Ўқувчиларга яна бир бор эслатиб ўтмоқчиманки, Максим Шацких клуби - Украина олий дивизионида 50 ва ундан ортиқ гол урган хорижлик футболчилардан иборат рамзий клубдир. Унга «Динамо» (Киев) сафидаги ёрқин ўйинлари билан танилган ўзбекистонлик ҳужумчининг номи берилган. Украинанинг бошқа жамоаларида ҳам тўп сурган Макс ҳозирча ушбу мамлакатдаги хорижлик легионерлар орасида энг кўп тўп киритган футболчи

Ўзбекистонлик форвард ҳисобидаги голларнинг асосий қисми унинг «Динамо» (Киев)даги фаолиятига тўғри келади - 142та. Умумий ҳисобда эса Шацких Украинадаги фаолияти давомида рақиблар дарвозасини 171 марта ишғол қилган. Максим Украина олий дивизионида 100та гол урган дастлабки футболчи бўлган. У ўзининг юзинчи тўпини 2004 йилнинг 23 ноябрь куни Чемпионлар Лигаси гуруҳ босқичи доирасидаги «Динамо» - «Рома» учрашувида киритган. Ўшанда ўйиннинг 82-дақиқасида урилган гол Шацких учун юбилей гол бўлди, киевликлар эса якунда 2:0 ҳисобида зафар қучишган.

Максим Шацких клубига 2010 йилнинг 18 июлида асос солинган, шундан буён Украина элитасида тўп сурган хорижлик тўпурарларнинг ҳеч бири Ўзбекистон термасининг собиқ ҳужумчиси қайд этган натижага яқинлаша олишмади.

Айни пайт Украина Премьер-лигасида тўп сураётган, Бразилия фуқаролигига эга Жуниор Мораес аста-секин 100лик довонни забт этишга уринмоқда. Жорий мавсум унинг ҳисобида 12та гол бўлиб, улардан 10тасини Украина чемпионати, яна иккитасини эса Чемпионлар Лигасида амалга оширган. Ўзбекистонлик форвард номи билан аталган клуб рўйхатида Мораес ҳисобида жами 83та гол бор.

Донецкнинг «Шахтёр» жамоаси вакили Тайсон янги мавсумда ўз ҳисобига 2та гол ёздириб қўйди.

Мораеснинг клубдоши Марлос Украина фуқаролигини қабул қилгани сабабли Шацких клуби аъзолигидан чиқди. У украинлар миллий жамоасида ўйин ўтказишга ҳам улгурди.

Шунингдек, турли сабабларга кўра, клубга қўшилишга номзодлар сафидан тушиб қолганлар ҳам бисёр. Масалан, «Шахтёр»нинг собиқ сардори, хорватиялик Дарио Срна (49та гол) Италиянинг «Кальяри»сига ўтган бўлса, «Заря» (Луганск)даги ўйинлари билан танилган сербиялик Желько Любенович (48та гол) фаолиятини якунлади. Шунингдек, «Динамо» (Киев) сафида 31та тўп киритган Дьёмерси Мбокани Бельгиянинг «Антверпен» жамоасига ўтиб, янги жойда рақиблар дарвозасини икки марта ишғол қилишга ҳам улгурди.

Украина элитасидаги энг сермаҳсул хорижлик футболчилар клубидаги бугунги ҳолатни таҳлил қиладиган бўлсак, Максим Шацкихнинг кўрсаткичини яқин ўн йил, балки бундан ҳам кўпроқ муддат ичида кимнингдир янгилашига ишониш мушкул.