Футбол тарихида трансфер ҳуқуқи учун энг кўп пул сарфланган ўйинчи кимлигини биласизми?

Sport24.ru сайти айни шу масалага қизиқиб, алоҳида «тафтиш» олиб борди ва якунда бутун фаолиятлари давомида трансфер ҳуқуқига энг кўп сарфланган футболчилардан ўзига хос рамзий терма жамоа шакллантирди.

Айтиш жоиз, унинг таркибидан асосан мунтазам равишда клубдан клубга «сакраш» асносида умумий трансфер суммасини оширган юлдузлар жой олишди. Бунда ҳаммаси оддий: муайян футболчига боғлиқ барча трансфер операциялари суммаси жамланган.

Дарвозабон - АЛИССОН

Клублари: «Интернасьональ», «Рома», «Ливерпуль»

Трансфер операциялари жами суммаси: 70,5 млн. евро

Факт. «Рома» бразилиялик дарвозабонни атиги 8 миллион еврога сотиб олганди. «Ливерпуль» эса унинг учун 62,5 «лимон» тўлади. Яна бир факт шуки, Алиссон 17 йил давомида энг қимматбаҳо дарвозабон бўлиб келган Жанлуижи Буффонни секингина пастга туширди.

Ўнг қанот ҳимоячиси - ДАНИЛО

Клублари: «Америка Минейро», «Сантос», «Порту», «Реал», «Манчестер Сити»

Трансфер операциялари жами суммаси: 75,4 млн. евро

Факт. Данило «ғазна»си охирги 2та келишув ҳисобига қаппайди. Бразилиялик футболчи 2015 йил ёзда «Порту»дан «Реал»га 31,5 млн. евро эвазига ўтганди. Яна 2 йилдан кейин эса «Сити» унга 30 миллион тўлади.

Марказий ҳимоячи - Давид ЛУИЗ

Клублари: «Витория», «Бенфика», «Челси», «ПСЖ»

Трансфер операциялари жами суммаси: 110 млн. евро

Давид Луиз учун биргина «Челси» икки марта катта маблағ тўлади. Лондонликлар аввалига 2011 йили «Бенфика»га 25 миллион, кейин «ПСЖ»га 35 миллион беришди. Тўғри, орада уни Парижга нақ 50 «лимон» эвазига юборишганини ҳам айтиш жоиз.

Чап қанот ҳимоячиси - Бенжамин МЕНДИ

Клублари: «Гавр», «Марсель», «Монако», «Манчестер Сити»

Трансфер операциялари жами суммаси: 74,5 млн. евро

Факт. «Манчестер Сити»нинг яна бир ҳимоячиси. «Марсель» уни «Гавр»­дан 4 миллионга харид қилиб, «Монако»га сотганди - 13 миллион. Князлик клуби эса Бенжаминни атиги 1 йил ўйнатди ва Манчестер клубига сотиб олган нархидан 4 баравар қимматига пуллади.

Марказий ярим ҳимоячи - Хуан Себастьян ВЕРОН

Клублари: «Эстудиантес», «Бока Хуниорс», «Сампдория», «Парма», «Лацио», «МЮ», «Челси», «Интер»

Трансфер операциялари жами суммаси: 116 млн. евро

Факт. Аргентиналик собиқ футболчи трансферлар сони кўплиги  ҳисобига рамзий жамоага кирди. Тўғри, Верон жами суммадан 50 миллионини 1999 йилгача жамғарганди. «МЮ» ва «Челси» клублари эса аргентиналик учун биргаликда 60 миллиондан кўпроқ сарфлаган.

