Мадриднинг «Реал» жамоаси бош мураббийи Хулен Лопетеги El transistor вакиллари уюштирган интервьюда турли мавзудаги саволларга жавоб бераркан, «Қироллик клуби»га ўтганидан ҳеч қачон афсусланмаслигини қўшимча қилди.

- Ўтган ёзда содир бўлган воқеалар сизни ранжитмадими?

- Шунчаки, ўз қароримни чиқардим ва агар яна шундай имконият беришса, айни йўлни танлаб, бундан заррача афсусланмасдим.

- Бугунги «Реал» сиз қачонлардир тўп сурган жамоадан фарқланадими?

- Жамоа анча ўсишга эришди, XX асрнинг энг яхши клуби деб топилгани ҳам бежиз эмас: «Реал» олдинга катта қадам ташлади.

- Аммо сиз ҳам аввалгидек эмассиз, шундайми?

- Албатта, ҳамма қатори ёшим ўтяпти, тажриба тўпладим. Олдин футболчи эдим, энди эса мураббийман...

- Сизга клубда ишлаш маъқулми ёки термадами?

- Менинг асосий вазифам - футболчиларни шуғуллантириш, жамоани бошқариб, унинг ғалабасини таъминлаш. Гарчи кундалик график фарқ қилсада, ҳам клуб, ҳам терма мураббийидан бор кучини сарфлаш талаб этилади.

- Терма ҳақида гапириш сиз учун оғирми?

- Асло ундай эмас. «Реал»да ишлаётганимдан бахтиёрман, терманинг эса Луис Энрике бошчилигидаги ишлари юришишини хоҳлайман. Ҳар қандай ҳолатда ҳам Испания миллий жамоаси мухлиси бўлиб қоламан.

Термадаги иш - ортда қолган босқич, ҳозир бор эътиборим «Реал» машғулотларига қаратилган. Бизнинг катта мақсадларимиз бор, уларни бажариш учун катта куч талаб этилгани боис, бошқа нарсалар ҳақида ўйлашга вақт қолмайди. Бу ишга 100 фоиз кучимни сарфлайман.

- Термадан четлатишлари сиз учун кутилмаган зарба бўлдими?

- Содир бўлиши керак бўлган воқеа рўй берди - энди уни ўзгартириб бўлмайди: ортга назар ташлашга хоҳишим йўқ. Нимани ҳис қилаётганимни аввал айтиб ўтдим, туйғуларим ўзгармаган. Ҳамон энг тўғри йўлни тутдим, деб ҳисоблайман - «Реал»га «ҳа» дедим ва буни яна такрорлардим.

- «Реал»дан ўзингиз учун маъ-қул таклиф тушди, аммо терма билан амалдаги шартномани охирига етказиб қўйишингиз керак эди. Акс ҳолда, кетадиган бўлсангиз жарима тўлардингиз...

- Тўғри. Бу ўтмишимнинг бир қисми ва уни муҳокама қилмоқчи эмасман. «Реал»га ижобий жавоб қайтарганимга қарамай, термадаги вазифаларимни бажаришда давом этаётгандим. Албатта, шартномага товон пули ҳам киритилганди... ўтган ишни энди ўзгартириб бўлмайди.

Биз «Реал» билан адолатли йўлдан бордик, нимага ишонган бўлсак, шунга кўра иш тутдик... имкон қадар тўғри йўл танлашга интилдик, масъулиятни ҳис қилдик.

- Буни терма футболчилари қандай қабул қилишди, сизга нима де-йишди?

- Улар нима қилиш кераклигини билишарди - бор эътиборни мундиалга қаратишди... Футболчилар билан гаплашдим, аммо бу суҳбат мавзуси ўртамизда қолади. «Реал» таклифига кўнишни хоҳлаганим сабабли шундай йўл тутдим... виждонан иш кўришга интилдим.

- Криштиану билан гаплашдингизми? Унинг фикрини ўзгартиришга уриниб кўрдингизми?

- Йўқ, гаплашмадим. Клубга келганимда у кетишга чоғланаётганини эълон қилиб бўлганди ва унинг истагини бажариш учун жараённи енгиллатишни хоҳлади. Роналдунинг қарорини ҳурмат қиламан.

