Ўз вақтида Санкт-Петербургнинг «Зенит» клубидаги ўйинлари орқали кўпчиликка танилган ярим ҳимоячи Мигель Данни бугунги кунда Португалиянинг «Маритиму» жамоаси шарафини ҳимоя қилмоқда. 35 ёшли футболчи «СЭ» мухбири билан суҳбатда айни пайт фаолияти қандай кечаётгани хусусида гапирди.

- Мигель, ишларингиз яхшими?

- Ажойиб! Қадрдон уйим Мадейрада, «Маритиму»да эканлигимдан хурсандман. Худди «Зенит» сингари мазкур клуб ҳам юрагимда яшайди. Бу ердан кетаётганимда ёш йигит эдим, «кекса» ҳолда қайтдим. Футболдан, оилам даврасида ўтказаётган вақтимдан роҳатланяпман, ўзгача ҳиссиётлар қуршовидаман. Ахир Португалияда бирозгина тўп сурганман, холос. Асосий вақтим Россияда ўтган. Умид қиламанки, ўз жамоамга ҳали кўп наф келтираман.

- Ёшингиз 35да. Яна қанча вақтингизни футболга бағишламоқчисиз?

- Шу йилнинг ёзида «Маритиму» билан икки йиллик шартнома имзоладим ва ушбу муддат якунлангунига қадар юксак даражада ўйнамоқчиман. Чунки ўзимни жуда яхши ҳис қиляпман. Аммо нимадир кўнгилдагидек кетмаётганини пайқасам - кучим ёки соғлиғим талаб даражасида бўлмаса, дарҳол фаолиятимни якунлайман. Ўйлашимча, жисмоний ҳолатим камида 37 ёшгача ўйнаш имконини беради.

- Хўш, кейин-чи?

- Бу ҳақда ўйлашни хоҳламайман. Ҳозирча аввалгидек катта иштиёқ билан тўп суряпман, келажакда нима бўлишини вақт кўрсатади. Ишончим комилки, футболга алоқадорлигим узилмайди. Тўғри, ҳозирча қайси йўналишда фаолият юритишим номаълум - агентми, спорт директорими ёки мураббийми?

- Бир мавсум «Славия»да ўйнадингиз. Прагадан қандай таассуротлар қолди?

- Ҳаммаси яхши, маҳаллий чемпионат, Чехиядаги одамлар, маданияти маъқул келди. Оиламни барчаси қониқтирди.

- Нима сабабдан ёзда Чехия клуби билан келишувни бекор қилдингиз?

- Шартномага кўра яна бир йил тўп суришим лозим эди, аммо «Маритиму» варианти пайдо бўлгач, шу клубда ўзимни бахтиёр сезишим мумкинлигини англадим - чунки уйга қайтардим, боз устига, қадрдон жамоамга ёрдам беришим мумкин эди.

- Ўшанда бир муддат бўлсада «Зенит»га қайтиш ҳақида ўйладингизми?

- Албатта, бу ҳақда кўп ўйладим. Доим айтганман, яна такрорлайман: жаҳонда ўйлаб ўтирмай қайтишим мумкин бўлган иккита клуб бор - «Маритиму» ва «Зенит». Санкт-Петербургдан таклиф келишидан умидвор эдим, бу ҳазилмас - узоқ кутдим, аммо келмади. «Маритиму» эса чақирди ва шу заҳоти якуний қарорни қабул қилдим.

- Манчини кетиб, Семак келганидан сўнг «Зенит» қанчалик ўзгарди?

- Сезиларли тарзда ўзгарди. Атрофдагилар ҳурматига сазовор бўлган мураббий келди, Семак «Уфа»да фантастик иш бажарди, энди эса «Зенит» футболчиларига устозлик қилмоқда. Кўриниб турибдики, ҳолат ўтган мавсумдагидан яхши - ҳамма ўйинчилар «Зенит»дек обрўли клубга мос эканликларини исботлашга уринишмоқда.

- «Славия» ҳақида нима дея оласиз?

- Бу клубда ғалаба қозониш учун нима қилиш кераклигини жуда яхши билишади. Ҳимоядаги ишончли ўйин, рақибни қарши ҳужумлар ор-қали жазолашни яхши ўзлаштиришган.

- Чехия жамоасидаги собиқ шерикларингизнинг қайси бири рақибга кўпроқ хавф туғдириши мумкин?

- Мирослав Стохни алоҳида ажратиб кўрсатишим мумкин. Унинг катта тажрибаси бор, «Челси», «Твенте», «Фенербахче» сингари Европанинг йирик клубларида ўйнаган. У яхши ярим ҳимоячи учун керак бўлган барча сифатларга эга. Бир сўз билан айтганда, Стох «Славия»нинг энг кучли ўйинчиси.

маълумот учун

Тўлиқ исми: Даниел Мигель Алвиш Гомиш

Туғилган санаси: 1983 йил 7 август (35 ёш)

Туғилган жойи: Каракас, Венесуэла

Бўйи:178 см.

Вазни:73 кг.

Амплуаси: ҳужумкор ярим ҳимоячи

Клуби: «Маритиму» (Португалия)

Рақами: 10

«Маритиму», «Спортинг» (Лиссабон), «Динамо» (Москва), «Зенит» (Санкт-Петербург), «Славия» (Прага) клубларида тўп сурган. Португалиянинг барча ёшдаги термалари, шунингдек, миллий жамоаси сафида ҳам ўйнаган. Асосий терма либосида 38та ўйин ўтказиб, 4та гол урган.

А.ИСРОИЛХОНОВ тайёрлади