УЕФАнинг собиқ президенти Мишель Платини футболга VAR тизимининг жорий этилишига қарши эканлигини билдирди. "2018 йилги Жаҳон чемпионати финалида Франциянинг дастлабки 2 та голи қоидага хилоф тарзда киритилганди. Бу хато нафақат хорватларнинг, балки бутун дунёнинг зарарига ишлади. Албатта бунга французлар ҳеч қандай эътироз билдиришмади. VAR тизими бир қатор эски муаммоларни бартараф қилгани билан, янгиларини юзага келтирмоқда. Мен бу тизим, бу фалсафага қаршиман. Футбол инсонлар ўйини. Унда фақат инсонлар ўйнашади ва ҳакамлар ҳам инсон сифатида майдонга тушиб келишади. Агар биз малакали ҳакамларни етиштирсак, ҳеч қандай муаммо юзага келмайди. Бир пайтнинг ўзида майдондаги бутун вазиятни кўришнинг имкони йўқ. Бу ўринда ҳакамлар сонини оширишнинг ўзи етарли. Камераларни эса фақат бой мамлакатларгина қўллай олиши мумкин. Мен популист бўлишни истамайман, бироқ бу технологияларга сарфланаётган пуллар болаларга жалб этилса, улар кўпроқ футбол ўйнаган бўлишарди", дейди Платини RMC Sport нашрига берган интервьюсида.

63 ёшли мутахассис 2007 йилдан 2015 йилга қадар УЕФА президенти сифатида фаолият олиб борган ва 2015 йилда ФИФАнинг Этика қўмитаси қарорига кўра футболдан четлатилган.