Ҳаттоки, ҳисобдаги катта фарқ ҳам «Камп Ноу»даги жавоб ўйинида «қиринди»га айланади. Бошқача айтганда, «Барселона» ўз майдонида ҳақиқий шер. Каталонияликлар икки ўйиндан иборат қарама-қаршиликларда буни бир неча марта исботлашган. Дейлик, жамоа янги асрда жавоб баҳсида нақ 4 марта илк ўйиндаги катта камомадни йўққа чиқарди. Аниқроғи, биринчи учрашувда 2та ёки кўпроқ гол фарқи билан ютқазиб, такрорий ўйинда барчасини ўз ўрнига қўйди. Ажойиб «камбэклар» - улкан «Камп Ноу» сеҳридан далолатми?

Охирги ёрқин мисол, Эрнесто Вальверде шогирдлари Испания кубоги чорак финалининг илк баҳсида Андалусияда «Севилья»га 0:2 ҳисобида ютқазишди. Шунда айримлар «Барса»ни турнирдан «четга чиқариб» қўйишди. Йўқ, Каталония клубининг биринчи учрашувдаги натижасига қараб, хулоса чиқармаган маъқул. Хуллас, бу сафар Лионель Месси ҳам майдонга тушди ва «Барса» имконияти анча юқори баҳоланган «Севилья»нинг устунлигини шунчаки, кичик зарраларга бўлиб ташлади - 6:1. Дарвоқе, қуръага кўра, ярим финал жуфтликларидан бири чин мухлислар кутган кўриниш олди: «Барселона» ва «Реал». Бу ёмонми? Албатта, яхши! Ахир қўшимча 2та «Эль-класико» кимга ёқмайди?