Доимий ўқувчиларимиз эътибор қаратган бўлсалар, газетамизнинг 22 ноябрь куни чоп этилган 93 (1613)-сонида Европада етакчи ўринда турувчи 7та миллий лигани математик формулалар асосида таҳлил қилгандик. Бу сафар ўша мавзуни давом эттириб, соккер.ру (!!!!) сайти маълумотлари асосида алоҳида футболчиларнинг шахсий кўрсаткичларига назар соламиз. Шу жойда қайд этиш керак, замонамизда футбол статистикаси билан шуғулланувчи сайтлар жуда кўп ва улардаги баъзи маълумотлар ҳар доим ҳам бир-бирига тўғри келмайди. Қуйидаги таҳлилий мақолада эса нисбатан ишончли манба саналган Whoscored сайти маълумотларидан фойдаланилган. Газетхонлар учун қулай бўлиши учун ҳар бир кўрсаткич бўйича ноябрь якунига қадар бўлган ўйинлар юзасидан алоҳида жадвал келтирилган. Демак, бошладик.  

Лигаларнинг энг яхши тўпурарлари

Килиан Мбаппенинг ҳозирги самарадорлиги унинг савия бўйича Франция миллий чемпионати даражасидан ўзиб кетганини кўрсатмоқда. Ноябрь ойи якунигача тўпурарлар пойгасида ҳали кенг доирада танилмаган футболчилар ўзларини кўрсатишганини ҳам алоҳида факт сифатида келтириш ўринли. Мисол учун, Лука Йович мавсумни ўта шиддатли бошлаб, самарадорлик бобида ҳаттоки, Лионель Мессидан ҳам яхшироқ натижа қайд этди. Италияда эса декабрга қадар «сенсацион» тўпурар Кшиштоф Пентек кимсан Криштиану Роналдудан ҳам кўпроқ гол урди.

Лигаларнинг энг яхши ассистентлари

Гол ҳаммуаллифлари рўйхатида позиция бўйича ҳужумкор саналган футболчиларнинг устунлик қилишлари мантиққа мос. Лекин таҳлилдан маълум бўлдики, элит гуруҳда ҳимоя вакили ҳам бор. Гап Россия Премьер-лигасининг энг яхши ассистенти Юрий Газинский ҳақида кетмоқда. Ҳар ҳолда, у орқа чизиқда ишлашга мойил футболчи. Франция чемпионати пешқадами Анхель ди Мариянинг анча паст кўрсаткичга эгалигини «ПСЖ» бағрида устакор ижрочилар кўплиги билан боғлаш мумкин. Чунончи, ноябрь якунидаги ҳолат бўйича Лига 1нинг энг яхши 10 нафар ассистенти орасига Париж клубининг бирданига 4 нафар аъзоси кирди. Бошқа ҳеч қайси чемпионатда бундай эмас. Ҳа, Франция биринчилигида пойтахт клубининг қолган иштирокчилардан яққол устун эканлиги шу жиҳатда ҳам шундоқ кўзга ташланиб турибди.

 Лигаларнинг энг яхши зарба берувчилари

Криштиану Роналду 1та ўйинга тўғри келувчи зарбалар сони бўйича барча футболчилардан тотал устунликка эга. Бироқ бундай фаоллик ноябрь якунига қадар тўпурарлар рўйхатида акс этгани йўқ. Демакки, унда зарбалар сифати нисбатан паст бўлди. Тўғри, 1та ўйиндаги зарбаларнинг ўртача миқдори ва голлар сони таҳлил учун олинган 7та чемпионатдан 4тасида ўзаро уйғун, холос. . Яъни 4та лигада рақиблар дарвозасини энг кўп ўққа тутувчи футболчилар тўпурарлар рўйхатида ҳам етакчи сифатида гавдаланишди. Тўғри, қолган чемпионатларнинг энг кўп зарба йўлловчи футболчилари ҳам оз гол уришмаяпти. Фақат Португалия лигасида вазият бошқача: ҳар бир ўйинда дарвозабонларни ўртача ҳисобда 4,3 марта синаб кўрган Эдуардо Сальвио ноябрь якунига қадар атиги 1та гол нишонлади, холос. Оддий айтганда, 43та зарба - 1та гол...

 Лигаларнинг энг яхши тўп оширувчилари

Ушбу кўрсаткич бўйича тузилган жадвалдан кўриниб турибдики, замонавий футболда Хави вориси йўқ. Қатарда ўйнаётган испаниялик ярим ҳимоячи вақтида Ла-лига деярли хатосиз узатмалари билан кўзга ташланиш баробарида жамоадошлари голларига йўл очган ўткир «пас»лардан улкан хирмон ясаганди. Энди эса узатмалар аниқлиги бўйича асосан ҳимоявий ўйинга мойил футболчилар ўзларини кўрсатишмоқда. Бошқача айтганда, уларда ўткир «пас»лар йўқ. ҳисоби. Бу борада айниқса, Россия чемпионати футболчилари паст кўрсаткичга эгалар. Шундай тасаввур борки, РПЛда ўйинчилар ҳаттоки, 5 метр масофага ҳам аниқ тўп оширишга қийналишади.

