"Насаф" - "Нефтчи"(2:0) ўйинидан сўнг ҳам клублар бош мураббийлари Баҳром Ҳайдаров ҳамда Рўзиқул Бердиевлар ўз фикрларини билдириб ўтишди:

Б.Ҳайдаров: - Бугун бутун баҳс давомида устунлик "Насаф" жамоаси томонида бўлди. Биз эса тўп билан муомала қилишда ва ҳимоядан ҳужумга ўтишда кўплаб хатоларга йўл қўйдик. Мана учинчи ўйиндирки, стандарт вазиятдан гол ўтказиб юборяпмиз. Шу жиҳат устида яна ишлашимиз лозим экан. Бугун диққат-эътиборни тўплаб олдинга ўтишда бироз қийналдик. Энди қолган 3 та ўйинда яхши ўйин кўрсатиб, охирига қадар кураш олиб борамиз. 3 та ўйинда 9 очко олишимиз шарт энди, - деди мутахассис.
Р.Бердиев: - Барчани қўлга киритилган ғалаба билан табриклайман. Бугун йигитлар жамоавий жиҳатдан ҳам, индивидуал томондан ҳам чиройли ўйин намойиш этишди. Бугунги рақибимиз жиддий эди. "Нефтчи" сўнгги пайтларда ажойиб ўйин кўрсатаётган эди. Лекин биз бугун улардан устунроқ ўйнай олдик. Бугун йигитлар майдонда бир-бирларини яхши тушуниб тўп суришди. Истайманки, кейинги ўйинларда ҳам шундай ғалабаларни қўлга киритаверайлик, - деди мутахассис.