғолиб ва совриндорлари, фаол иштирокчиларига диплом ва эсдалик совғаларини топширди. Тадбир якунида мусобақа иштирокчилари учун “бир пиёла чой” дастурхони ёзилди.   Оқилхон Дадабоев