«Милан»нинг собиқ спорт директори Массимилиано Мирабелли SportItalia канали меҳмони бўлди. Мазкур учрашув чоғида у мухлисларни қизиқтирган саволларга жавоб берди.

«Милан»даги ишлаш тажрибаси ҳақида

- Менимча, эришган натижа билан тўхтаб қолмаслик керак. Ҳамиша юқорига интилиш лозим. Ҳеч нима қилмаган одамгина хатога йўл қўймайди. Бу жуда оғир кечган 15 ой эди. Агар ҳаммасини тўғри қилганмиз, десам алдаган бўламан.

Монтелла ҳақида

- 16 апрель. «Интер»га қарши дербида эдик. Оғир мавсум охирига етаётганди. Биз Монтелла яхши иш олиб борди, деб ҳисобладик. Менимча, у ишини давом эттиришга ҳақли эди. Албатта, хато қилганмиз, дейиш ҳозир осон. Лекин ҳақиқатан ҳам у қолишга муносиб эди. Бу борада кўп ўйлаганмиз. Қарор қандайдир дақиқалар ичида қабул қилинмаган.

Конте ҳақида

- Биз у билан мулоқот қилганмиз. Лекин гапдан уёғига ўтмаганмиз.

Бонуччи ҳақида

- Маротта ва Паратичи ишлаган «Ювентус» ҳам натижага эришиш учун бозорда кўп ишлаган. Бонуччининг трансфери омадсиз бўлди, деб ҳисобламайман. У билан гаплашанимда, Леонардо «Милан»да ўйнаш ғояси ажойиб эканлигини айтганди. Мен клубдан кетганимдан сўнг нима бўлганини билмайман. Ўшанда Бонуччининг «Ювентус» билан муносабатлари бузилганди. Биз эса бундан унумли фойдаланиб қолганмиз.

Андре Силве ҳақида

- У «Милан»га кўп пул олиб келади. Клуб ёшариши керак эди. Биз эса иқтидорли футболчиларни қидирганмиз. Бундай муҳитда уларга мослашиб олиш вақт талаб этарди. Ишончим комил, келажакда улардан кучли жамоа тузса бўлади. Афсуски, Силва қолмади. Унинг келажаги порлоқ.

Жамоага келмаган ҳужумчилар ҳақида

- Кўпдан буён Обамеянг билан муносабатларим яхши. Биз трансферни муҳокама қилганмиз. «Боруссия» катта пул сўраган бўлсада, у бизнинг асосий мақсадимиз эди. Бу келишув устида иш олиб борганман. Лекин мураббийнинг ҳам фикрини билишимиз керак эди. Монтелла асосий таркибда Калинични кўрди. Обамеянг билан музокаралар қийин кечган. Чунки биз йўл-йўлакай бошқа харидларни ҳам амалга оширганмиз. Охир-оқибат уни харид қилиш учун пулимиз қолмаган. Шунингдек, Бензема, Мората, Игуаин ва Иммобиле каби ҳужумчилар билан ҳам музокаралар олиб борганмиз.

Райола билан муносабатлари ҳақида

- Ўртамизда ҳеч қандай ғаразлик йўқ. Ҳар ким ўз қизиқишларини ҳимоя қилган. Мино мендан олдин ишлаган ҳамкасбларимга ўрганиб қолган бўлса керак. Шу ўринда эслатиб ўтмоқчиман, Доннарумма мен келгунимча шартномасини узайтирмаганди. Ваҳоланки, Райоланинг олдинги раҳбарият билан муносабатлари анча яхши бўлган. Бу қайноқ ёз эди. Биз шартномани узайтирдик ва Райола талаб қилган 30-40 миллионлик комиссион пулларни бермадик.

Ибрагимович ҳақида

- Ибрани бизга ҳам таклиф қилишган, аммо рад жавобини берганмиз. «Милан»га янги давр учун футболчилар керак эди. Ибрагимович - буюк чемпион. Бироқ янги даврни у билан бошлаб бўлмасди.

Гаттузо ҳақида

- Уни танлаганимдан фахрланаман. Гаттузо ўз штаби билан ишга профессионализм, жиддийлик ва муҳаббат олиб киряпти. Хитойликлар қарши бўлишганди. Лекин Рино билан келажак қуриш мумкин, деб ишонтирганман. У ҳам қуйидан бошлаган: Греция, «С» серия, «В» серия. Кимдир буни муаммо деб ҳисоблайди. Аммо мен бошқача фикрдаман.

«Рома» ҳақида

- Улар билан ишлашга қарши эмасдим. Бироқ Мончининг кетиш ёки кетмаслигини билмасдим.

Рейна ҳақида

- Биз у билан Доннарумманинг кетиши борасида муаммолар юзага келганида шартнома имзолаганмиз. Шунчаки, ўзимизни суғурталагандик.

Фабрегас ҳақида

- У билан музокара олиб борганмиз. Сескнинг «Милан»га келиш ёки келмаслигини билмайман. Фабрегас - ажойиб футболчи.

Пакета ҳақида

- У буюк иқтидор соҳиби. Аммо унинг учун сўралаётган пулни тўламаган бўлардим.

Конти ҳақида

- Ажойиб йигит, яхши футболчи. Афсуски, омади келмаяпти. Калабрия ва Абате вазифани яхши бажаришмоқда. Лекин Конти билан ундай бўлмаяпти.

Чалханоглу ва Родригес ҳақида

- Родригес кўзга ташланмайди. Бироқ Гаттузо футболи учун идеал ўйинчи. Чалханоглу эса ҳозирча бор имкониятининг 40 фоизини кўрсата олди, холос.

Роналду ҳақида

- Уни сотиб олиш истагимиз бор эди ва бу борада Мендеш билан гаплашганмиз. Роналдунинг «Реал»да муаммога дуч келиши мумкинлигини билгандик. Бироқ хитойлик раҳбарлар трансферни тақиқлаб қўйишган. Чунки келишув амалга ошиши учун клубнинг молиявий имкониятлари етмасди. Агар ҳозирги раҳбарият бўлганида, Роналду «Милан»да ўйнаётган бўлармиди...

Содиқ РАҲМОН тайёрлади.