Бразилиялик дарвозабон «Ливерпул»даги фаолиятини муваффақиятли бошлади. У АПЛ доирасидаги дастлабки 14та учрашувда ўз дарвозасидан атиги 5 марта тўп олиб чиқди ва жамоасининг мағлубиятсиз одимида катта роль ўйнамоқда.

АПЛда, жумладан, «Манчестер Сити» ва «Челси» сафида кўплаб бразилияликлар тўп суришлари Алиссонга қўшимча куч-қувват бераётгандек - голкипер ички мусобақада терма жамоа бўйича дўстлари билан муносиб беллашишга интилмоқда.

- Баъзи рақиблар билан терма жамоада ягона мақсад йўлида ишлаймиз, аммо АПЛда клубларимиз ўртасидаги пойга шиддати жуда баланд. Ана шу рақобатда тобланиб, янада самаралироқ ўйнашга интиляпман.

- Чемпионлик кураши осон эмаслигини биламиз. Лекин вазифани уддалай олишимизга ишонамиз. Табиийки, бор имкониятимизни ишга соляпмиз.

«Рома»да ўйнаган вақтидаёқ оёқлар билан ўйнаш маҳорати Алиссоннинг устун жиҳатларидан бири сифатида эътироф этилганди. Бироқ у «Лестер»га қарши баҳсда бу борада хатога йўл қўйди. Муҳими, тез орада тегишли хулоса чиқарди. Энди Алиссон тўп билан муомала қилишда жамоадошларига ёрдам беришга тайёр.

- Ўйлашимча, оёқ билан ўйнаш дарвозабонга қўшимча устунлик беради. Аммо унинг асосий вазифаси - дарвоза дахлсизлигини таъминлаш. Бунинг учун тўғри позиция танлаш муҳим эканини унутмаслиги лозим. Кипер шундан кейингина майдондаги жамоадошларига ёрдам бериши мумкин.

- «Интернасьонал»да фаолият бошлаганимдан буён шундай ўйнашни ёқтираман. Тўғри, Европада бу устунлигимдан жамоалар услубига қараб, фойдаланяпман. «Ливерпуль» - комбинацияни ҳимоя чизиғидан бошлайдиган жамоа. Унинг услубида дарвозабон фаоллиги ҳам муҳим аҳамиятга эга.