Марказий ярим ҳимоячи - ПАУЛИНЬО

Клублари: «Аудакс», «Вильнюс», «Лодзь», «Брагантино», «Коимбра», «Коринтианс», «Тоттенхэм», «Гуанжоу Эвергранд», «Барселона»

Трансфер операциялари жами суммаси: 129,36 млн. евро

Факт. Аванс тариқасида рамзий жамоага киритилган ягона футболчи. Аслида клублар Паулиньо учун  жами чамаси 79 млн. евро тўлаган: «Коринтианс» (5 млн.), «Тоттенхэм» (20 млн.), «Гуанжоу» (14 млн.) ва «Барселона» (40 млн).

Бироқ Хитой гранди бразилияликни Каталония клубига сотганидан афсусландими, атиги 1 йилдан кейин уни ижара келишуви асосида ортга қайтарди. Шартлашувга кўра, гуанжоуликлар 2019 йилнинг ёзида Паулиньо трансферини 50 миллион еврога тўлиқ сотиб олишади.

Ҳужумкор ярим ҳимоячи - Фелиппе КОУТИНЬО

Клублари: «Васко да Гама», «Интер», «Эспаньол», «Ливерпуль», «Барселона»

Трансфер операциялари жами суммаси: 141,8 млн. евро

Факт. «Барселона» ҳиммати туфайли элит рўйхатга кирган бразилиялик яна бир футболчи. Ҳар ҳолда, Каталония клуби тўлаган 125 миллионни олиб ташласак, Коутиньо «оддий» ўйинчига айланиб қолади...

Чап қанот вингери - НЕЙМАР

Клублари: «Сантос», «Барселона», «ПСЖ»

Трансфер операциялари жами суммаси: 310,2 млн. евро

Факт. Неймар фаолиятида атиги 2та трансфер кузатилди — «Сантос»дан «Барса»га ва «Барса»дан «ПСЖ»га. Айнан шу келишувлар бразилияликни барча замонлар ва халқларнинг энг қимматбаҳо футболчисига айлантирди. Неймарнинг ҳали ёш эканлиги ва унга серҳиммат харидорлар борлигини инобатга олсак, умумий сумма ҳали анча ошиши мумкин!

Ўнг қанот вингери - Анхель ди МАРИЯ

Клублари: «Росарио», «Бенфика», «Реал», «МЮ», «ПСЖ»

Трансфер операциялари жами суммаси: 179 млн. евро

Факт. Аргентина футболининг рейтингдаги яна бир вакилига энг катта сумммани «МЮ» берган - 75 миллион евро. Бироқ Лиу ван Гал шундай қимматбаҳо ўйинчини «брак»ка чиқаргач, у кейинги йилиёқ 63 миллион эвазига Парижга йўл олди. Демак, ди Мария ушбу «рамз»дан жой олгани учун аввало, голландиялик мураббийга миннатдорчилик билдириши керак.

Ҳужумчи - Криштиану РОНАЛДУ

Клублари: «Спортинг», «МЮ», «Реал», «Ювентус»

Трансфер операциялари жами суммаси: 230 млн. евро

Факт. Португалиялик юлдуз худди Алиссон каби мазкур рамзий жамоага сўнгги паллада қўшилди. Агар у 117 миллион эвазига «Ювентус» сафини тўлдирмаганида, ҳужум позицияси бошқа футболчига насиб этарди. Мисол учун, Гонсало Игуаинга.

Ҳужумчи - Златан ИБРАГИМОВИЧ

Клублари: «Мальмё», «Аякс», «Ювентус», «Интер», «Барселона», «Милан», «ПСЖ», «МЮ», «Лос-Анжелес Гэлэкси»

Трансфер операциялари жами суммаси: 169,1 млн. евро

Факт. Златан ҳам жамоага ўтишлар сони туфайли кириди. Қаранг, швед голеадори фаолияти давомида 7та топ даражадаги клуб либосини кийди. Бироқ уларнинг ҳеч бири билан Чемпионлар Лигасида ғалаба нашидасини сурмади.

Дарвоқе, Ибрагимович пул эвазига охирги марта 2012 йили жамоа алмаштирганди.

Абдуллохон ИСРОИЛХОНОВ тайёрлади