«Андижон» клуби 13 ноябрь куни Про-лига 35-турида «Истиқлол» (Фарғона)ни ениб, минглаб мухлислари гувоҳлигида Суперлигага чиқиш миссиясини уддалади. Эътиборли томони, андижонликлар ушбу муваффақиятни худди чемпионлик сингари тантана қилишди. Зеро, мавсум бошида Элдор Сакаев жамоаси олдига айнан элитага кўтарилиш вазифаси қўйилганди. Мана, клуб ўз тарихида 3-марта юқори дивизионга қайтди. Қуйидаги мақола биринчи лигадан юқори (олий лига ёки Суперлига)га чиққан жамоалар ҳақида. Бунга дебютантларнинг янги мавсумда қандай натижа кўрсатишгани ҳам қўшимча қилинган. Дарвоқе, бу каби маълумотларни аввалги йиллар ҳам ҳавола этганмиз, демак, бу сафаргисини эслатма ўрнида қабул қилиш ҳам мумкин.

ЎРТАГА

Андижон шаҳри жамоаси шу билан 3-марта қуйи лигадан юқори дивизионга йўл олди. Клуб 2005 ва 2013 йилларда ҳам кучлилар қаторига қўшилиш миссиясини муваффақиятли адо этганди. Аслида «Андижон» ўтган асрда рақобатбардош жамоалардан бири сифатида гавдаланганди. Дейлик,  Сергей Шевченко бош мураббийлик қилган даврда клубнинг ҳужум чизиғига кўпчилик ҳавас билан қарарди. Бироқ кейинчалик «Андижон»да мураббийлар ва футболчилар қўнимсизлиги авж олиб, натижалар тобора пасайиб бораверди...

2018 йил. Ўзбек футболида бошланган ислоҳотлар «Цементчи»ни ҳам четлаб ўтмади. Қувасойда йиғилган рақобатбардош жамоа мавсум аввалида тайёргарликка киришган бўлсада, старт чизиғи яқинлашган сари унинг тақдири қоронғулигича қолди. Кейин эса «Нефтчи» Суперлигага қайтарилди ва «Цементчи» вакиллари ёппасига Фарғонага кўчиб ўтишди. Оқибатда Қувасойда профессионаллик сари қадам ташлаган футбол шундоқ тўхтади...

2017 йил. «Динамо». Самарқанд жамоаси мавсумда ажойиб старт олиб, барчани ҳайратга солганди. Айниқса, «Пахтакор» майдонида ғалаба қозонгач, «Динамо»ни «Лестер»га қиёслашди - «Ўзбекистон чемпионати бош «сенсация»чиси». Афсуски, иккинчи давра бошлангач, серғайрат ва шижоатли клубни умуман таниб бўлмай қолди. «Динамо»га нима етишмагани хусусида кўп гапирилди. Кимдир мураббийлар штаби малакасини сабаб сифатида кўрсатган бўлса, бошқа биров самарқандликларга голеадор ҳужумчи йўқлиги панд берганини таъкидлади. Қайси вариант тўғрироқ эканлигини билмадик, аммо 13-ўрин «Динамо» учун айни мантиқий якун бўлди.

2016 йил. «Обод». Миллий футболимиздаги илк хусусий клубнинг элит лигадаги дастлабки қадамларини ёдга олсак, пойтахтликлар илк ғалабани нақ 10 тур кутишди: «Обод» 2016 йилнинг 27 май куни Жиззахнинг «Сўғдиёна»сини 2:1 ҳисобида енгди. Сўнгги турда «Пахтакор» билан 1:1 ҳисобида дуранг қайд этгани эса, жамоанинг мавсумдаги ўзига хос ташриф қоғози бўлди. Умуман, ўз тарихида илк марта олий лигада иштирок этган «Обод» мавсум давомида 24 очко тўплади (6та ғалаба, 6та дуранг, 18та мағлубият, тўплар нисбати 25:51) ва якуний жадвалда 14-ўринни банд этди. Клубнинг элит дивизионда асосан кенг миқёсда танилмаган футболчилар билан қатнашгани кўпчилик эътиборини тортди. Дастлаб ёш мураббий Бобур Зуҳриддинов бошчилигида ўйнаган жамоага иккинчи даврада Александр Мочинов устозлик қилди. Мавсум охирида эса бошқарув ваколати Жаъфар Ирисметов ихтиёрига топширилди. Шоҳруз Норхонов мавсум-2016да «Обод» сафида энг кўп майдонга тушган футболчи бўлди. Жамоа тўпурари мақоми ҳам шу ҳужумчига насиб этди - 14та гол. Хуршид Ғиёсов эса чинакам кашфиёт футболчи сифатида кўзга ташланди. «Обод» раҳбарияти 2016 йилнинг декабрида таниқли мураббий Рауф Инилеев билан ҳамкорлик қилиш борасида келишиб олди. Лекин жамоа кейинги мавсумни охирига етказолмади.

