Лионель Месси ва Криштиану Роналду «Олтин тўп» учун даъвогарларнинг кучли учлигидан четда қолишади, шекилли. Бунақаси охирги марта қачон юз берган? Нақ 12 йил олдин, худди жорий йилдагидек, ЖЧдан кейин. Ҳа, олдинроқ Криштиану Роналду ва Лионель Месси «Олтин тўп»дан тенгданига узоқда туришларига шубҳаланган бўлсангиз, энди ҳаммаси ойдинлашди, чоғи. Ҳар ҳолда, Италия медиаси хабарига кўра, Криш ҳам Лео сингари 3 нафар финалчи даъвогар рўйхатидан четда қолди. Тақдирлаш маросими учун тайёрланган промо-ролик шундан далолат. Унда Лео умуман йўқ, Криштиану эса фақат ўтган йилги лауреат сифатида кўриниш берган.

Тахмин қилинишича, финалга Килиан Мбаппе, Рафаэль Варан ва Лука Модрич чиқишган. Франциянинг France Football наш­ри буни яқин орада расман эълон қилса керак. Эслатиш жоиз, «Олтин тўп» охирги 10 йил бадалига Роналду ва Мессидан ортмади. Яъни 2007 йили соврин бразилиялик Какага насиб этган ва шундан кейин Аргентина ва Португалия вакилининг эраси бошланган эди. Лекин Лео ва Криш 2007 йилги сўровда ҳам кучли учликка киришган. Ўшанда бразилиялик 444 очко тўплаган бўлса, Месси 277 очко билан 2-ўринни банд этган, Роналдуга эса 255 очко берилган - 3-ўрин.

«Олтин тўп»-2006 сўровига келсак, Месси ва Роналду даъвогарларнинг кучли учлигига яқинлашмаган ҳам. Эсласангиз, соврин Германияда ташкиллаштирилган мундиалда ғалаба нашидасини сурган Италия терма жамоаси сардори Фабио Каннаваро мулкига айланганди. ФИФА ҳам айнан италиялик ҳимоячини 2006 йилнинг энг яхши футболчиси сифатида тан олганди. Умуман, Каннаваро нуфузли совринга эга чиққан охирги ҳимоя вакилидир. «Олтин тўп» учун пойгада 2-ўринга яна бир жаҳон чемпиони - Жанлуижи Буффон (124 очко) жойлашганди. «Барселона» сафида ЧЛ ғолибига айланган франциялик Тьерри Анри эса 3-поғона билан чекланган. Сўров якунига кўра, 4-6-қаторлар Роналдиньо, Зайниддин Зидан ва Это~Ога насиб қилган. Роналду атиги 5 очко олган ҳолда, Патрик Виейра ва Женнаро Гаттузо каби 14-бўлганди. Мессига эса бор-йўғи 2 балл берилган (Жуниньо, Жон Терри, Лука Тони ва Жанлука Замброттага ҳам).

Умуман, Лео 2006 йили профессионал даражадаги 3-мавсумини ўтказган ва Испаниянинг 2 карра чемпиони бўлиш баробарида ЧЛда ғалаба нашидасини суришга улгурганди (тўғри, аргентиналик бўлажак даҳоча финал ўйини қайдномасига тушмаган). Бироқ у асосий турнир - ЖЧда омадсиз иштирок этган. Ҳақиқий «мессимания» фақат кейинги мавсум старт олган. Хусусан, Лео «Реал» ва «Барса» ўртасидаги ядроли «Эль-класико» (3:3)да «хет-трик»ка эришганди. Роналду эса 12 йил олдин «МЮ» сафида фаолиятидаги илк чемпионликни тантана қилган, шунингдек, симуляциячи мақомини ҳам олган. ЖЧ-2006да эса Криштиану клубдоши Уэйн Рунининг қизил карточкага йўлиқишига сабабчи бўлиб, бутун Англия нафратига учраганди. Шунга қарамай, португалиялик иқтидор йилни кетма-кет 2 марта АПЛда ойнинг энг яхши футболчиси бўлиш билан якунлаганди. Кейинги йили у 3та йўналиш бўйича АПЛ қаҳрамони мақомини олганини ҳам айтиш ўринли. 2008 йилга келиб, Роналду илк бора «Олтин тўп» ютганди.