«Ювентус» ҳужумчиси Криштиану Роналду Европа Чемпионлар Лигаси 1/8 финалининг «Атлетико»га қарши кечган жавоб учрашувида ҳет-трикка эришди (3:0). Бу 34 ёшли футболчи учун карьерасидаги 52, Европа Чемпионлар Лигасидаги 8 ва Турин клуби учун эса дастлабки ҳет-трики бўлди. Бу ҳақда Gracenote Live хабар берди.

Ушбу кўрсаткичда у «Барселона» ҳужумчиси Лионель Мессига етиб олди. Аргентиналик ҳисобида ҳам Европанинг нуфузли мусобақасида қайд этилган 8 та ҳет-трик мавжуд. Бундан ташқари Роналду жорий мавсум мазкур мусобақадаги голлари сонини 4 тага етказиб олди. Сўнгги ўйинда у бутун гуруҳ баҳсларидан кўра кўпроқ гол урди. Бунга қадар португалиялик ҳужумчи 5 та беллашувда 1 та гол урганди.

Айтганча, Португалиялик футболчи мазкур мусобақада битта жамоага қарши 2 та ўйинда ҳет-трик қила олган 2-футболчи бўлди, деб ёзади УЕФА расмий сайти.

Ҳужумчи «Реал» сафида ҳам «Атлетико»га қарши Чемпионлар Лигаси ўйинида 3 та гол уриб, ҳет-трик қайд этганди. Мусобақа тарихида эса бундай натижага биринчи бўлиб «Шахтёр» собиқ ҳужумчиси Луис Адриано эришган. У Беларуснинг БАТЭ жамоасига қарши 2 та учрашувда ҳам ҳет-трик қайд эта олганди.