Йосип Иличич - «А» серияси-2018|2019нинг энг ажиб ўйини қаҳрамони. Ҳа, шундай. Гап шундаки, словениялик футболчи аслида «Интер» сафига қўшилиши керак эди, бироқ хасталик унга халиқит берди. Энди эса у «нерадзурралар»ни деярли ёлғиз ўзи шармандали мағлубиятга йўлиқтирди. Чиндан ҳам, кутилмаган ва оғриқли «тарсаки». Италия чемпионатининг 12-туридан ўрин олган «Аталанта» - «Интер» ўйини натижаси (4:1) кўпчиликни ҳайратга солгани аниқ, лекин Иличич туфайли кутилмаган ҳисоб иккинчи даражага тушди.

Словения термаси вакили ўйинда жарима нуқтасидан 2та самарали узатмани амалга оширди. Шундай бўлиб чиқдики, айни шу стандарт вазиятлар чемпионатнинг ўртамиёна иштирокчиларидан бири ва  фаворитликка даъвогар клуб ўртасидаги қарама-қаршиликда ҳал қилувчи аҳамият касб этди. Диққатни тортадиган жиҳати, Иличич бундан бир неча ой олдин айнан «Интер» билан шартнома тузиши керак эди. Ярим ҳимоячи 2017|2018 йиллар мавсумида жуда тетик ўйнаб, «А» сериясининг ўзида 11та гол урди, яна 8тасига ассистентлик қилди. Натижада Premium Sport «нерадзурралар» Йосип трансфери учун 15 миллион евро тўлашлари эҳтимоли баландлиги ҳақида хабар тарқатди. Бироқ...

Йосип Иличич июль ойида кутилмаганда, ёқимсиз касалликка чалинди. Вақт ўтиши билан лимфотўқималар хасталиги ривожланиб, футболчининг умумий ҳолати оғирлашиб борди. Ўша пайт унинг чағига қараб бўлмасди. 30 ёшли футболчи нақ 2 ой давомида шифохонада ётиб, тинмай антибиотиклар қабул қилди. Эҳтимолки, Йосип спорт фаолиятига нуқта қўйиш ҳақида ҳам ўйлагандир... Футболчининг бахтига, кейинчалик хасталик ортга чекинди, ҳаммаси яхшилик билан хотима топди, бироқ бу орада «Интер» лагерида унинг трансфери муҳокамаси кун тартибидан олиб ташланган эди.

Мана, жабрдийда Иличич кузда ниҳоятда муҳим 2та ўйинда иштирок этди. Словениялик бардошли ярим ҳимоячи «Кьево»га қарши кечган учрашувда жорий мавсум илк марта бошланғич таркибда майдонга тушиб, ўз номига «хет-трик» расмийлаштирганди. Мана, иккинчиси «Интер» билан баҳсга тўғри келди - 2та гўзал самарали узатма. Бергамоликлар ишончли ғалаба эвазига турнир жадвалида юқорилаб, еврокубоклар йўлланмасини тақдим этувчи зонага анча яқинлашганини алоҳида таъкидлаш ўринли.

WhoScored портали Йосип Иличични «Аталанта» - «Интер» ўйинининг энг яхши футболчиси сифатида эътироф этди. Чунончи, Йосип Иличичнинг «нерадзурралар»га қарши баҳсдаги статистикаси ақлни шошириб қўядиган даражада ажойиб чиқди. «Аталанта»нинг умумий кўрсаткичлари ҳам ҳайратланарли бўлди. Дарвоқе, словениялик футболчи ўйиндан олдин яқин ўтмиш воқеаларини ёдга олиб, «Аталанта» «нерадзурралар»ни енгишига ишонч билдирганди: «Ҳа, ўта ёқимсиз ва оғир дамларни бошдан кечирдим. Дейлик, жамоадошларимга ёрдам беролмаслигимдан роса сиқилдим. Муҳими, барчаси ортда қолди. «Аталанта» мавсум бошида ҳам чакки ўйнагани йўқ, фақат вазиятлардан фойдаланиш масаласида оқсадик. Энди эса ижобий серияни давом эттиришни хоҳлаймиз. «Аталанта» худди «Интер» каби кучли жамоа эканлигига ишонаман. Муҳими, бўлажак рақибни жуда яхши биламиз. Умид қиламанки, ўз майдонимизда фанатлар бизни ғалаба сари дадил ундашади ва бу иш беради». Мана, Йосип ҳақ бўлиб чиқди. «Интер» балки энди қишда бу футболчини сотиб олишга уриниб кўрар...