Пенальтини аниқ амалга ошириш фоизи кимда энг яхшилигини биласизми? Қуйида афсонавий футболчиларнинг бу борадаги натижалари билан танишасиз.

Пенальтини аниқ бажариш учун темир асаб керак. Пенальти ўзига ишонган ва совуққонлар учун яратилган. Бу ерда худди камондан ўқ узгандек ўзгача бўлиш лозим. Тиббий  таҳлиллар шуни кўрсатадики, сайёранинг энг яхши Робин Гудлари - овчилар, олимпиячи камончилар юракларининг секин уриши билан ажралиб туришади. Бир сўз билан айтганда, ўзларини назорат қила олишади ва ортиқча асабийлашмайдилар. Снайперларда ҳам юракнинг ритми шундай.

Футболда ҳам фақат ўзига ишонганлар пенальтиларни амалга оширишади. Бу лотерея эмас, балки асаблар ўйинидир. Шу боис ҳам Месси пенальтини амалга оширишда бошқа афсоналардан кўра бўшроқми? Ижрочилик бор, лекин ўзига ишонч етишмайди. Бир неча кун олдин Лионель Ла Лигадаги 50-пенальтисини аниқ бажарди. Бу тарихдаги учинчи кўрсаткич. Уго Санчес (56 гол) ва Криштиану Роналду (61) 11 метрлик нуқтадан гол уриш бўйича ундан олдиндалар. Лекин Месси барча турнирларни ҳисоблаганда, 109та пенальтидан 25тасини аниқ бажаролмаган. Айрим манбаларда ёзилишича, у 110 марта 11 метрлик жаримани амалга оширган экан. Глобал олиб қарайдиган бўлсак, Лионель 22,93 фоиз ҳолатда бундай имкониятда рақиб дарвозасини ишғол қилолмаган. Криштиану ҳам 25 марта хатога йўл қўйган. Аммо унинг зарабалари кўпроқ. Роналду 114 зарбани аниқ амалга оширган бўлса, Мессида бундай зарбалар 84та.

Энг муҳими, португалияликдаги аниқлик фоизи 82ни, Мессида эса 77 фоизни ташкил қилади. Аргентиналик футболчини бемалол «ёмонлар» қаторига қўшсак бўлаверади. Мабодо Леодан бошқа футболчи тўртта зарбанинг биттасида хатога йўл қўйса, уни умуман 11 метрли нуқтага яқинлаштиришмайди. Аргентиналикка терма жамоа ва Каталония клубида ҳамма нарса мумкин. Мессининг бу кўрсаткичи техникадан эмас, балки руҳиятдандир. Мисол учун, Лионель 2014 йилга қадар пенальтиларни 85-86 фоизга аниқ бажарган.

Италиялик икки энтузиаст - Анжело Вигорите ва Федерико Морано йиллар давомида пенальтилар борасида ажойиб статистикага эгалар. Энг аввало, пенальтини аниқ амалга ошириш борасидаги топ-10га кириш учун ўртача аниқлик фоизи 88,57 бўлиши лозимлигини эслатиб ўтишимиз лозим. Яъни, бундай компанияга кириш учун ҳар 50та пенальтидан 41тасини аниқ амалга ошириш даркор. Шунингдек, 10таликка 70 мартадан кўп гол урганлар ҳам киритилган.

Италияликлар рейтингида Ромарио рекордчидир. У 123та уринишдан 116тасини самарали якунлаган. Ҳисобга олинмаган ўйинлар ҳам бўлиши мумкин, лекин бразилиялик пенальтини 88 фоиз аниқ амалга оширган. Фақатгина Ромарио, Роберто Баджо ва Криштиану Роналдулар фаолиятлари давомида 100тадан ортиқ пенальтидан самарали фойдаланишган.

Топ-10да уч нафар бразилиялик бор: Ромарио (тахминан 130тада 116та гол), Роберто Динамит (89тада 79та) ва Зико (105тада 93та). Шунинг-дек, машҳурликка эришган Куман, Баджо ва Марадонани ҳам унутишмаган. Яна икки нафар шотландиялик - ҳимоячи Грэм Александер (83тада 77та) ва Рэй Стюарт (91тада 81та) ҳам қайд этилган. Португалиялик Роналду бу компанияда Пеле ва бошқа ўнлаб футбол афсоналаридан юқорида.

