Англияда трансфер ойнаси ёпилиши арафасида «Челси» Бильбаонинг «Атлетик» жамоаси дарвозабони Кепа Аррисабалагани ўз таркибига қўшиб олди. Лондонликлар ушбу кипер учун 80 миллион евро тўлашди.

Аслида Кепа ким? Қуйида ушбу посбон билан яқиндан танишасиз.

У Еврода ғолиб чиққан, «Реал»га рад жавобини берди, чемпион қушларни боқади. Энди эса жаҳоннинг энг қиммат дарвозабони.

Кепа аҳолиси 9 мингга етмайдиган шаҳарчада туғилган. Бу - Испания­даги Ондарроа муниципалитети. Майдони 3,6 кв.кмни ташкил қилади. 2010 йил ҳисоб-китобларига кўра, шаҳарчада атиги 8856 киши яшайди. Бильбаодан 41 километр узоқликда жойлашган. Кепа 9 ёшида «Атлетик» академиясига қабул қилинган.

У ҳафтасига икки-уч марта Ондарроадан Бильбаога таксида борарди. Орадан етти йил ўтиб эса «Атлетик»нинг фарм-клуби ҳисобланган «Баскония»да дебют ўйинини ўтказди. Айтганча, қаҳрамонимиз академияда нафақат дарвоза, балки бошқа чизиқларда ҳам ўйнаган. Бир сафар жамоадошининг жароҳати боис майдонга тушиб, иккита гол уришга ҳам эришган.

2012 йили Кепа Испания терма жамоаси сафида ёшлар ўртасидаги Европа чемпионатига йўл олди. Хулен Лопетеги бошчилигидаги испанлар гуруҳдан осонлик билан чиқишди. Ўшанда жамоа таркибида Сусо, Пако Алькасер, Сауль ва Хесе каби футболчилар ҳам ўйнашарди. Ярим финалда французлар билан 3:3 ҳисобини қайд этишган.

Ўшанда францияликларнинг голларига Юмтити ва Погба муаллифлик қилишганди. Пенальтилар сериясида эса Кепа Юмтити ва Кондогбианинг зарбаларини қайтариб, жамоасининг финалга йўл олишига улкан ҳиссасини қўшган. Таллинда бўлиб ўтган финалда испанлар Хесенинг ягона голи эвазига Грецияни мағлуб этишганди.

Аррисабалага «Атлетик»нинг Испания терма жамоасида ўйнаган 100-футболчисига айланган. Бу воқеа ўтган йилнинг ноябрида юз берганди. Айнан Лопетеги Коста-Рикага қарши ўртоқлик учрашувида Кепани асосий таркибда майдонга туширган. Малагада бўлиб ўтган учрашувда испанияликлар 5:0 ҳисобида ғалаба қозонишган.

Шу ўринда айтиш жоиз, Испания термасига «Атлетик»дан кўра «Барселона» ва «Реал» ўйинчилари кўпроқ жалб этилган. «Барса»дан 129, «Реал»дан 122 нафар. Боз устига, Кепа ЖЧ-2018га ҳам учинчи дарвозабон сифатида борди.

Ўтган мавсум «сэйв»лар борасида тўртинчи ўринни эгаллади. Ундан олдинда «Лас-Пальмас» (ўртача 3,8та «сэйв»), «Валенсия» (3,3) ва «Леванте» (3,3) дарвозабонлари боришмоқда. Кепанинг ўртача кўрсаткичи битта ўйинга 3,2та «сейв»ни ташкил қилади.

Умуман олганда, мавсум давомида «Атлетик» посбони 96та «сэйв» қайд этган. Шу зарбаларнинг 59таси жарима майдони ичидан, 32таси жарима майдони ташқарисидан ва 5таси дарвозабон жарима майдони ичидан берилган.

Кепанинг «Атлетик» билан шартномаси 2018 йилнинг ёзида нииҳоясига етарди. 1 январдан у истаган клуби билан музокара олиб бориш имкониятига эга бўлди. «Реал» футболчини ёзда текинга қўлга киритиши мумкин эди. Лекин мадридликлар уни қишдаёқ сафга қўшиб олиш учун 20 миллион евро беришга ҳам тайёр эдилар.

Январь ойида Испания матбуотида мадридликларнинг Кепа билан шахсий шартнома борасида келишиб олганлари ҳақида хабарлар тарқади. Ҳаттоки, унинг тиббий кўрикдан ўтгани ҳақида ҳам ёзишди. Аммо «Атлетик» раҳбарияти бунга рухсат бермаганди.

Орадан икки ҳафта ўтгач, Бильбао клуби дарвозабон билан шартнома 2025 йилга қадар узайтирилганини маълум қилди. Шартномадаги товон пули энди 20 миллион эмас, балки 80 миллион еврони ташкил қиларди.

«Яқинларимнинг маслаҳатларига қулоқ тутиб, қолишга қарор қилдим. Ҳаммаси шундай якунланганидан ва клубимга яна саккиз йил хизмат қилишдан мамнунман», - деганди дарвозабон ярим йил олдин.

Мутахассисларнинг фикрича, Кепа дарвоза чизиғида яхши ўйин намойиш қилади. Унинг ажойиб реакцияси бор. YouTubeда унинг «сэйв»лари акс этган роликлар жуда кўплиги бежиз эмас. Бироқ тўпга чиқишларда унчалик кучли саналмайди ва бу борада ишлашига тўғри келади. Аммо Кепа пенальтиларни қайтариш устаси.

Унга қушларни боқиш ёқади. Отаси билан шегл қушларини ушлаб, куйлашга ўргатган. Кепанинг Окер, Роки ва Райкконен номли қушлари 2008 ва 2010 йилларда куйловчи қушлар ўртасидаги мусобақаларда ғолиб чиқишган.

Онасининг айтишича, болалигидан қафасларни тозалаб, қушларни ушлаб, отасига ёрдам берган. Шеглларни куйлашга ўргатиш осон эмас. Бунга йиллаб вақт кетиши мумкин. Дастлаб йигитча бу ишни 9 ёшида уддалаган. Кейинчалик иккита жиддий мусобақада зафар қучган.

Ҳозир футболчининг қушлар иштирокидаги конкурсларга вақти йўқ. Лекин отаси ҳамон шу иш билан шуғулланади. Куйловчи шеглларни бир неча юз еврога пуллаш мумкин. Лекин Аррисабалага оиласи ҳеч қачон бу ишнинг молиявий тарафи билан қизиқмаган. Улар қушларини сотишмайди ва сотиб олишмайди.

Тибо Куртуа икки ҳафта «Челси» машғулотларига ташриф буюрмади ва 200 минг фунт стерлинг миқдорида жаримага тортилди. У Лондон клубида бошқа ўйнашни истамади. Натижада Мадриднинг «Реал» клубига йўл олди.

Лондонликлар унинг ўрнига Кепани 80 миллион евро эвазига харид қилишди. Натижада Аррисабалага жаҳоннинг энг қиммат дарвозабонига айланди. «Ливерпуль» 62,5 миллион эвазига харид қилган Алиссон Бекернинг рекорди атиги уч ҳафта сақланиб турди.

ЖАЪФАРАЛИ тайёрлади