«Ювентус» ҳужумчиси Криштиану Роналду ўзининг собиқ жамоадоши Рауль Альбиолга жорий мавсум 40та гол уришни режалаштираётгани ҳақида айтган. «Наполи» футболчиси эса бунга ўз муносабатини билдирди. «Италияда Испанияга ўхшаб кўп гол уриш унга мушкуллик қилади. «А» серияда ҳимоявий футбол ўйналади ва тактика борасида Испанияникидан жиддий фарқ қилади. Қолаверса, «Наполи» футболчиси сифатида ҳам айтаман, Криштиану ўз режасини бажара олмайди», - деди Альбиоль.

Гап ЕЧЛнинг амалдаги тўпурари ҳақида кетар экан, турнирнинг ўзи ҳақидаги хабарни ҳам келтириб ўтсак... Гап шундаки, УЕФА ЕЧЛнинг финал учрашувини АҚШнинг Нью-Йорк шаҳрида ўтказиш борасида музокаралар олиб бормоқда. Бу ҳақда Испаниянинг медиамаҳсулотлар билан шуғулланувчи гигант компанияси - Mediapro асосчиси Хауме Роурес маълум қилган. «Музокаралар давом этмоқда. Чемпионлар Лигаси финалини Нью-Йоркда ўтказиш имкониятлари ўрганиб чиқиляпти», - деган Роурес. Каталониялик медиамагнат айни воқеликнинг батафсил тафсилотларига, хусусан, ЕЧЛнинг қайси мавсуми ҳақида гап кетаётганига тўхталмаган. Аввалроқ УЕФА президенти Александер Чеферин ЕЧЛ ўйинлари 2024 йилга қадар фақат Европа ҳудудида бўлиб ўтишини ишонч билан таъкидлаганди.