Қайднома

Қидирув

Тони Кроос: «Омадсизлик ҳам сабоқ»

Тони Кроос: «Омадсизлик ҳам сабоқ»

  07.02.2019 08:37
  0
  204
Тони Кроос: «Омадсизлик ҳам сабоқ»

«Реал»нинг германиялик ярим ҳимоячиси Тони Кроос яқинда немис нашрларидан бирига интервью бериб, клубнинг биринчи даврада йўл қўйган хатолари ва ҳозирги ҳолати хусусида фикр билдирди. Тан олинган футболчининг алоҳида таъкидлашича, қимматли очколар бой берилган бўлсада, «Мадрид»да совринлар учун курашиш учун ҳали  имконият етарли. Тони шунингдек, жамоа футболчиларига яна яқинлашган жисмоний тайёргарлик бўйича  мураббий Антонио Пинтуснинг ролига ҳам тўхталиб ўтди.

- Ниҳоят, бир неча ойга чўзилган хавотирли ҳолат бироз тарқалди ва «Мадрид»да мавсумни муваффақиятли якунлашга умид туғилди. Айтингчи, шахсан сизга хайрли интиҳога ишонч ҳамроҳми?

- Тушунинг, ҳамма қатори биз ҳам омадсиз даврдан ҳимояланмаганмиз. Ҳа, Ла-лиганинг старт босқичида кўп очко йўқотдик, оддий айтганда, рақибларга шунчаки, совға қилдик. Хайриятки, энди омадсизлик ортда қолди. Сўнгги йиллардаги иштирокимиздан шундай хулосага келдимки, биз ажойиб жамоада тўп суряпмиз. Ҳар қандай вазият - мувафффақиятли даврда ҳам, омадсизликка юз тутган пайтда ҳам олға интилишдан тўхтамаймиз. Дейлик, ҳозир 2 фронтда ғолиблик учун кураш олиб бораётганимиз барчамиз учун ажойиб илҳом манбаидир. Албатта, якунда совринлар ютиш учун бор имкониятларни ишга соламиз.

- Қизиқ, жамоа ниманинг ҳисобига бирданига ўзгарди?

- Ҳар бир ғалаба жамоанинг қудратига нисбатан ишончни оширади. Ишларимиз юришмай қолган вақтларда ҳам изланишдан тўхтамадик. Биринчи даврада ҳаддан ортиқ хатоларга йўл қўйганимизни тушуниб турибмиз. Муҳими, уларни такрорламаслик. Шуни унутмаслик керакки, кўзланган мақсадга эришиш йўлида бор куч-маҳоратимиз ва имкониятларни сафарбар этишимиз талаб этилади. «Реал»нинг сўнгги йиллардаги зафарлари ана шу ҳақиқатни яққол исботлайди. Мисол учун, аввалги мавсумда чемпионлик шоҳсупасига чиқишдан барвақт умид узгандик, ҳаттоки, мўъжиза ҳам ёрдам беролмасди. Лекин шунда ҳам курашга чанқоқ эдик. Чунки нимагадир эришишимизга ишонардик. Айнан шу ишонч эвазига ЕЧЛда зафар қучдик.

- Сизнингча, муваффақият калити нимада?

- Буни ҳозир яққол кўриш мумкин: аксар жамоадошларим биринчи даврага нисбатан ажойиб спорт формасига чиқиб олишди. Биз учун энг муҳими шу.

- Антонио Пинтуснинг жамоадаги роли ҳақида нима дейсиз?

- У қайсидир маънода биз билан ҳамиша ҳамнафас. Антонио бунга қадар, яъни Зидан даврида жамоа аъзоларининг жисмоний ҳолати учун масъул эди. Бироқ Лопетеги ўз мутахассисини олиб келгач, Пинтуснинг таъсири анча пасайди. Шубҳа йўқ, ўйинчиларнинг жисмоний ҳолати муваффақиятнинг асосий омилларидан бири ҳисобланади. Афсуски, сўнгги ҳафталарда таркибимиздаги бир қатор йигитлар жароҳатланишди. Йўқ, бу борада жисмоний тайёргарликка масъул янги мутахассисни айблаш фикридан йироқман. Биз учун энг муҳими - футболчиларни юксак жисмоний даражага олиб чиқа оладиган кишининг жамоада бўлиши. Узун мавсумни бир маромда ўтказиш анчайин мушкул вазифа, хотиржамлик билан жиддий тайёргарлик кўришнинг иложи йўқ. Чунки ўйинлар тақвими ўта тиғиз. Бундай шароитда ҳар қандай футболчига алоҳида эътибор қаратиш керак. Ҳозирда умумий вазият ёмон эмас. Аммо баъзан омадсизликлар кузатилади, барибир. Жамоада Хесус Вальехога ўхшаган ёшлар кўп. Хусусан, Хесус - чинакам профессионал, ўз вазифасини рисоладагидек адо этади. Лекин тез-тез шикастланаётгани ҳам ҳақиқат...

- 2018 йил поёнига етгач, енгил тин олгандирсиз...

- Шундай дейиш мумкин: Рождество арафасида Клублар ўртасидаги жаҳон чемпионатида иштирок этдик, кейин 5-6 кун дам олдик ва янги йилнинг 3-санасидан Ла-лига баҳсларига қайтдик. Ҳозир қандайдир хулоса чиқарадиган пайт эмас, олдимизда йўлнинг ҳал қилувчи босқичи турибди. Аммо гап ортда қолган йил ҳақида борар экан, уни футболчи ҳаётига қиёслаш мумкин: парвозлар, пасайишлар... 2018 йил айнан шу жиҳати билан ёдда қолди, қизиқарли ўтди.

- Йил шунингдек, мусобақаларга бой бўлди, тўғрими?

- Албатта! Асосийси, шахсан мен ҳаётдан, футболдан завқ олишда давом этяпман. Ҳа, омадсизликлар ҳам ҳаётнинг бир бўлаги. Агар тегишли хулоса чиқаришни билсанг, ҳаттоки, омадсизлик ҳам муваффақиятга эришишда ёрдам беради.

С.РАҲМОНОВ тайёрлади


Манба: interfutbol.uz


InterFutbol.uz нинг Telegram даги саҳифасига уланинг – энг сўнгги янгиликлар, қизиқарли блоглар ва таҳлилий материаллар энди бир тўпламда.

Оммабоп мақолалар

Хабарингиз борми

Чемпионатлар

тўлиқ жадвал »
  • Сиз Эктор Купер миллий терма жамоамизни ЖЧ-2022 (Қатар)га олиб бора олишига ишонасизми?


«ИнтерФУТБОЛ» газетасининг расмий сайти.
Гувоҳнома № 0149. Берилган санаси: 25.06.2008 Муассис: «ИНТЕРФУТБОЛМЕДИА» МЧЖ.
Бош муҳаррир: Аҳадхон АБДУҲАМИТОВ.
Таҳририят манзили: 160400, Косонсой шаҳри,Чорбоғ кўчаси, 17-уй.
Электрон манзил: info@interfutbol.uz