- Муайян трансферлар амалга оширилишини сўрамадингизми?

- Ҳозирги таркиб менга ёқишини аввал ҳам айтгандим: барча позицияларда ажойиб футболчиларга эгамиз. Бундай ўйинчилар билан барча сов-ринлар учун курашиш имкони мавжуд.

- Флорентино сўнгги паллада Неймар ёки Мбаппе билан шартнома имзолашини тахмин қилганмидингиз?

- Бизнинг жамоадан бўлмаган футболчилар ҳақида гапирмайман, бу ҳурматсизлик... менга Бэйл, Бензема, Лукас ёқади... Неймар ва Мбаппе - фантастик даражадаги ўйинчилар. Бироқ уларга эътибор қаратмайман, зеро бу футболчилар бош-қа клубларда тўп суришади.

- Тибо Куртуанинг трансфери борасида сиз билан маслаҳатлашишдими?

- Мазкур хариддан хабарим бор эди: у ажойиб дарвозабон, таркибимиздаги киперлардан қониқяпмиз. Уларнинг имкониятларидан ақл билан фойдаланиш даркор, биз буни адолатли тарзда амалга оширишга интиляпмиз. Дарвоза чизиғимиз мустаҳкам. Бу позицияда муаммолар эмас, балки вариантларга эгамиз.

- Нега Куртуанинг майдонга тушиши шу қадар чўзилиб кетди?

- Чунки ҳаммаси ўз вақтида амалга оширилиши керак - бу масалани мураббийлар штаби ҳал қилади. Биз омма тарқатаётган шов-шувларга қараб эмас, жамоа манфаатларидан келиб чиқиб чора кўрамиз.

- Дарвозабонлар ўртасида ротацияни амалга оширишни режалаштиряпсизми?

- Вақти келса, бир қарорга келамиз. Аммо бутун мавсум давомида барча дарвозабонларимиз майдонга тушишади.

- Европа Суперкубогидаги мағлубиятдан ранжидингизми?

- Финални ютқазганда, табиийки, хафа бўласиз. Лекин биз ёмон футбол кўрсатмадик: бутун ўйин давомида курашдик, ғалаба қозонишга интилдик, бироқ ишимиз қовушмади. «Атлетико»ни ғалаба билан табриклаймиз.

- Модрич ва Варан ўша учрашувда майдонга тушишмади... бунинг учун сиздан изоҳ талаб қилишмадими?

- Одатда, футболчилар изоҳ сўрашмайди. Улар мураббийлар штабининг қароридан воқиф эдилар, нима сабабдан ўйнамаганликларини билишарди. «Реал»да фақат 11 ўйинчи тўп сурмайди - мавсум узун, масъулиятни ҳис қилиб, олдинда бизни нима кутаётганини билишимиз керак.

- Сиз-чи, футболчилардан изоҳ талаб қиласизми? Масалан, нима сабабдан захирага олинганини тушунмаётганини таъкидлаган Марсело билан бу борада гаплашмадингизми?

- Марсело «Жирона»га қарши баҳсда захирага олинганидан сўнг кейинги ҳафта машғулотларини фантастик тарзда ўтказди - бу мураббий футболчидан олиши мумкин бўлган энг яхши жавобдир.

- Зидан билан гаплашдингизми?

- Йўқ. У билан танишмиз, аммо муносабатларимиз яқин эмас.

- Клуб президенти билан муносабатларингиз-чи?

- Яхши. Ниманидир муҳокама қилиш керак бўлса, у билан гаплашаман. «Реал» жамоасида ташкилотчилик ишлари тўғри йўлга қўйилган. Шу боис ҳам сўнгги йилларда кўплаб сов-ринлар қўлга киритилди.

- Ла Лигадаги мавсум сизлар учун кўнгилдагидек бошланди...

- Термаларнинг ўйини сабаб юзага келган танаффусга қадар учта ўйин ўтказиб, уларда максимал очко тўплашга эришдик. Шундан сўнг жараённи бир четдан кузатиб, футболчиларимизнинг миллий жамоадан жароҳатсиз келишларига умид боғладим.

- Қирол кубоги сиз учун муҳим мусобақами?

