Голландия терма жамоасининг собиқ ярим ҳимоячиси Рафаэль ван дер Варт футболчилик фаолиятига якун ясаганини эълон қилди. 35 ёшли футболчи август ойидан буён Даниянинг «Эсбьерг» клуби шарафини ҳимоя қилиб келаётганди. У сўнгги вақтларда кетма-кет жароҳатлар ола бошлаган. «Буни тўхтатишим керак, деб ўйлаяпман. Мен бу ерга футбол ўйнаш учун келганман, даволаниш учун эмас. Иложи борича узоқроқ вақт тўп суришни истагандим, аммо бунинг имкони бўлмади», - деди ван дер Варт Voetbalprimuer нашрига берган интервьюсида.

Рафаэль «Аякс» тарбияланувчиси саналади. У катталар футболидаги фаолиятининг дастлабки йилларида (1999-2005) амстердамликлар таркибида ўйнаган. Шундан сўнг Германияда «Гамбург» (2005-2008, 2012-2015), Испанияда «Реал» (2008-2010) ва Англияда «Тоттенхэм» (2010-2013) каби жамоалар либосини кийган. У 2001-2013 йилларда Голландия миллий термаси аъзолигида 100дан ортиқ ўйинда майдонга тушган. Қўшимча қилиш жоизки, ван дер Варт 2008 йилги «Олтин тўп»ни қўлга киритиш учун номзодлар рўйхатига киритилган, аммо мукофот ўша вақтда «Манчестер Юнайтед» аъзоси бўлган, кейинчалик Рафаэлнинг жамоадошига айланган португалиялик ҳужумчи Криштиану Роналдуга насиб этганди.