УЕФА расмий сайти сўрови натижасига мувофиқ, «Ювентус» ҳужумчиси Криштиану Роналду ЧЛнинг якунланган ҳафтадаги энг яхши футболчиси мақомига муносиб кўрилди. Португалиялик футболчи 1|8 финалнинг жавоб ўйинида «Атлетико» дарвозасига 3та гол уриб, «Юве»нинг илк учрашувдаги мағлубияти (0:2)ни йўққа чиқарди. Роналду сўровда «Барселона» сардори Лионель Месси, «Ливерпуль» ҳужумчиси Садио Мане ва «Манчестер Сити» ярим ҳимоячиси Лерой Санени ортда қолдирди. Айтганча, португалиялик футболчининг голлари нафақат майдон, балки унинг ташқарида ҳам «Ювентус»га катта фойда келтирмоқда. Мисол учун, унинг «Атлетико» дарвозасига урган 3та голи ортидан Турин клуби акциялари нархи 18 фоиз қимматлашди. Умуман олганда, Роналду харидидан кейин «Ювентус» акциялари баҳоси деярли 137 фоиз кўтарилди.

«Ливерпуль» ҳужумчиси Садио Мане эса ЧЛ 1|8 финали жавоб ўйинларида урилган энг чиройли гол муаллифи сифатида эътироф этилди. Сенегаллик футболчи «Бавария»га қарши кечган сафар ўйинининг 84-дақиқасида Мануэль Нойер дарвозани нишонга олиб, якуний ҳисобни ўрнатди. УЕФА сайтида ўтказилган сўровда яна 3 нафар футболчи - Лассе Шине, Душан Тадич («Аякс») ва Лионель Месси («Барселона»)нинг голи кўрсатилганди.