- «Реал» учун жамоа қатнашадиган ҳар қандай турнир муҳим, Қирол кубоги ҳам шулар жумласидан. Биз 10 ой давомида курашларга тайёр туришимиз лозим.

- Стандарт вазиятларга кўп эътибор қаратасизми?

- Бугунги кунда жарима зарбалари ўйиннинг энг муҳим қисми ҳисобланади. Сўнгги жаҳон чемпионатида ҳам бунга гувоҳ бўлдик.

- Футболчилар билан муносабатингиз яхшими?

- Хонамнинг эшиги ҳамма учун ҳамиша очиқ.

- Улар билан жадвал, машғулотлар хусусида маслаҳатлашасизми?

- Қарорни мураббий чиқариши керак. Албатта, биз футболчиларнинг фикрини тинглаймиз, аммо охирги сўзни жамоа устози айтади.

- VAR ҳақида нима дейсиз?

- Бу тизим қарорлар чиқариш жараёнини яхшилаш мақсадида татбиқ этилди... ўша қарорлар бизнинг фойдамизга бўладими ёки йўқми, чиқарилиши шарт. VAR, шубҳасиз, спортда адолатни қарор топтиришда асқотяпти. У жамоалар манфаатига кўра иш тутмайди, гап топ-клуб ҳақида кетяптими, йўқми, ушбу тизимга фарқи йўқ.

- Зидан энг катта орзуси Ла Лигада ғолиб чиқиш бўлганини айтганди. Сиз учун қайси мусобақа муҳимроқ - Испания чемпионатими ёки Чемпионлар Лигаси?

- Биз ҳамма совринлар учун курашамиз. Аммо албатта, Ла Лигада чемпионликка эришиш шарт - бу мунтазам чемпионат, жамоалар ҳар ҳафта ўйин ўтказишади.

- «Порту»да ҳам, термада ҳам дарвозабонлар ўртасида ротация қилмагандингиз. Куртуани биринчи рақамли посбон эмаслигини таъкидлашингизга Кейлорга бўлган ҳурматингиз сабабми ёки бунинг боиси бошқами?

- Ҳар бир вазият алоҳида аҳамиятга эга. Ихтиёримдаги дарвозабонлар юқори савияли, уларнинг ҳар бири асосий таркибда ўйнашга лойиқ, посбонларимизга тўлиқ ишонаман. Улар ким ўйинни дастлабки дақиқалардан бошлашини билишмайди. Бизнингча, шуниси маъқул.

- Матео Ковачич кетгач, жамоага унинг даражасидаги бошқа ярим ҳимоячи кераклигини айтдингиз...

- Ярим ҳимояда ажойиб футболчиларга эгамиз... Льоренте, Себальос... уларнинг юқори савияда ўйин кўрсатишларига ишонаман.

- Ла Лига учрашувларини АҚШда ўтказиш ғоясини қўллаб-қувватлайсизми?

- Йўқ, бу фикр менга ёқмади, мақсадга мувофиқ эмасдек туюлди. Шунга қарамай, боришимиз керак бўлса, биз албатта борамиз.

- Мессининг таъкидлашича, Криштианунинг кетиши «Реал»ни кучсизлантириб, «Ювентус»ни Чемпионлар Лигаси бош совринига асосий даъвогарлардан бирига айлантирибди.

- Мен «Реал футболчиларининг салоҳиятига шубҳа қилмайман.

- The Best мукофотини кимга берган бўлардингиз?

- Модричга.

- Нега Винисиусни Примеранинг бирор клубига ижарага берилмади?

- Чунки у биз билан шуғулланишини хоҳладик, ўсиш жараёнини кузатишимиз керак эди. «Реал»нинг асосий жамоаси машғулотларида қатнашиш - Винисиус учун ажойиб тажриба.

- Ҳозирча фақат 16 нафар футболчи хизматидан фойдаландингиз...

- «Реал»нинг ҳар бир аъзоси жамоада ўйнаши мумкин. Мавсум узун ва барча футболчилар жоиз бўлганда майдонга тушишга тайёрлар.

- Де Хеанинг мундиалдаги ёмон кўрсаткичи сизни ажаблантирдими?

- Давид юксак савияли дарвозабон ва шундайлигича қолади.

Ў.УМАРОВ тайёрлади