2010 йил. 2009 йили элит лигада 16та жамоа ўйнаган ва якунда «Сўғдиёна» ва «Бухоро» қуйига тушиб кетади. Бироқ юқорига чиқиш ҳуқуқини қўлга киритган «Қўқон-1912» ва «Машъал-Академия» клублари турли сабабларга кўра, кучлилар қаторида ўйнай олмайди. Натижада лига иштирокчилари сони ўз-ўзидан 14тага тушиб қолади.

2008 йил. «УзДонгЖу». Ислом Аҳмедов бошчилигидаги «УзДонгЖу»дан кўра, Олмалиқнинг ОТМК клуби кўпчиликни таажжублантирганди. Чунончи, барқарор молиявий кўмакдан бебаҳра  қолмаган жамоа чемпионатда 10-ўринни банд этади. Андижон клубига келсак, унинг учун «Машъал»ни ўз майдони ва «Қизилқум»ни сафарда енггани шунчаки, юпанч вазифасини ўтайди, холос. Дарвоқе, ўша мавсум вилоятнинг бош жамоаси - «Андижон» 5-ўринни эгаллаганди.

2007 йил. «Қурувчи». Бу клубга қадар элит лига дебютантлари қайд қилган энг юқори натижа 5-ўрин эди: «Самарқанд-Динамо» ва «Академия» клублари кучлилар даврасидаги илк уринишда шундай муваффақиятга эришган. «Қурувчи» эса бирданига Осиё Чемпионлар Лигасига чиқишни кўзлайди. Жамоа бунинг учун лигада камида 2-ўринни банд этиши ёки миллий кубокни ютиши керак эди. Таркибига кучли ва номдор футболчиларни жамланган жамоа илк уринишдаёқ мақсадига етади. Хусусан, «Пахтакор» билан ўйинларда қайд этилган икки дуранг (1:1, 0:0) ўша мавсум энг кўп муҳокама қилинган масалага айланади. Ҳикмат Эргашев бош мураббийлигида ўйнаган жамоада яқин-яқингача «Навбаҳор»ни бошқарган Илҳом Мўминжонов бош тўпурар бўлганди - 17та гол

2005 йил. «Шўртан». Шуҳрат Оқмирзаев бошчилигида Ғузор клуби олий лигадаги илк ғалабасини 11-турда «Навбаҳор»га қарши кечган баҳсда нишонлайди - 3:1. Якунда «Шўртан» 14та иштирокчи орасида 13-ўрин билан чекланади, аммо лигадан тушиб кетмайди, барибир. Чунки кейинги мавсум жамоалар сони 16тага етказилганди. Маълумот учун айтиш керак, ўша йили Қашқадарё вилоятининг бошқа клублари - «Машъал» ва «Насаф» тегишлича 2-3-ўринларга жойлашганди.

Элит лига дебютантлари ва уларнинг натижалари

Изоҳ: 1997 йили «Машъал» ўрнини «Насаф» эгаллаб, якунда 6-ўринни эгаллаган (15та ғалаба, 8та дуранг ва 11та мағлубият).

Қуйи лигадан юқорига йўл олган жамоалар хит-паради

4 марта - «Сўғдиёна», «Машъал», «Қўқон-1912» («Темирйўлчи»)

3 марта - «Андижон», «Гулистон», «Динамо» («Динамо- Самарқанд»)

2 марта - «Локомотив», «Цементчи», «Хоразм», «Шўртан»

1 марта - «Шифокор», «Политотдел», «Атласчи», «Сурхон», «Динамо» (Урганч), «Косонсой», «Зарафшон», «Чилонзор»,  «Металлург», «Янгиер», «Семурғ», «Кимёгар», «Қизилқум», «Орол», «Академия»,  «Тўполанг», «Қурувчи» («Бунёдкор»), «Вобкент», «УзДонгЖу», «Бухоро», «Обод»

Фикрат тайёрлади