Россия терма жамоасининг собиқ етакчиси Андрей Аршавин сўнгги йилларда Қозоғистоннинг «Қайрат» клуб шарафини ҳимоя қилаётганди. Яқинда у Олма-Ота жамоасидаги сўнгги ўйинини ўтказади. Шу билан бирга Андрей футболчилик фаолиятини якунламоқчи. «КраСава» блоги муаллифи Евгений Савин россиялик ҳужумчи билан суҳбат уюштириб, ўзини қизиқтирган мавзулардаги саволларга жавоб олди.

- Кержаковнинг айтишича, сиз Россия футболи тарихидаги энг яхши футболчи экансиз.

- У футболни яхши тушунади.

- Яхши, сизнинг талқинингиз қандай?

- Мен ўйнаган футболчилар орасида Егор Титов ёқади. Лекин у энг яхшими ёки йўқми, билмайман. Титов менга қарши ўйнаган ўйинчилар орасида энг кучлиси эди.

- Ким зўр: Дзюбами ёки Аршавин?

- Мен.

- Айтишларича, бир вақтлари «Барселона» сизга жиддий қизиққан экан. Шу ростми?

- Ҳа, шу клубга ўтишим мумкин эди. «Барселона» трансферим учун 15 миллион евро таклиф қилган. Лекин «Зенит» рад жавобини берган. Умуман олганда, Санкт-Петербург жамоаси мени сотишни истамаган.

- Петржела, Адвокат, Хиддинк ва Венгер. Уларни энг ёмонидан бошлаб, яхшисигача санаб беринг.

- Венгер, Петржела, Адвокат, Хиддинк.

- Нима учун Венгер - ёмон?

- Чунки унинг қўлида энг кам ўйин ўтказганман.

- «Энфилд»даги «покер» ҳаётингизни ўзгартириб юборганми?

- Умуман олганда, айтарли ўзгартирмаган. Фақатгина PokerStars билан шартнома бўлган. Қанча пул? Ўртача.

- «Арсенал»га яна ўтганингизда нималарни ўзгартирган бўлардингиз?

- Ҳеч нимани. Ҳаммасини олдингидек бажарардим.

- Бендтнер машинасини қандай уриб олган?

- Катта тезликда бориб симёғочга урилган. Агар ўнг ёки чапга бориб текканида, у ҳалок бўларди.

- Сиз кўрган энг ажойиб легионер ким?

- Нимагадир хаёлимга Кинцл келди. У қандай масофадан бўлмасин, оёғининг ташқи тарафи билан тепарди. Бошқача тепишни билмасди. Ўшанда уни нимага олишди, деб ўйлагандик.

- Футболчилар рафиқаларининг минус томонлари.

- Турмуш ўртоғингиз ўқиши ёки ишлаши керак. Шунда эрларини «эговлаш»га вақтлари кам бўлади.

- Ўтган йили турмуш ўртоғингиз «Инстаграм»га «Феррари» машинасининг суратини жойлаштириб, тагига «Янги машинам. Совға», деб ёзганди...

- Мен совға қилмаганман. Бунча пул йўқ. Унда кимнинг ҳадяси? Буни ўзи айтсин. Хавотир олманг. «Феррари»ни сотиб юборди. Ҳозир Porsche Cayenne машинасида юрибди. Шу билан бирга фойда қилди.

- Сизга Дудь қўнғироқ қилдими?

- Йўқ. У спортчилардан интервью олмайди-ку.

- Ўзингиз унинг ёнига борган бўлармидингиз?

- Ҳозир эмас. Мендан сўрайдиган нарсанинг ўзи йўқ. У қизиқарли суҳбатлар уюштиради. Айнан шу инсон туфайли билмаган одамларимни танидим.

- Кокорин ва Мамаев учун қандай жазо адолатли бўлади?

- Уларнинг футбол ўйнашда давом этишларини истардим. Бу йигитлар ҳам жамиятнинг бир бўлаги ҳисобланишади. Агар майдонда бўлишса, фойдалари кўпроқ тегади. Айнан шу ишни яхши бажаришади. Саша эса ўз даврининг энг иқтидорли футболчиларидан биридир.

- Скриптонитни эшитасизми?

- Йўқ.

- «Спартак»ка ўтган бўлармидингиз?

- Йўқ. Бир сафар Червиченко жамоага ўтишимни истамаган. Бу «Спартак»нинг охирги имконияти эди.

- Сиз ўтишни хоҳлагансиз-у, у истамаганми?

- Ҳа. 60 минг долларни деб шундай бўлган.

- Янги Аршавин қачон пайдо бўлади?

- Балки ҳозир бордир. Лекин у ҳали ёш.

- Ўғлингиз ҳақида гапиряпсизми?

- Тўғриси, билмайман. У қаердадир шуғулланса керак. Лекин бу ҳақда кўп нарса билмайман.

- Нимага?

- Фарзандларим ва биринчи хотиним билан айтарли мулоқот қилмайман.

- «Зенит»да қандай вазифада ишлашни истардингиз?

- Кам иш қилиб, кўп пул топадиган лавозимда.