Лука Модрич Кака билан тўхтаб қолган ерликлар даврини қайтарди. 10 йил давомида Кришти ва Месси сингари “ўзга сайёраликлар” уловни ҳеч кимга бермаётганди. Модрич эса 33 ёшида уларнинг гегемонлигига чек қўйди.

Сиз Европа футболини кузатасизми? Ундаги Загребнинг “Динамо” клуби ҳақида биласизми? Чемпионлар лигасининг гуруҳ босқичида унда-бунда кўриниб қолмаса, Европа лигаларида юради шу жамоа, тўғрими? Бироқ унутмайлик, мазкур клуб Лука Модрични катта футболга етказиб берган.

2019 йил талабларида ПФЛ футбол академияларини ҳам алоҳида кўрсатиб ўтган. “Насаф” ва “Бунёдкор” футбол академияларининг ёрдами билан биз 10 йиллар давомида ўсмирлар ва ёшлар термаларини шакллантириб келдик. Албатта, бу рўйхатга “Пахтакор”ни ҳам қўшиш шарт, катта ишлар қилган бу клуб. Бироқ тўлақонли академия масаласига маблағ ажратиши аввал қийин эди. Энди эса клубнинг бақувват ҳомийлари бор.

Ўша “Динамо” Загреб кучли бешлик етакчилари билан рақобатлаша олмаслиги рост. Бироқ биласизми бу клуб жаҳон футболига қандай номларни етказиб берган? Қуйида тенгқурларимиз учун таниш бўлганларинигина келтириб ўтаман:

-Давор Шукер

-Звонимир Бобан

-Ивица Олич

-Нико Краньчар

-Марк Видука

-Марио Манджукич

-Милан Бадель

-Домагой Вида

-Матео Ковачич

-Деян Ловрен

-Ален Халилович

ва бу рўйхатни жуда узоқ давом эттириш мумкин.

Шунинг учун ҳам Хорватия терма жамоаси 1998 йилги Жаҳон чемпионатида ярим финалга қадар етиб борган. Шунинг учун ҳам хорватлар Россиядаги мундиалнинг финалида ўйнаган. Яъни, Хорватия футбол академиялари тамал тошини қўйиб берган футболчиларни, кейинчалик Европа грандлари “асраб олган” ҳамда етук футболчи бўлишига кўмак берган.

Яна бир мисол, Бельгиянинг “Андерлехт” ёки “Брюгге” футбол клубларини ҳам ўша Загреб жамоаси қаторида кўрасиз, тўғрими? Улар Чемпионлар лигаси фаворитлари эмас, бюджетлари Россия клублариникидан ҳам анча кам. Бироқ улар тамал тошини қўйган футболчилар бугун Бельгия термаси сифида бутун дунёни зир титратмоқда, шундай эмасми?

Мен нима демоқчиман. Биз футболга миллиардлар ажратаётган бўлсак ҳам, бу пулларимиз Хитой, Қатар, Саудия, БАА, Япония, Жанубий Корея ёки Эрон клублари футболга бераётган пуллардан анча камроқ. “Локомотив” ёки “Пахтакор” ҳозир бизда қанчалик қўрқинчли кўринмасин, улар Осиё миқёсида фаворит эмас. Биз гуруҳ босқичидан чиқишни орзу қиладиган аҳволга келиб қолганмиз, оёғимизни узатишимиз керак бўлган кўрпа шунга мажбур қилади. 

Демак, биз ҳам Осиёнинг Англияси, Германияси ёки Испанияси эмасмиз. Ўша чемпионатлар каби бизда жуда катта пуллар йўқ. Аммо нега Бельгия ёки Хорватия бўла олмаслигимиз керак? Футбол академияларига эътибор қилиб, катта эҳтимол билан далада мол боқиб юрган ёки пахтада оиласига ёрдам бераётган иқтидорларни кучли лигаларга учирма қилсак, балки улар Осиё миқёсида Модрич ёки Манджукичларимизни тарбиялаб бермайдими? Ва ўша кучли футболчилар ҳисобига Ўзбекистон термаси ҳам олдинга юрмайдими.

Ўша “Динамо”, ўша “Андерлехт” ёки “Брюгге” юлдузлари ўзида ўйнамаётганидан нолимайди, қувонади, пул ҳам ишлайди уларнинг ортидан. Эвазига ўша Бельгия ва ўша Хорватия бугуннинг қаҳрамонларидир. Агар ҳаммасини майдонлар сифати ва футбол академияларидан бошлаш керак дейилаётган бўлса, бу юқоридаги фикрларнинг илгари сурилишидир.

Биз айтган “Бунёдкор” Сардор Рашидовни, “Пахтакор” эса Одил Аҳмедовни яхшигина нархга сотди. Сизнингча, шунча ҳаракатларимиз учун икки дона футболчи жуда кам эмасми? Менимча, хаддан ташқари кам. Ўзимизни алдашни тўхтатиб, боримизни кўрсатишдан қўрқмаслигимиз керак. Гап қандайдир лиганинг форматида эмас, гап бутунлай футболдаги тизимнинг ўзида. Буни Лука Модрич мисолида айтишга ҳаракат қилдим.