Лигаларнинг энг яхши яккакурашчилари (ҳаводаги тўп учун)

Яна Россия чемпионати вакиллари орқада. Ҳа, РПЛдаги футболчилар индивидуал кўрсаткичлар бўйича сира мақтанолмайдилар. Ҳаводаги тўп учун курашда бўйнинг узунлиги асосий жиҳат эмаслигини Каллум Патерсон мисолида кўриш мумкин. Ҳар ҳолда, бу футболчининг бўйи 183 сантиметрга тенг (футбол учун нисбатан ўртача кўрсаткич), лекин бу унинг новча ҳимоячилар макони - АПЛда «иккинчи қават» қироли бўлиб юришига халақит бермаяпти. Яна бир қизиқ далил шуки, ҳаводаги яккакурашларда ҳимоячилар эмас, балки ҳужумчилар кўпроқ устун келишмоқда. Бунинг нима билан боғлиқлиги хусусида аниқ хулоса билдириш қийин.

Лигаларнинг энг яхши тўп олиб қўювчилари

Лукас Биглия «Милан»нинг таянч ҳудудида бетон тўсиқ вазифасини бажармоқда. Бироқ унинг жамоаси чемпионат ўйинларида нисбатан кўп гол қўйиб юбормоқда. Умуман, таянч зонасида тўпни олиб қўйишга қодир футболчига эга бўлиш жуда муҳим. Дейлик, бу борада Россия чемпионатининг энг яхши футболчиси бўлиб турган Самба Соунинг «Динамо» - «Енисей» ўйинида қатнашмагани москваликларга салбий таъсир қилиб, улар лига аутсайдерига ютқазишди.

Лигаларнинг энг яхши тўп илиб олувчилари

Тўпни илиб олиш бобидаги юқори кўрсаткич футболчининг ўйин вазиятларини яхши баҳолаши ва барчасини тўлиқ назорат қилишидан далолат. Қарангки, шу масалада Россия биринчилиги вакили пешқадам. Умуман, бугун «Динамо» ўйинини Тони Шуничсиз тасаввур қилиш ҳам қийин.

Лигаларнинг энг яхши зарба тўсувчилари

Энг жонкуяр футболчилар ҳар дам рақиб зарбаси йўлига қалқон бўлишга тайёр туришади. Тўғри, бундай жонкуярлик баъзан ноқулай «рикошет» билан якунланиши мумкин. Аммо голкиперларни энг мураккаб зарбалардан қутқариши кўпроқ кузатилади, барибир. Бу борада 6та чемпионат етакчилари деярли тенг кўрсаткичга эгалар. Фақат «Бернли» ҳимоячиси Жеймс Тарковски яққол ажралиб турибди.

Лигаларнинг энг яхши ўткир тўп узатувчилари

Германия чемпионатининг етакчисида кўрсаткич жуда пастлигига қаранг - ғалати факт. Россия лигасида тўп сураётган Леандро Паредес ҳам аниқлик устида анча ишлаши керак. Унда хатолар сони кўп. «Зенит»нинг ўйинларда хавфли вазиятларга чиқиш-чиқмаслиги асосан шу футболчига боғлиқ бўлиб қолмоқда. Таққослаш учун айтсак, РПЛда ассистентлик бобида пешқадамлик қилаётган Юрий Газинский 1та учрашувда ўртача ҳисобда атиги 1,4та ўткир узатмани амалга оширмоқда. Демак, бу борада аниқлик катта аҳамиятга эга.

Лигаларнинг энг яхши дриблингчилари

Неймар бош дриблингчи бўлиб турганида ҳайратланадиган жиҳат йўқ. Бразилиялик юлдуз Франция чемпионатида хоҳлаганича алдамчи ҳаракатларга бериляпти. Чунончи, рақиб жамоалар савияси нисбатан паст. Лионель Месси натижаси ҳам эътиборга молик - аргентиналик даҳоча дриблинг бобида ҳамон беназир, гарчи охирги вақтларда бу жиҳатга унча кўп урғу қаратмаётган бўлсада. Қолган чемпионатлар етакчилари деярли тенг кўрсаткич қайд этишмоқда. Биргина Россия ПЛда кучли дриблингчи йўқ.

Изоҳ: барча кўрсаткичлар ноябрь ойи охиридаги ҳолат бўйича келтирилган. Яъни миллий чемпионатларнинг охирги тур ўйинлари статистикаси ҳисобга киритилмаган.

Ўткирбек УМАРОВ тайёрлади.