Энг қизиқарли иштирокчини «десерт»га олиб қўйдик. Чунки унинг аниқ амалга ошириш фоизи ўта юқори. Факт шуки, мексикалик ҳужумчи Куаутемок Бланко фаолияти давомида 73 марта пенальти тепиб, шундан атиги иккитасидан унумли фойдалана олмаган. Аниқлик фоизи - 97,26 фоиз.

Унинг қаторида Мэттью Ле Тиссьени ҳам тилга олишимиз мумкин. Ушбу ярим ҳимоячи Англия терма жамоаси сафида бирорта ҳам гол урмаган. Аммо клуби сафида 50та зарбасининг 48таси рақиб дарвозаси ишғол қилиниши билан якунланган. Яъни, 98 фоиз аниқлик. Шунингдек, Гаиска Мендьета ҳам бор. У нуқтага 30 марта яқинлашиб, 29 марта гол урган. Мазкур рўйхатга Яри Литманен (29тада 28та), Ладисло Кубала (28тада 27та), Антонин Паненка (25тада 24та) кабилар ҳам киритилган. Улар 11 метрлик жаримани амалга оширишда 96 фоизлик кўрсаткич қайд этишган. Марко Ван Бастен 59та зарбанинг 56тасини аниқ амалга оширган. Мишель Платинида ҳам шунга ўхшаш ҳолат - 52тадан 49таси аниқ. Ширер ва Лэмпарднинг АПЛдаги статистикаси ажойиб - 56 ва 43тадан гол. Лекин хатолар ҳам етарлича - 15-16 фоиз.

Агар Албания чемпионатини кавлаштирсак, рекордчига дуч келамиз. Грек миллатига мансуб Ледио Пано исмли футболчи Албания чемпионати доирасида 50та пенальтининг барчасини аниқ амалга оширган. Бу рўйхатдаги 100 фоизлик кўрсаткичга эга бўлган ягона футболчидир. Франческо Тотти фаолияти давомида 113 марта пенальти тепган бўлса, шундан 91таси аниқ бўлган. Бу 80,53 фоиз деганидир. Зидан эса 21та зарбанинг 4тасида хатога йўл қўйгани боис, «нуқта»га ҳар доим ҳам яқинлашавермасди. Бразилиялик Роналдо эса 63та пенальтидан 58тасини аниқ амалга ошириб, 92 фоизлик натижага эришган. Роналдиньонинг кўрсаткичлари эса унчалик мақтовга арзимайди. У 98та уринишда 81та гол урган. Америкалик Лэндон Донованнинг иши унчалик ёмон эмас. У пенальтидан 56 марта гол уриш учун 61 марта уриниб кўрган. Герд Мюллер 88тада 74та, Эйсебио 58тада 53та гол урган. Бразилиялик дарвозабон Рожериу Сени фаолияти давомида 98 марта пенальти тепиб, шундан 79тасида касбдошларини ранжитган. Ривалдо, Ван Хойдонк, Сократис, Лэмпард, Папен, Ван Нистелрой, Шевченко ва Ди Натале каби футболчилар 40 мартадан кўп пенальти тепишган.

Роналду - 82, Месси - 77 фоизлик кўрсаткич билан рейтингнинг юқорисидан жой ололмадилар. Аммо 25 мартадан ноаниқ тепиш бу рекорд бўлса керак. Фақатгина Роналду ва Месси бунча кўп хато билан нуқтага яна яқинлашаверадилар. Гарчи Роберто Баджо (20) ва Франческо Тотти (22)лар ҳам ноаниқликка кўп йўл қўйишган бўлсада, рўйхатдан жой олишган. Яқин орада пенальтидан энг кўп гол уриш борасидаги рекорд янгиланса керак. Ҳозирча Ромарио 116та гол билан етакчилик қилмоқда. Роналдуда эса 114та аниқ зарба бор. Роберто Баджо 113та гол билан учинчи ўринда бормоқда.

А.ҲАМИДОВ тайёрлади